Genesis-2 -

ကမ္ဘာဦးကျမ်း - ၂

1ထိုသို့ ကောင်းကင်မြေကြီးနှင့်တကွ၊ ခပ်သိမ်းသောတန်ဆာတို့သည် ပြီးစီးလျက်ရှိကြ၏။ 2သတ္တမနေ့ရက်ရောက်လျှင်၊ ဘုရားသခင်သည် ဖန်ဆင်းသောအမှုကို လက်စသတ်တော်မူခဲ့ပြီးသည်ဖြစ်၍၊ ဖန်ဆင်းသမျှသော အမူအရာတို့သည် ပြီးစီးပြီးမှ၊ ထိုသတ္တမနေ့၌ ငြိမ်ဝပ်စွာနေတော်မူ၏။ 3ထိုသတ္တမနေ့ကို ဘုရားသခင်သည် ကောင်းချီးပေး၍ သန့်ရှင်းစေတော်မူ၏။ အကြောင်းမူကား၊ ဖန်ဆင်းပြုပြင်တော်မူသော အမှုအရာအလုံးစုံတို့သည် ပြီးစီးသောကြောင့်၊ ထိုနေ့ရက်၌ ငြိမ်ဝပ်စွာနေတော်မူ၏။

ဧဒင်ဥယျာဉ်

4ဤအကြောင်းအရာကား၊ ထာဝရအရှင်ဘုရားသခင်သည် ကောင်းကင်နှင့်မြေကြီးကို ဖန်ဆင်းတော်မူသောနေ့၊ ဖန်ဆင်းရာကာလ၌ ကောင်းကင်နှင့် မြေကြီး၏ မူလအတ္ထုပ္ပတ္တိပေတည်း။ 5မြေ၌ လယ်ယာပျိုးပင်မပေါက်မီ၊ လယ်ယာ၌စပါးပင်မကြီးပွားမီ၊ အပင်ရှိသမျှတို့ကို ဖန်ဆင်းတော်မူ၏။ ထိုအခါ ထာဝရအရှင်ဘုရားသခင်သည် မြေပေါ်၌ မိုးကိုရွာစေတော်မမူသေး။ မြေ၌လုပ်သောလူလည်း မရှိသေးသည်ဖြစ်၍၊ 6မြေမှအခိုးအငွေ့ထွက်သဖြင့် မြေတစ်ပြင်လုံးကို စိုစေလေ၏။

7ထိုနောက်၊ ထာဝရအရှင်ဘုရားသခင်သည် မြေမှုန့်ဖြင့် လူကိုဖန်ဆင်း၍၊ သူ၏နှာခေါင်းထဲသို့ ဇီဝအသက်ကိုမှုတ်တော်မူလျှင်၊ လူသည် အသက်ရှင်သော သတ္တဝါဖြစ်လေ၏။

8ထာဝရအရှင်ဘုရားသခင်သည်လည်း အရှေ့မျက်နှာ၊ ဧဒင်အရပ်၌ဥယျာဉ်ကို စိုက်ပျိုးပြီးလျှင်၊ ဖန်ဆင်းတော်မူသောလူကို ထိုဥယျာဉ်၌ နေရာချတော်မူ၏။ 9ထိုမြေထဲက အဆင်းလှ၍၊ စားဖွယ်ကောင်းသော အပင်အမျိုးမျိုးကို ထာဝရအရှင်ဘုရားသခင် ပေါက်စေတော်မူ၏။ ထိုဥယျာဉ်အလယ်၌ အသက်ပင်လည်းရှိ၏။ ကောင်းမကောင်းကို သိကျွမ်းရာအပင်လည်းရှိ၏။

10ထိုဥယျာဉ်ကို စိုစေလိုသောငှာ မြစ်တစ်မြစ်သည် ဧဒင်အရပ်ထဲကစီးထွက်သဖြင့်၊ ဥယျာဉ်ပြင်မှာ လေးဖြာကွဲ၍ မြစ်မလေးသွယ်ဖြစ်လေ၏။ 11ပထမမြစ်ကား ဖိရှုန်အမည်ရှိ၏။ ထိုမြစ်သည် ရွှေရှိသော ဟာဝိလပြည်နား တစ်လျှောက်လုံးကို စီးသွားလေ၏။ 12ထိုပြည်မှဖြစ်သောရွှေသည် ကောင်းလှ၏။ ဗဓေလသစ်စေးနှင့် ရှဟံကျောက်လည်းရှိ၏။ 13ဒုတိယမြစ်ကား ဂိဟုန်အမည်ရှိ၏။ ထိုမြစ်သည် ကုရှပြည်နားတစ်လျှောက်လုံးကို စီးသွားလေ၏။ 14တတိယမြစ်ကား ဟိဒကေလအမည်ရှိ၏။ ထိုမြစ်သည် အာရှုရိတိုင်း အရှေ့သို့စီးသွားလေ၏။ စတုတ္ထမြစ်ကား ဥဖရတ်အမည်ရှိ၏။

