Ezekiel -47 -

ယေဇကျေလအနာဂတ္တိကျမ်း - ၄၇

ဗိမာန်တော်မှစီးသောရေ

1ထိုနောက်မှ အိမ်တော်တံခါးသို့ တစ်ဖန်ငါ့ကိုဆောင်ခဲ့၍၊ တံခါးခုံအောက်မှာ အရှေ့ဘက်သို့ထွက်သော ရေကိုငါမြင်၏။ အိမ်တော်ဦးသည် အရှေ့သို့မျက်နှာပြု၍၊ ရေသည် အိမ်တော်တံခါးခုံလက်ယာအောက်၊ ယဇ်ပလ္လင်တော် တောင်ဘက်မှ စီးသွားလေ၏။ 2တစ်ဖန် မြောက်တံခါးလမ်းဖြင့် ငါ့ကိုထုတ်၍ ပြင်၌ဝိုင်းသွားလျက်၊ အရှေ့သို့မျက်နှာပြုသော ပြင်တံခါးလမ်းဝသို့ ရောက်သောအခါ၊ လက်ယာဘက်မှစီးသော ရေကိုငါမြင်၏။ 3ကြိုးကိုကိုင်သောသူသည် အရှေ့သို့သွားပြီးလျှင်၊ အတောင်တစ်တောင် စေ့အောင်တိုင်း၍ ငါ့ကို ရေကူးစေ၏။ ရေသည် ဖမျက်သို့ မီလေ၏။ 4တစ်ဖန် အတောင်တစ်ထောင်စေ့အောင် တိုင်း၍ ရေးကူးစေပြန်လျှင်၊ ရေသည် ဒူးကိုမီလေ၏။ တစ်ဖန် အတောင်တစ်ထောင်စေ့အောင် တိုင်း၍ ကူးစေပြန်လျှင်၊ ရေသည်ခါးကို မီလေ၏။ 5တစ်ဖန် အတောင်တစ်ထောင်စေ့အောင် တိုင်းသောအခါ မကူးနိုင်သောမြစ် ဖြစ်လေ၏။ ရေထသောကြောင့် နင်း၍မကူးနိုင်၊ ခြေထောက်၍ မမီဘဲ ကူးရသောမြစ်ဖြစ်၏။ 6ထိုသူက၊ အချင်းလူသား၊ ဤအရာကို မြင်သည်မဟုတ်လောဟု ပြောပြီးမှ တစ်ဖန်ငါ့ကိုခေါ်သွား၍ မြစ်နားသို့ပြန်စေ၏။ 7ပြန်စဉ်အခါ မြစ်နားနှစ်ဖက်၌ များစွာသော အပင်တို့ကို ငါမြင်၏။ 8ထိုသူကလည်း၊ ဤရေသည် အရှေ့သို့စီး၍ တောကိုလျှောက်ပြီးမှ၊ အိုင်ထဲသို့ဝင်တတ်သောအားဖြင့် အိုင်ရေသည် ချိုလိမ့်မည်။ 9အသက်ရှင်၍ လှုပ်ရှားတတ်သော သတ္တဝါအမျိုးမျိုးတို့သည် ထိုမြစ်ရေ ရောက်သမျှသော အရပ်တို့၌ အသက်ရှင်၍၊ အလွန်များစွာသော ငါးတို့လည်း ရှိကြလိမ့်မည်။ ထိုမြစ်ရေသည် ချိုသောကြောင့်၊ ရောက်သမျှသောအရပ်တို့၌ သတ္တဝါအမျိုးမျိုးတို့သည် အသက်ရှင်ကြလိမ့်မည်။ 10အိုင်နားမှာ တံငါတို့သည်ရပ်၍၊ အင်္ဂေဒိရွာမှစ၍ ဧနေဂလိမ်ရွာတိုင်အောင် ပိုက်ကွန်ဖြန့်ချရာအရပ် ဖြစ်လိမ့်မည်။ ငါးအမျိုးမျိုးတို့သည် မဟာပင်လယ်ငါးကဲ့သို့ အလွန်များပြားကြလိမ့်မည်။ 11ရွှံ့ဗွက်ရည်နှင့် ရွှံ့အိုင်ရေမူကား မချိုရ၊ အစဉ်ငန်ရလိမ့်မည်။ 12မြစ်ကမ်းနားနှစ်ဖက်၌ စားစရာကောင်းသော အပင်အမျိုးမျိုး ပေါက်ကြလိမ့်မည်။ အရွက်လည်း မညှိုးမနွမ်းရ။ အသီးလည်း မပြတ်ရ။ လတိုင်းအစဉ် နုသောအသီးကို သီးလိမ့်မည်။ အကြောင်းမူကား၊ သန့်ရှင်းရာဌာနထဲကထွက်သတည်း။ အသီးသည် စားစရာဖို့ဖြစ်၏။ အရွက်သည် အနာရောဂါငြိမ်းစရာဖို့ ဖြစ်သည်ဟု ငါ့အားပြောဆို၏။

