Isaiah -33 -

ဟေရှာယအနာဂတ္တိကျမ်း - ၃၃

မစတော်မူရန်ဆုတောင်းခြင်း

1သူတစ်ပါး လုယူခြင်းကိုမခံဘဲလျက်၊ လုယူတတ်သောသူ၊ သူတစ်ပါးဖျက်ဆီးခြင်းကို မခံဘဲလျက်၊ ဖျက်ဆီးတတ်သောသူ၊ သင်သည် အမင်္ဂလာရှိ၏။ သင်သည် မလုမယူဘဲ နေသောအခါ လုယူခြင်းကို ခံရမည်။ ဖျက်ဆီး၍ မောသောအခါ ပျက်စီးခြင်းသို့ ရောက်လိမ့်မည်။

2အိုထာဝရဘုရား၊ အကျွန်ုပ်တို့ကို သနားတော်မူပါ။ အကျွန်ုပ်တို့သည် ကိုယ်တော်ကို မျှော်လင့်ကြပါ၏။ နံနက်တိုင်း အကျွန်ုပ်တို့၌ ခွန်အားကို ပေးတော်မူပါ။ အမှုရောက်သောအခါ၊ အကျွန်ုပ်တို့ကို ကယ်တင်တော်မူပါ။

3အလုံးအရင်း၏အသံကြောင့်၊ လူစုတို့သည် ပြေးကြ၏။ ထတော်မူသောအခါ၊ လူမျိုးတို့သည် အရပ်ရပ် ကွဲပြားကြ၏။ 4သူတစ်ပါးတို့သည် သင်တို့၏ဥစ္စာကို ကျိုင်းကောင် သိမ်းယူသကဲ့သို့ သိမ်းယူကြလိမ့်မည်။ ကျိုင်းကောင်တို့သည် လူးလာပြေးသကဲ့သို့၊ သင်တို့၏ ဥစ္စာပေါ်မှာ လူးလာပြေးကြလိမ့်မည်။

5ထာဝရဘုရားသည် ချီးမြှောက်ခြင်း ရှိတော်မူ၏။ မြင့်သောအရပ်၌ နေတော်မူ၏။ ဇိအုန်မြို့ကို တရားသဖြင့် ဆုံးဖြတ်ခြင်း၊ ဖြောင့်မတ်စွာ စီရင်ခြင်းနှင့် ပြည့်စေတော်မူ၏။ 6ဉာဏ်နှင့် ပညာသည် သင်၏လက်ထက်၌ တည်ကြည်ခြင်း၊ မြဲမြံစွာ ကယ်တင်ခြင်းကို ဖြစ်စေလိမ့်မည်။ ထာဝရဘုရားကို ကြောက်ရွံ့ခြင်းသဘောသည်လည်း သင်၏ဘဏ္ဍာ ဖြစ်လိမ့်မည်။

7သူရဲတို့သည် ပြင်၌ အော်ဟစ်ကြ၏။ မိတ်သဟာယစကားကို ပြောသော တမန်တော်တို့သည် ပြင်းစွာ ငိုကြွေးကြ၏။ 8လမ်းမတို့သည် ဆိတ်ညံကြ၏။ လမ်းခရီး၌ သွားလာသောသူ မရှိ။ ထိုမင်းသည် သစ္စာပျက်လေပြီ။ မြို့များကိုလည်း ပယ်လေပြီ။ အဘယ်သူ၏မျက်နှာကို မမှတ်တတ်။ 9ပြည်တော်သည် ငြိုငြင်၍ အားလျော့၏။ လေဗနုန်တောသည် ရှက်ကြောက်၍ နွမ်းရိ၏။ ရှာရုန်အရပ်သည် တောကဲ့သို့ဖြစ်၏။ ဗာရှန်တောင်နှင့် ကရမေလတောင်သည် လှုပ်ရှား၏။