15ထိုအခါ ထာဝရအရှင်ဘုရားသခင်သည် လူကိုယူ၍ ဧဒင်ဥယျာဉ်ကို ပြုစုစောင့်ရှောက်စေခြင်းငှာ ထားတော်မူ၏။ 16ထာဝရအရှင်ဘုရားသခင်ကလည်း၊ ကောင်းမကောင်းကို သိကျွမ်းရာအပင်မှတစ်ပါး၊ ထိုဥယျာဉ်၌ ရှိသမျှသောအပင်တို့၏အသီးကို သင်သည်စားရသောအခွင့်ရှိ၏။ 17ထိုအပင်၏အသီးကိုကား မစားရ။ စားသောနေ့တွင် ဧကန်အမှန်သေရမည်ဟု လူကိုပညတ်ထားတော်မူ၏။

18ထာဝရအရှင်ဘုရားသခင်ကလည်း၊ ယောက်ျားသည် တစ်ယောက်တည်းမနေကောင်း၊ သူနှင့်တော်သော အထောက်အမကို သူ့ဖို့ငါလုပ်ဦးမည်ဟု အကြံရှိတော်မူ၏။ 19ထာဝရအရှင်ဘုရားသခင်သည် မြေတိရစ္ဆာန်တို့နှင့်၊ မိုးကောင်းကင်ငှက်အပေါင်းတို့ကို မြေဖြင့်ဖန်ဆင်းတော်မူပြီးလျှင်၊ လူသည် အဘယ်သို့ခေါ်ဝေါ်သမုတ်မည်ကိုသိခြင်းငှာ၊ လူရှိရာသို့ဆောင်ခဲ့တော်မူ၏။ လူသည်လည်း အသက်ရှင်သောသတ္တဝါအပေါင်းတို့ကို ခေါ်ဝေါ်သမုတ်သည်အတိုင်း၊ နာမည်အသီးအသီးရှိကြ၏။ 20ထိုသို့လူသည် သားယဉ်အပေါင်းတို့ကိုလည်းကောင်း၊ မိုးကောင်းကင်ငှက် အပေါင်းတို့ကိုလည်းကောင်း၊ သားရဲအပေါင်းတို့ကိုလည်းကောင်း၊ အမည်ပေး၍မှည့်လေ၏။ သို့သော်လည်း လူနှင့်တော်သောအထောက်အမ မပေါ်မရှိသေး။

21ထိုအခါ ထာဝရအရှင်ဘုရားသခင်သည် လူကိုကြီးသောအိပ်ခြင်းဖြင့် အိပ်စေတော်မူ၍၊ လူသည် အိပ်ပျော်စဉ်၊ နံရိုးတစ်ချောင်းကို ဘုရားသခင်ထုတ်ပြီးလျှင်၊ ထိုအရိုးအစားအသားကို စေ့စပ်စေတော်မူ၏။ 22ထာဝရအရှင်ဘုရားသခင်သည် လူထဲကထုတ်သောနံရိုးဖြင့် လူမိန်းမကိုဖန်ဆင်း၍ လူရှိရာသို့ဆောင်ခဲ့တော်မူ၏။ 23လူကလည်း၊ ယခု ဤသူသည် ငါ့အရိုးထဲကအရိုး၊ ငါ့အသားထဲကအသားဖြစ်၏။ လူထဲကထုတ်သောကြောင့် သူ့ကိုလူမိန်းမဟု ခေါ်ဝေါ်အပ်သည်ဟု ဆိုလေ၏။ 24ထိုအကြောင်းကြောင့် ယောက်ျားသည် ကိုယ်မိဘကိုစွန့်၍၊ ကိုယ်ခင်ပွန်း၌မှီဝဲသဖြင့်၊ ထိုသူတို့သည် တစ်သားတစ်ကိုယ်တည်း ဖြစ်ရလိမ့်မည်။ 25ထိုသူလင်မယားနှစ်ဦးတို့သည် အဝတ်မဝတ်ဘဲနေ၍၊ ရှက်ကြောက်ခြင်းနှင့်ကင်းလွတ်ကြ၏။

ကမ္ဘာဦးကျမ်း - ၂ (အနက်ဖွင့်)