မြေအပိုင်းအခြား

13အရှင်ထာဝရဘုရား မိန့်တော်မူသည်အတိုင်း၊ ဣသရေလအမျိုး တစ်ဆယ်နှစ်မျိုးအမွေခံရသော မြေအပိုင်းအခြားမူကား၊ ယောသပ်သည် မြေအပိုင်းအခြား နှစ်ခုကိုယူရမည်။ 14ဘိုးဘေးတို့အား ငါကျိန်ဆိုသည်အတိုင်း ငါပေးရသောထိုမြေသည် သင်တို့အမွေဖြစ်၍၊ သင်တို့သည် အချင်းချင်းအမွေခံရကြမည်။ 15မြေမြောက်ဘက်အပိုင်းအခြားသည် မဟာပင်လယ် တစ်ဖက်တစ်ချက်၊ ဟေသလုန်လမ်း၊ ဇေဒဒ်လမ်းသို့လိုက်လျက်၊ 16ဟာမတ်မြို့နှင့် ဗေရောသာမြို့ကိုလည်းကောင်း၊ ဒမာသက်နယ်နှင့် ဟာမတ်နယ်စပ်ကြားမှာ သိဗရိမ်မြို့ကိုလည်းကောင်း၊ ဟောရန်မြို့အနားမှာ၊ ဟာဇာဟတ္တိကုန်းမြို့ကိုလည်းကောင်းဝိုင်း၍၊ 17တစ်ဖန် ပင်လယ်နှင့်ကွာပြီးမှ ဒမာသက်နယ်အနား၌ ဟာဇရေနန်မြို့၊ မြောက်ဘက်၌ ဇိဖြုန်မြို့၊ ဟာမတ်မြို့ပါရမည်။ ဤရွေ့ကား မြောက်ဘက် အပိုင်းအခြားဖြစ်သတည်း။ 18အရှေ့ဘက်အပိုင်းအခြားသည် ဟောရန်မြို့၊ ဒမာသက်မြို့၊ ဂိလဒ်ပြည်၊ ယော်ဒန်မြစ်နား ဣသရေလပြည်နယ်ကို လျှောက်၍၊ အရှေ့ပင်လယ်၌ ဆုံးရမည်။ ဤရွေ့ကား၊ အရှေ့ဘက်အပိုင်းအခြား ဖြစ်သတည်း။ 19တောင်ဘက်အပိုင်းအခြားသည် တာမာမြို့မှစ၍ ကာဒေရှမြို့၊ မေရိဘရေတိုင်အောင်လည်းကောင်း၊ မဟာပင်လယ်ထဲသို့ ဝင်သော မြစ်တိုင်အောင်လည်းကောင်း လျှောက်သွားရမည်။ ဤရွေ့ကား၊ တောင်ဘက်အပိုင်းအခြား ဖြစ်သတည်း။ 20အနောက်ဘက်၌ မဟာပင်လယ်သည် တောင်ဘက်မှစ၍၊ ဟာမတ်မြို့ တစ်ဖက်တစ်ချက်တိုင်အောင် ပိုင်းခြားလျက်ရှိရမည်။ ဤရွေ့ကား၊ အနောက်ဘက် အပိုင်းအခြားဖြစ်သတည်း။

21ထိုမြေကို ဣသရေလအမျိုး အသီးအသီးတို့အားဝေရမည်။ 22အမျိုးသားချင်း အမွေခံဖို့လည်းကောင်း၊ သင်တို့တွင်နေ၍ သားသမီးဖွားမြင်သော တစ်ပါးအမျိုးသားချင်း အမွေခံဖို့လည်းကောင်း စာရေးတံချ၍ မြေကိုဝေရမည်။ ထိုတစ်ပါးအမျိုးသားတို့ကို ပြည်၌ဖွားမြင်သော ဣသရေလအမျိုးသားကဲ့သို့ မှတ်ရမည်။ သူတို့သည် ဣသရေလအမျိုးသားတို့နှင့် အတူ မြေကို အမွေခံရကြလိမ့်မည်။ 23တစ်ပါးအမျိုးသားနေလေရာရာခရိုင်၌ သူ့အမွေခံစရာမြေကို ပေးရမည်ဟု အရှင်ထာဝရဘုရား မိန့်တော်မူ၏။

ယေဇကျေလအနာဂတ္တိကျမ်း - ၄၇ (အနက်ဖွင့်)

(ဃ) အနှစ်တထောင်တိုင်းပြည် (အခန်း ၄၇၊၄၈)