10ထာဝရဘုရား မိန့်တော်မူသည်ကား၊ ယခုငါထမည်။ ယခု ချီးမြှောက်ခြင်းသို့ ရောက်မည်။ ကိုယ်ကိုကိုယ် ချီးမြှောက်မည်။ 11သင်တို့သည် ဖွဲကို ကိုယ်ဝန်ဆောင်၍၊ အမှိုက်ကို ဖွားမြင်ရလိမ့်မည်။ သင်တို့ စိတ်သဘောသည် မီးဖြစ်၍၊ သင်တို့ကို ဖျက်ဆီးလိမ့်မည်။ 12လူများတို့သည် ထုံးကျောက်ကို ဖုတ်သကဲ့သို့လည်းကောင်း၊ ဆူးပင်များကို ခုတ်၍ မီးရှို့သကဲ့သို့လည်းကောင်း ဖြစ်ကြလိမ့်မည်။ 13ဝေးသောသူတို့၊ ငါပြုသောအမှုကို မှတ်ကြလော့။ နီးသောသူတို့၊ ငါ့တန်ခိုးကို ဝန်ခံကြလော့။ 14အပြစ်ရှိသော ဇိအုန်မြို့သားတို့သည် ကြောက်ကြ၏။ အဓမ္မပြုသောသူတို့သည် ထိတ်လန့်ကြ၏။ ငါတို့တွင် အဘယ်သူသည် လောင်သောမီးထဲမှာ နေရမည်နည်း။ ငါတို့တွင် အဘယ်သူသည် ထာဝရမီးလောင်ခြင်းကို ခံလျက်နေရမည်နည်း။ 15တရားသဖြင့်ကျင့်၍ ဖြောင့်မတ်စွာ ပြောထသော၊ ညှဉ်းဆဲခြင်းအားဖြင့် ရသောငွေကို ရွံ၍၊ တံစိုးကိုလည်း ငြင်းပယ်ထသော၊ လူအသက်သတ်ခြင်းအမှုကို နားမခံ၊ အဓမ္မအမှုများကို မကြည့်မရှုသောသူသည် မြင့်သောအရပ်၌ နေလိမ့်မည်။ 16ခိုင်ခံ့သော ကျောက်မြို့၌ ခိုလှုံလိမ့်မည်။ ထိုသူအား အစာကို အစဉ်ပေးရလိမ့်မည်။ သောက်ရေလည်း မပြတ်ရ။

ရှင်ဘုရင်၏တင့်တယ်ခြင်း

17သင်သည် ရှင်ဘုရင်၏ တင့်တယ်ခြင်းအသရေတော်ကို ကိုယ်မျက်စိနှင့် မြင်ရ၍၊ ဝေးလှသောပြည်ကိုလည်း ကြည့်မြင်ရလိမ့်မည်။ 18သင်သည် ကြောက်လန့်ဖွယ်သော အခြင်းအရာကို အောက်မေ့သောအခါ၊ စာရင်းယူသောသူသည် အဘယ်မှာ ရှိသနည်း။ အခွန်ခံသောသူသည် အဘယ်မှာ ရှိသနည်း။ ပြအိုးတို့ကို ရေတွက်သောသူသည် အဘယ်မှာ ရှိသနည်း။ 19ကြမ်းတမ်းသောလူမျိုး၊ နားမဝင်နိုင်အောင် နက်နဲသောစကား၊ နားမလည်နိုင်အောင် ခက်ခဲသောစကားကို ပြောသော လူမျိုးကို သင်သည် မတွေ့မမြင်ရ။ 20ငါတို့ပွဲခံရာမြို့၊ ဇိအုန်မြို့ကို ကြည့်ရှုလော့။ တိုင်တစ်ခုမျှမရွှေ့၊ ကြိုးတစ်ခုမျှမပြတ်၊ အလျှင်းမပျက်ရသော တဲတည်းဟူသော၊ ငြိမ်ဝပ်သောနေရာ ယေရုရှလင်မြို့ကို ကိုယ်မျက်စိနှင့် မြင်ရလိမ့်မည်။ 21ထိုမြို့တွင် ဘုန်းကြီးသော ထာဝရဘုရားသည် ငါတို့၌ ကျယ်သောမြစ်များ ဆုံးရာအရပ် ဖြစ်တော်မူလိမ့်မည်။ ထိုအရပ်၌ တက်သောရဲလှေ၊ အားကြီးသော သင်္ဘောတစ်စင်းမျှ မလျှောက်မသွားရ။ 22အကြောင်းမူကား၊ ထာဝရဘုရားသည် ငါတို့၏ တရားသူကြီး ဖြစ်တော်မူ၏။ ထာဝရဘုရားသည် ငါတို့၏ ပညတ်တရားရှင် ဖြစ်တော်မူ၏။ ထာဝရဘုရားသည် ငါတို့၏ ရှင်ဘုရင်ဖြစ်၍၊ ငါတို့ကို ကယ်တင်တော်မူလိမ့်မည်။