၂:၁–၃ (၆)ရက်လုံးလုံး ဖန်ဆင်းပြီးသောအခါ သတ္တမနေ့ရက်တွင် ဘုရားသခင်သည် ငြိမ်ဝပ်စွာ နေသည်။ ငြိမ်ဝပ်စွာနေသည် ဟုဆိုရာတွင် မောပန်းနွမ်းနယ်သောကြောင့် အပန်းဖြေခြင်းမဟုတ်။ လုပ်ဆောင်စရာ ပြီးစီးသွားသောကြောင့် ကျေနပ်နေခြင်းဖြစ်သည်။ ထိုစဉ်ကာလတွင် ဥပုသ်နေ့ စောင့်ထိန်းကြရန် ဘုရားသခင်က လူအားပညတ်မထားပါ။ (၇)ရက်တွင် တစ်ရက်အနားယူရမည့်အကြောင်း ဥပုသ်စောင့်ရမည့် အကြောင်းသာပြောသည်။

၂:၄–၆ ဘုရားသခင်၏ နာမတော်သည် (Jehovah [Yahweh] Elohim) ဖြစ်သည်ဟု အပိုဒ်ငယ် ၄ တွင် ပထမဦးဆုံးအကြိမ်ဖော်ပြသည်ဟု အပိုဒ်ငယ် ၄ တွင် ပထမဦးဆုံးအကြိမ် ဖော်ပြသည်။ လူသားဖန်ဆင်း ပြီးသောအခါမှသာလျှင် နာမတော်ဖော်ပြသည် (၁:၂၇)။ Elohim က ဘုရားဆိုသည်မှာ ဖန်ဆင်းရှင် ဘုရားသခင်ကို ဆိုလိုသည်။ Jehovah ဆိုသည်မှာ လူသားနှင့် ဆက်နွယ်သော ဘုရားသခင်ဟု အဒိပ္ပါယ်ရသည်။ အချို့ကျမ်းစာ ဝေဖန်ရေးသမားများက ဤအမည်နာမနှစ်ခု အဓိပ္ပါယ်ကွဲပြားချက်အပေါ် မူတည်၍ အမျိုးမျိုးပြောချင်ကြသည်။ ထိုအကြောင်းကို ဘုရားသခင်ကိုယ်တိုင်သာ သဘာဝကျအောင် ရှင်းပြနိုင်မည်။

အပိုဒ်ငယ်တွင်ပါရှိသည့် ဤအကြောင်းအရာကား ဆိုသည်မှာ အခန်း(၁)၌ ပါရှိသည့် အစအဦး၌ ဟူသောစာသားမှစ၍ လက်ရှိကျမ်းပိုဒ်အထိကို ဆိုလိုသည်။ အခန်းငယ် ၅ ကို “မြေကြီးပေါ်နှင့် လယ်ကွင်းပြင် များအား ထွန်ယက်ခြင်းမပြုကြမီ၊ မည့်သည့်အပင်မှမပေါက်“ ဟုဆိုရသည်။ သို၌သော် ၁:၁၀ တွင် ကုန်းမြေပေါ်ထွန်းစေကြောင်းတွေ့ရသည်။ ထိုကုန်းမြေပေါ်သို့ မိုးရွာသွန်းခြင်း မရှိသေး။ မြေကြီးအစိုဓာတ် ပြန် စေကြောင်း တွေ့ရသည်။

၂:၇ လူဖန်ဆင်းခြင်းအကြောင်းကို ပိုမိုပြည့်စုံစွာရှင်းပြသည်။ ဘုရားသခင်သည် မြေမှုန့်ဖြင့် လူကို ဖန်ဆင်း၍ အသက်သွင်းလိုက်သဖြင့် အသက်ရှင်သော လူသတ္တဝါ အာဒံ ပေါ်ထွန်းလာသည်။ အာဒံဆိုသည်မှာ (အနီရောင် သို့မဟုတ် မြေကြီး) ဟုအဓိပ္ပါယ်ရ၍ မြေနီဖြင့် ပြုလုပ်ထားသောကြောင့်ဖြစ်သည်။

၂:၈–၁၄ ဘုရားသခင်က အရှေကဘက်မျက်နှာတွင် ဧဒင်ဥယျာဉ်စိုက်ပျိုးထားသည်။ ပါလက်စတိုင်း ဒေသအရှေ့ဘက်ဖြစ်နိုင်သည်။ မက်ဆိုပိုတေးမီးယားဒေသအနီး ဟိဒကေလမြစ် (တိုက်ဂရစ်)နှင့် ဥဖရတ်မြစ် နားတဝိုက်ဖြစ်သည်။ ကောင်းမကောင်းကို သိကျွမ်းရာ အသက်ပင် ဆိုသည်မှာ လူ၏ နာခံခြင်းကို ဆန်းစစ်ရာဖြစ်သည်။ ထိုသစ်ပင်၏ အသီးကိုစားလျှင်အပြစ်ဖြစ်သည်။ မနာခံခြင်းဖြစ်သည်။ တနည်းအားဖြင့် ထိုအသီးသည် ယနေ့ခေတ်ကာလတိုင်အောင် လူသားများထံ၌ရှိနေသည်။

