Isaiah -3 -

ဟေရှာယအနာဂတ္တိကျမ်း - ၃

ယေရုရှလင်နှင့်ယုဒပြည်ကိုစီရင်ခြင်း

1အကြောင်းမူကား၊ ကောင်းကင်ဗိုလ်ခြေသခင်၊ အရှင်ထာဝရဘုရားသည် မုန့်အထောက်အပင့်နှင့် ရေအထောက်အပင့် ရှိသမျှမှစ၍၊ ခပ်သိမ်းသော အထောက်အပင့်တို့ကို ယေရုရှလင်မြို့နှင့် ယုဒပြည်မှ ပယ်ရှားတော်မူ၏။ 2တန်ခိုးကြီးသောသူ၊ စစ်တိုက်သောသူ၊ တရားသူကြီး၊ ပရောဖက်၊ ဗေဒင်တတ်၊ အသက်ကြီးသူ၊ 3သွေးသောက်ကြီး၊ အရာရှိ၊ တိုင်ပင်မှူးမတ်၊ လက်သတ္တိရှိသောသူ၊ နှုတ်သတ္တိရှိသောသူတို့ကို ပယ်ရှားတော်မူ၏။ 4ထိုပြည်တွင် သူငယ်တို့ကို မင်းအရာ၌ငါခန့်ထား၍ နို့စို့သူငယ်တို့သည် အုပ်စိုးကြလိမ့်မည်။ 5ပြည်သားတို့သည် တစ်ယောက်ကိုတစ်ယောက်၊ အိမ်နီးချင်း တစ်ယောက်ကိုတစ်ယောက် ညှဉ်းဆဲကြလိမ့်မည်။ သူငယ်သည် အသက်ကြီးသူကိုလည်းကောင်း၊ လူယုတ်သည် လူမြတ်ကိုလည်းကောင်း စော်ကားလိမ့်မည်။ 6ထိုကြောင့်၊ လူသည် ပေါက်ဖော်ချင်းညီအစ်ကိုကို ကိုင်ဆွဲ၍၊ သင်၌ အဝတ်ရှိသေး၏။ လာပါ။ အကျွန်ုပ်တို့အပေါ်၌ မင်းပြုပါ။ အကျွန်ုပ်တို့ ပြိုပျက်ရာကိုလည်း ပြုပြင်ပါဟုဆိုလျှင်၊ 7သူကလည်း၊ ငါသည် ပြုပြင်နိုင်သောသူ မဟုတ်။ ငါ့အိမ်၌မုန့်လည်းမရှိ။ အဝတ်လည်းမရှိ။ ငါ့ကို ပြည်သားတို့အပေါ်မှာ မင်းမပြုစေနှင့်ဟု အတည့်အလင်း ပြောဆိုလိမ့်မည်။ 8ယေရုရှလင်မြို့ပြိုလဲလျက်၊ ယုဒပြည် ဆုံးရှုံးလျက်ရှိ၏။ အကြောင်းမူကား၊ သူတို့စကားနှင့် သူတို့အကျင့်တို့သည် ထာဝရဘုရား၏ အလိုတော်နှင့်မညီ၊ ဘုန်းကြီးသောမျက်စိတော်တို့ကို ဆန့်ကျင်ဘက်ပြုကြ၏။ 9သူတို့မျက်နှာအနေအထားသည် သူတို့တစ်ဖက်၌ သက်သေခံ၏။ မိမိဒုစရိုက်ကို မဝှက်၊ သောဒုံမြို့သားကဲ့သို့ ထင်ရှားစွာပြုကြ၏။ သူတို့ဝိညာဉ်၌ အမင်္ဂလာရှိ၏။ အကြောင်းမူကား၊ မကောင်းကျိုးကို မိမိတို့၌ဆပ်ပေးကြပြီ။ 10ဖြောင့်မတ်သောသူသည် မင်္ဂလာရှိ၏ဟု ထိုသူအားပြောလော့။ အကြောင်းမူကား၊ သူသည် မိမိအကျင့်တို့၏အကျိုးကို ခံစားရလိမ့်မည်။ 11မတရားသောသူသည် အမင်္ဂလာရှိ၏။ မကောင်းသောအမှုနှင့် တွေ့လိမ့်မည်။ အကြောင်းမူကား၊ သူကျင့်သော အကျင့်တို့၏အပြစ်ကို သူ၌ဆပ်ပေးရလိမ့်မည်။ 12ငါ၏လူများကိုကား၊ သူငယ်တို့သည် ညှဉ်းဆဲကြ၏။ မိန်းမတို့သည်လည်း အုပ်စိုးကြ၏။ ငါ၏လူများတို့၊ သင်တို့အား လမ်းပြသောသူတို့သည် လမ်းလွဲစေကြ၏။ သင်တို့သွားသော လမ်းခရီးကိုလည်း ဖျက်ကြ၏။