23သင်၏ သင်္ဘောရွက်ကြိုးများ ပြုတ်လျက်ရှိ၏။ ရွက်တိုင်ကို ခိုင်ခံ့စွာမချည်၊ ရွက်ကိုလည်း မဖြန့်နိုင်။ သို့ဖြစ်၍၊ များစွာသောဥစ္စာကို လုယူဝေငှရ၏။ ခြေဆွံ့သောသူပင် လုယူရာ ဥစ္စာကို လုယူရ၏။ 24မြို့သားကလည်း၊ ငါနာသည်ဟု မဆိုရ။ ထိုမြို့၌နေသော သူတို့သည် အပြစ်ပြေရှင်းခြင်းသို့ ရောက်ရကြလိမ့်မည်။

ဟေရှာယအနာဂတ္တိကျမ်း - ၃၃ (အနက်ဖွင့်)

၅။ အဓမ္မအာရှိုရသားများသို့အမင်္ဂလာ(အခန်း၃၃)

၃၃:၁-၆ အာရှုရိပြည်၏လိမ်ညာလှည့်ဖျားခြင်း၊သူတပါးဖျက်ဆီးခြင်း၊ အကုသိုလ်များတဖန်ဝဋ်လည်လာသည်(ငယ်၁-၂)။ ထိုအခါဘုရားသခင်၏ လူများသည်ဆင်းရဲခြင်း၊ဘေးဒုက္ခမှလွတ်မြောက်ခြင်းကိုချီးမွမ်းကြသည်။ ဘုရားသခင်၏အရေးယူအပြစ်ပေးခြင်းသည်မိုးချုန်းသံကဲ့သို့သံလွန်မြည်ဟီး မည်။ ဣသရေလများဘေးရန်အန္တရာယ်စက်ကွင်းမှလွတ်မြောက်ပြီးနောက် ရန်သူများအပေါ်သို့အရေးယူခြင်းဖြစ်သည်။ ခရစ်တော်ဘုရားသည်သရဖူ ဆောင်းလျက်ဇိအုန်မြို့ကိုတရားသဖြင့်ဆုံးဖြတ်ခြင်း၊ဖြောင့်မတ်စွာစီရင်ခြင်း ပြုတော်မူမည်။ ဉာဏ်နှင့်ပညာကိုကယ်တင်ခြင်းဖြစ်ပေါ်ရာဖြစ်စေမည်။ ထာဝရ ဘုရားကြောက်ရွံ့ခြင်းဘဏ္ဍာရရှိစေမည်။