၂:၁၅–၂၃ ပညတ်တော်စကားကို မနာခံချိုးဖောက်ခြင်း၏ အပြစ်ဒစ်သည် သေခြင်း (ငယ် ၁၇) ဖြစ်သည်။ ဝိညာဉ်နှင့် ရုပ်ခန္ဓာကိုယ် နှစ်ခုစလုံး ချက်ချင်းသေသည်။ ဖန်ဆင်းခြင်းတွင် ငှက်များနှင့် တိရစ္ဆာန်များ ဖိုမစုံတွဲခဲ့သကဲ့သို့ အာဒံတွင်လည်း အဖော်လိုလာသည်။ အထောက်အမ လိုအပ်သည်။ ထို့ကြောင့် သွေးနီးစပ်အောင် အာဒံအိပ်ပျော်နေခိုက် နံရိုးတစ်ချောင်း ဆွဲထုတ်၍ သတို့သမီး ဖန်ဆင်းပေး လိုက်သည်။ ထိုကဲ့သို့ပင် ခရစ်တော်သည်လည်း ခရစ်တော်၏ သတို့သမီးအတွက် နံရိုးမှသွေးမြေကျစေသည်။ မိန်းမအား ဖန်ဆင်းရာတွင် အာဒံ၏ ဦးခေါင်းမှမယူ၊ ခြေထောက်မှမလှီး၊ နှလုံးသားနှင့် နီးစပ်သော နေရာမှ အခိုင်မာဆုံး ခန္ဓာကိုယ် အစိတ်အပိုင်းအရိုးဆွဲထုတ်ဖန်ဆင်းပါသည်။ သို့ဖြင့် ယောက်ျားနှင့် မိန်းမ လင်မယားသည် နှလုံးသားချင်းနီးစပ်သည်ဟု နားလည်ရသည်။

အပြစ်ဒုစရိုက်မဝင်ရောက်မှီ ဘုရားသခင်က ယောက်ျားအား ဦးစီးဦးဆောင်မှုတာဝန် အပ်နှင်းထားသည်။ ပေါလုကလည်း ထိုကျမ်းချက်ကို အပြည့်အဝထောက်ခံထားသည်။ (ယောက်ျားကို ဦးစွာ ဖန်ဆင်းသည်) မိန်းမဖန်ဆင်းရခြင်း ရည်ရွယ်ချက်မှာ ယောက်ျားအား အထောက်အမပြုရန်ဖြစ်သည် (၁ကော ၁၁:၈-၉)။ သို့သော် အပြစ်ဝင်ရောက်ရာတွင်မူ ဧဝက ဦးဆောင်မှုသည် အပြင်ဘက်သို့သာ ခြေသွက်ကြသည်။ ထိုသို့ဖြင့် လူ့လောကထဲသို့ အပြစ်ဒုစရိုက် ဝင်ရောက်လာသည်။ ယောက်ျားကို ဦးစီးဦးဆောင်မှု ခေါင်းဆောင်နေရာ ပေးထားပါသည်။

အပိုဒ်ငယ် (၁၉)သည် အင်္ဂလိပ်ကျမ်းမူတွင် perfect tense ၅ သုံးထားသဖြင့် ပိုမိုထင်ရှားသည်။ “ထာဝရအရှင်ဘုရားသခင်သည်…ဖန်ဆင်းတော်မူပြီးလျှင်“ ဆိုသည်။ လူမဖန်ဆင်းမှီ အခြားသတ္တဝါများကို အရင်ဖန်ဆင်းသည်။

၂:၂၄ အပိုဒ်ငယ် (၂၄)သည် ဘုရားသခင်က တလင်တမယားစနစ်ပြဋ္ဌာန်းသည့်အကြောင်းဖြစ်သည်။ အိမ်ထောင်ပြုခြင်းသည် ဘုရားသခင်၏အလိုတော်နှင့် ညီ၍ သန့်ရှင်းစင်ကြယ်ရသည်။ အကြင်လင်မယား၏ ဘဝဖွဲ့နှောင်မှုသည် သခင်ယေရှုနှင့်အသင်းတော်ဆက်နွယ်ပုံမျိုးဖြစ်သည်။ သန့်ရှင်းစင်ကြယ်၍ ခိုင်မြဲသည်။ သေခြင်းမှတပါး မည်သည့်အရာမမှ မပြတ်တောက်စေရ။ (ဧ ၅:၂၂-၃၂ ကိုကြည့်)

၂:၂၅ အာဒံနှင့်ဧဝသည် ဧဒင်ဥယျာဉ်ထဲတွင်ဘဲနေကြသော်လည်း အရှက်အကြောက်မရှိကြ။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။