ဇိအုန်သတို့သမီးတို့ကိုစီရင်ခြင်း

13ထာဝရဘုရားသည် မိမိအမှုကို စောင့်အံ့သောငှာ ထတော်မူ၏။ မိမိလူတို့ကို တရားစီရင်မည်ဟု အားထုတ်တော်မူ၏။ 14ထာဝရဘုရားသည် မိမိလူတို့တွင်၊ အသက်ကြီးသူတို့ကိုလည်းကောင်း၊ မင်းတို့ကိုလည်းကောင်း တရားစီရင်ရာ၌ ဆီးကြိုတော်မူမည်။ သင်တို့သည် ငါ့ဥယျာဉ်တော်ကို စားကြပြီ။ ဆင်းရဲသောသူတို့၏ဥစ္စာကိုလုယူ၍၊ မိမိတို့အိမ်၌ သိုထားကြပြီ။ 15ငါ၏လူတို့ကို အဘယ်ကြောင့် နှိပ်စက်ကြသနည်း။ ဆင်းရဲသားတို့၏မျက်နှာကို အဘယ်ကြောင့် ကြိတ်ကြသနည်းဟု ကောင်းကင်ဗိုလ်ခြေသခင် အရှင်ထာဝရဘုရား မိန့်တော်မူ၏။

16တစ်ဖန် ထာဝရဘုရား မိန့်တော်မူသည်ကား၊ ဇိအုန်သတို့သမီးတို့သည် စိတ်မြင့်၍၊ မိမိလည်ပင်းကို ပြလျက်၊ မျက်စိလော်လည်လျက်၊ ခြေချင်းတန်ဆာမြည်လျက်၊ စိပ်စိပ်လှမ်းသွားတတ်သောကြောင့်၊ 17ဘုရားရှင်သည် ဇိအုန်သတို့သမီးတို့ကို ခေါင်းတုံးဖြစ်စေတော်မူမည်။ ထာဝရဘုရားသည် သူတို့မှအဝတ်ကိုပယ်၍ အရှက်ခွဲတော်မူမည်။ 18ထိုကာလ၌ ဘုရားရှင်သည် သူတို့ခြေချင်း၊ ဇာဦးထုပ်၊ လဆန်းရုပ်လည်ဆွဲ၊ 19နားသန်သီး၊ လက်ကောက်၊ မျက်နှာဖုံး၊ 20ပေါင်းသရဖူ၊ ရွှေခြေကြိုး၊ ခါးပန်း၊ နှာခေါင်းဘူး၊ 21လက်ဖွဲ့၊ လက်စွပ်၊ နှာဆွဲ၊ 22ရွှေဇာအင်္ကျီ၊ တဘက်၊ ခေါင်းခြုံ၊ လွယ်အိတ်၊ 23လွယ်မှန်၊ အတွင်းအင်္ကျီ၊ ဦးရစ်၊ တင်းတိမ်တို့ကို ပယ်ရှင်းတော်မူမည်။ 24မွှေးသောအနံ့အရာ၌ ပုပ်စပ်သောအနံ့၊ ခါးစည်းအရာ၌ ခါးကြိုး၊ ကျစ်သောဆံပင်အရာ၌ ခေါင်းတုံးခြင်း၊ ရင်စည်းတန်ဆာအရာ၌ လျှော်တေကြိုး၊ လှသောအဆင်းအရာ၌ သံပူထိုးချက်ရာ ဖြစ်ရလိမ့်မည်။ 25သင်၏လူတို့သည် ဓားလက်နက်ဖြင့်လည်းကောင်း၊ သင်၏သူရဲတို့သည် စစ်တိုက်သဖြင့်လည်းကောင်း လဲ၍ ဆုံးရှုံးကြလိမ့်မည်။ 26သူ၏တံခါးတို့သည် ငိုကြွေးမြည်တမ်း၍၊

ဟေရှာယအနာဂတ္တိကျမ်း - ၃ (အနက်ဖွင့်)

၃:၁–၅ (၂:၂၀)တွင် ထိုနေ့ရက်၌ လူများ မှီခိုကိုးစားကြသော ရုပ်တုဆင်းတု ဘုရားများကို ဘုရားသခင်က ဖယ်ရှားပစ်မည်ဟု ဆိုသည်။ မုန့်နှင့်ရေ မရှိခြင်းသည် အစာရေစာခေါင်းပါးမည့်အကြောင်း ဖြစ်သော်လည်း ဤနေရာတွင် ထိုသူများ၏ မှီခိုကိုးကွယ်ရာများကို ဆိုလိုကြောင်း၊ နောက်ပိုင်းကျမ်းပိုဒ်များဖြင့် နားလည်ရသည်။ တစ်သက်လုံး ကိုးကွယ်လာကြသော ဘုရားများသည် အတုအယောင်များ ဖြစ်ကြောင်း သိရှိသွားကြမည်။ ဖိနှိပ်စက်ခြင်း၊ အာဏာရှင်စနစ်၊ ကိုယ်ချင်းစာကင်းမဲ့မှု၊ မထီလေးစားမှု၊ အထင်မြင်သေးမှုများ ဆိုးရွားလာမည်။