၃၃:၇-၉ ဤကျမ်းပိုဒ်များသည်ဟေဇကိမင်းလက်ထက်တွင်သနာခရိပ်ထံ သို့ငြိမ်းချမ်းရေးသံတမန်စေလွှတ်၍ငွေဒင်္ဂါးသုံးရာ၊ရွှေဒင်္ဂါးသုံးဆယ်ဆက်သ ခြင်း(၄ရာ၁၈:၁၃-၁၆)အားပြန်လည်ရည်ညွှန်းသည်။ သို့သော်လည်းထိုသံတ မန်ရေးသည်မအောင်မြင်။ အာရှုရိမင်းသည်ယုဒပြည်တိုက်ခိုက်သိမ်းပိုက်ရန် စစ်ချီပြန်သည်။

ယုဒပြည်သည်ရည်မှန်းချက်သဲထဲရေသွန်ရာရောက်သဖြင့်ရှိုက်ကြီးတငင် ငိုကြွေးကြသည်။ အာရှုရိသည်ကတိတည်သူမဟုတ်။ သစ္စာဖောက်ဖျက်၍ယုဒ ပြည်ကိုတိုက်ခိုက်ပြန်သည်။ အဓိကအချက်အချာနေရာဌာနများအားလုံးပျက် စီးကုန်သည်။ လူခြေတိတ်ဆိတ်ငြိမ်သက်သွားသည်။

၃၃:၁၀-၁၂ သို့သော်ဘုရားသခင်သည်လက်မတင်အချိန်မှီရန်သူများကို အရေးယူပေးသည်။ အာရှုရိများအားဖွဲကိုယ်ဝန်ဆောင်၍အမှိုက်မွေးဖွားသကဲ့ သို့ဖြစ်စေမည်။ တနည်းအားဖြင့်အာရှုရိတို့၏ရည်ရွယ်ချက်သည်အချည်းနှီး ဖြစ်သွားသည်။ အရူးအိမ်မက်ဖြစ်သွားသည်။ အခြားသူများဖျက်ချင်သည့်အ မျက်ဒေါသကသူ့ကိုပြန်လည်မီးလောင်စေသည်။ ထုံးကျောက်ကိုမီးဖုတ်၊ဆူး ပင်ကိုခုတ်ခြင်းသည်အပြစ်တရားစီရင်ခြင်းကိုရည်ညွှန်းသည်။

၃၃:၁၃-၁၆ ဝေးသောသူတို့ဆိုသည်မှာဘုရားတရားမဲ့သောတပါးအမျိုး သားများဖြစ်၍၊နီးသောသူတို့ဆိုသည်မှာဇိအုန်တောင်ကိုခိုမှီသောဂျူးလူမျိုး များဖြစ်သည်။ ဘုရားသခင်၏အပြစ်တရားစီရင်ခြင်း၊အမျက်ဒေါသမှကင်း လွတ်မည့်သူများမှာအသက်တာဖြောင့်မတ်စင်ကြယ်သူများ၊အပြစ်ဒုစရိုက်နှင့် ကင်းဝေးသူများဖြစ်သည်။

၃၃:၁၇ ယုံကြည်ခြင်းသစ္စာရှိသူရွေးနှုတ်ထားသောလူနည်းစုသည်ရှင်ဘု ရင်၏တင့်တယ်ခြင်းအသရေတော်ကို၎င်း၊ဝေးလှသောပြည်ကို၎င်းမျက်စိဖြင့် တပ်အပ်မြင်တွေ့ကြရမည်။

ဤကျမ်းပိုဒ်ကိုA.J.Gordon က ဤသို့ချီးမွမ်းသီချင်းသီဆိုထားသည်။

ကိုယ်တော်ဘုရား၏တင့်တယ်ခြင်းကိုရှုမောရမည်

ဝေးလှသောပြည်ကိုမြင်ခွင့်ရမည်။

အရိပ်နှင့်ဝေးလံခြင်းများဖယ်ရှားလျက်

ယနေ့မှောင်မိုက်ကာလပပျောက်မည်။

ကိုယ်တော်၏ဘုန်းအသရေတော်ဖူးမြင်ရမည်

သိုးသငယ်တခါကအသေခံရ

ထိုစကားမှာနားထဲမှာပဲ့ပြင်ထပ်

ငါ့ကိုရွေးနှုတ်ကယ်တင်ခဲ့ပြီလေ။

ဟာလေလုယ၊ဟာလေလုယာ

ငါအတွက်သိုးသငယ်အသက်ပေးခဲ့

ဟာလေလုယ၊ဟာလေလုယ

ဟာလေလုယ၊အာမင်။

၃၃:၁၈-၁၉ တချိန်ကရွှေငွေအသားပြာတံစိုးလက်ဆောင်ပေး၍ကြောက် လန့်ခဲ့သောအာရှုရိသားများတွေ့မြင်ရတော့မည်မဟုတ်။ မြို့ရိုးပေါ်တက်၍ရန်သူတို့၏လှုပ်ရှားမှုကိုချောင်းကြည့်ရသောအဖြစ်ဆိုးမျိုးကြုံရတော့မည်မဟုတ်။ တခါမှမကြားဖူးသောသူစိမ်းသရံများ၏ဘာသာစကားပြောသံများအ ကြောင်းမေ့ပျောက်ကြရမည်။

၃၃:၂၀-၂၂ အနှစ်တစ်ထောင်ကာလ၌ဇိအုန်တောင်ပေါ်တွင်ကတိတော်ပြု ထားသည့်ပွဲတော်တဖန်တည်ခင်းမည်။ တချိန်ကတဲကုပ်၊ဇနပုဒ်ထင်မှတ်ခဲ့သမျှ သည်ထာဝရဟော်နန်းများဖြစ်သွားမည်။ ဘုရားသခင်သည်ဇိအုန်တောင်ပေါ် တွင်စိုးစံ၍ဇိအုန်တောင်ပေါ်မှမင်္ဂလာမြစ်သည်မြို့တော်ထိတိုင်အောင်စီးဆင်း သွားမည်။ လုံခြုံခြင်း၊တင့်တယ်ခြင်းနှင့်အားအင်သစ်များယူဆောင်သွားပါမည်။ ထိုအရပ်၌ရန်သူ့လှေ၊စစ်သင်္ဘောတစီးမှအနားမသိရ။ အဘယ်ကြောင့်ဆိုသော် ထိုနေရာတွင်ဘုရားသခင်ကိုယ်တိုင်စိုးစံသည်။

၃၃:၂၃-၂၄ ကျမ်းစာပညာရှင်များကအပိုဒ်ငယ်၂၃အစပိုင်းသည်ယေရုရှ လင်လား၊ရန်သူလားဟူအငြင်းပွားကြသည်။ အကယ်၍ဇိအုန်တောင်၏ရန်သူ ကိုရည်ညွှန်းလျှင်သင်္ဘောများသည်မြို့တော်ကိုတိုက်ခိုက်ဖို့ချဉ်းကပ်လာကြ ခြင်းဖြစ်ပေမည်။ အကယ်၍ယေရုရှလင်ကိုရည်ညွှန်းလျှင်

ထိုဒေသခံလူများသည်အစွမ်းအစမရှိ၊

အားအင်ချိနဲ့သူများဖြစ်မည်။ သင်္ဘောကို၎င်း

တိုင်းပြည်ကို၎င်း၊လမ်းပြနိုင်သူများမဟုတ်။

သူတို့ထဲများ၊နေရာများကိုလည်းမြဲမြံအောင်

ရွက်ဖြန့်၊တိုက်ခိုက်ဖို့ဆိုလိုခြင်းဖြစ်မည်။၄၀

ထိုနိုင်ငံတော်တွင်ခြေမစွမ်းသူများသည်လည်းပြေးလွှားခုန်ပေါက်နိုင် သည်။ အဖျားနာရောဂါမရှိ။ လူများ၏အတိတ်တစ္ဆေ၊အမှားများကိုလည်းခွင့် လွှတ်ထားသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။