၃:၆–၈ ထိုအခါ အနူတောမှာ လူချောများ ထွက်ပေါ်လာကြမည်။ အနှစ်မရှိသော တောမှာ ကြက်ဆူပင်များ မင်းမူလာကြမည်။ သို့သော် ရေရှည်မခံ။ ခဏတဖြုတ်သာ ဖြစ်မည်။ ထိုသူများကိုယ်တိုင်၌ စားစရာဝတ်စရာ၊ နေစရာ အလုံအလောက် မရှိကြ။ မည်သူကိုမှ အပြစ်တင်စရာမှရှိ။ မိမိကိုယ်ကိုသာ အပြစ်တင်ရမည်ဟု ဟေရှာယက မိန့်မှာသည်။

၃:၉–၁၂ အပိုဒ်ငယ်(၉)မှ စ၍ အမင်္ဂလာ(၈)ပါး အတွဲလိုက် ရှင်းပြထားသည်။ ဤအခန်းတွင် (၂)ခု ရှင်းပြထားသည်။ ပထမအချက်မှာ အရှက်မရှိသောမျက်နှာထား ဖြစ်သည်။ ဒုတိယအချက်မှာ ဆိုးညစ်အကျင့်ယုတ်ခြင်း ဖြစ်သည်။ သို့သော် လည်း ဖြောင့်မတ်သော လက်တစ်ဆုတ် အကြွင်းကျန်သူများအတွက် ကောင်းကြီးမင်္ဂလာ ကျန်ရှိနေပါသည်။ ထိုသို့ အပြစ်ဒုစရိုက် ကျူးလွန်ရခြင်း အကြောင်းရင်းတစ်ရပ်မှာ ပတ်ဝန်းကျင်အဖြစ်အပျက်နှင့် မရင့်ကျက်မှု (ကလေးသူငယ်များ)၊ အား နည်းမှု (မိန်းမများ)နှင့် လိမ်လည်လှည့်ဖျားသူများကြောင့် ဖြစ်သည်။

၃:၁၃–၁၅ ဤကျမ်းပိုဒ်တွင် ဘုရားသခင်က ဣသရေလတို့၏ အမှုများကြားနာဖို့ ဆင့်ခေါ်သည်။ သာတူညီမျှ စွပ်စွဲချက် တင်သည်။ အုပ်စိုးသူမင်းများသည် မရှိဆင်းရဲသားများကို ခေါင်းပုံဖြတ် ဂုပ်သွေးစုပ်၍ ကြွယ်ဝချမ်းသာခြင်း ရှာကြသည်။ (အတင်းအဓမ္မ အနိုင်ကျင့်၊ ဖိနှိပ်ကြသည်။) ထို့ကြောင့် အုပ်စိုးသူ များကို အပြစ်ရှိသည်ဟု စီရင်ဆုံးဖြတ်ထားသည်။

၃:၁၆–၂၄ ဒုတိယစွဲချက်မှာ ယုဒအမျိုးသမီးများ ဖြစ်သည်။ ပညာတတ်လာလျှင် မာနထောင်လွှားလာကြသည်။ ပလွှားဝါကြွားကြသည်။ ဝတ်ကောင်းစားလှနှင့် အဖိုးတန် လက်ဝတ်တန်ဆာများ ဆင်မြန်းကြသည်။ မျက်နှာပေါ်တွင်လည်း အရောင်အမျိုးမျိုးချယ်သလျက်၊ အဖိုးတန်မိတ်ကပ်၊ ဆေးဝါးများချယ်သ သုံးဖြုန်းကြသည်။ တကိုယ်လုံးကိုလည်း ဝင်းလက်တောက်ပြောင်နေအောင် ဝတ်ဆင်ချယ်သကြသည်။ မရှိဆင်းရဲသားများကို ပေးကမ်း စွန့်ကြဲရမည့်အစား သူတို့ကိုယ်ကို နတ်သမီးသဖွယ် ပြင်ဆင်ကြသည်။ အဖိုးတန်လည်ရွဲတန်ဆာများ သီကုန်း၍ ဆံပင်ကိုလည်း ပုံစံအမျိုးမျိုး ပြင်ဆင်ကြသည်။ လှပေ့၊ ဆန်းပေ့များကို ဝတ်ဆင်၍ လူအများအာရုံစိုက်အောင် ဖန်တီးကြသည်။

၃:၂၅–၄:၁ နောက်ရောက်လာမည့် ကပ်ဆိုးမှာ ယောက်ျားသားများ သေမည့်နေ့မှ တပ်ထဲဝင်ကြခြင်း ဖြစ်သည်။ ယောက်ျားရှားကုန်သဖြင့် မိန်းမ(၇) ယောက်ကယောက်ျား တစ်ယောက်ကို လုယက် မြူဆွယ်ကြမည်။ မိမိစရိတ်ဖြင့် လင်သားကိုလုပ်ကျွေးပါမည်။ လင်သားအမည်ခံရုံမျှသာ ခံပေးပါဟု ဒူးထောက် တောင်းပန်ကြမည်။ လင်မရှိသောမိန်းမအဖြစ်ဆိုးမှကူညီကွယ်ကာပါဟုငိုယို ကြမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။