(၁) အနာရောဂါငြိမ်းစေသောစမ်းရေတွင်း (၄၇:၁−၁၂)

ဗိမာန်တော်တံခါးခုံတွင် ဖြစ်ဖျားခံ၍ စီးဆင်းသွားသော မြစ်တစင်းကို ယေဇကျေလ ရူပါရုံမြင်ရ၏။ ယဇ်ပလ္လင်ကိုကျော်ဖြတ်၍ အရှေ့တံခါးပေါက်၏ တောင်ဘက်အပေါက် မှ ပင်လယ်သေထဲသို့ စီးဝင်သည်။ ထိုမြစ်ရေသည် အနာရောဂါများကို ငြိမ်းစေသည်။ မြစ်ရေထဲတွင် ငါးများ အပြည့်အနှက် ရှိသည်။ ထိုအကြောင်းကို Yates က ဤသို့ဆိုသည်။

အသက်စမ်းရေသည် ဓမ္မဟောင်း၏ ကျက်သရေမင်္ဂလာဖြစ်သည်။ သဲကန္တာရနှင့် ဖုန်းဆိုးတောတွင် အသက်ရှင်မှုအတွက် ရေမရှိမဖြစ် လိုအပ်သည်။ ယေဇကျေလရူပါရုံမြင်ရသော အသက်စမ်းရေမြစ်နားမှာ ခြောက်သွေ့သောအရာဘဒေသထဲစီးဝင်သည်။ ထိုမြစ်သည် နက်သထက်နက်လာပြီး ၎င်းစီးဆင်းရာ လမ်းတစ်လျှောက်လုံးအား၊ အသက်ဇိဝ၊ ကျန်းမာခြင်းနှင့် အသီးအနှံ့များကို ပေါကြွယ်စွာ ဖြစ်ထွန်းစေသည်။ အသက်ရှင်မှုလိုအပ်ချက်တို့ အတွက်နတ်ဆေးသြသဓဖြစ်သည်။ သခင်ယေရှုက ရေတွင်းနားမှာ ရှမာရိအမျိုးသမီးသို့ မြွက်ဟသော ဒေသနာပါအသက်စမ်းရေ မျိုးဖြစ်သည်။ (ဆာ၊၁: ၃။၄၆:၄။ ယောလ၊၃:၁၈။ ဇာ ၁၄း၈။ ယော၊၄:၇−၂၅။ ၇:၃၈။ ဗျာ၊၁၂:၁−၂ တို့နှင့်ယှဉ်ဖတ်ပါ)။၄၁

ထိုစမ်းရေတွင်း (ပထဝင်အနေအထားအရ မြစ်)မှာ ကောင်းကြီးမင်္ဂလာသယ်ဆောင်ခြင်းနှင့် ကျယ်ပြန့်ပျံ့နှံ့သည့် အသွင်သဏ္ဍာန်ဆောင်လျက် ပြီးပြည့်စုံခြင်းမရှိသေး(ငယ်၁၁) သော်လည်း ခရစ်တော်၏ အနှစ်တစ်ထောင်အုပ်စိုးခြင်း− မိလေနိကာလ၌ အဆက်မပြတ်တသွင်သွင်စီးဆင်းလိမ့်မည်။ ဘုရားသခင်သည် အသက်စမ်းရေထွက် မြစ်ဖျားခံရာဗိမာန်တော်၌ ကိန်းဝပ်သဖြင့် ထိုမြစ်ရေသည် အရပ်ရပ်ဒေသအသီးသီးသို့ ကောင်းချီးမဂ်လာ အပြည့်အဝ သယ်ဆောင်သွားလိမ့်မည်။ ယနေ့ဘုရားသခင်သည် ကျွန်ုပ်တို့ခန္ဓာကိုယ်တည်းဟူသော ဗိမာန်တော်တွင် ကိန်းဝပ်လျက် (၁‌ေကာ ၆:၁၉)၊ ကောင်းမင်္ဂလာတည်းဟူသောအသက်စမ်းရေကို တပါးသူများထံ လျှံထွက်စီးဆင်း သယ်ဆောင်သွားသော အသက်စမ်းရေတွင်း ဖြစ်စေမည်ဖြစ်သည် (ယော၊ ၇:၃၇−၃၈)။ “သန့်ရှင်းသောဝိညာဉ်တော်နှင့် ပြည့်ဝသူ၏အသက်တာသည် ထိတွေ့ဆက်ဆံမိသော အခြားသူများ၏ အသက်တာအား ဘုရားသခင်အတွက် တစုံရာ ဖြစ်ပေါ်စေလိမ့်မည်ဖြစ်သည်။” ဤစကားကား ယုံကြည်သူများအား ဝိညာဉ်အသီးအပွင့် မည်မျှဖြစ်ထွန်းစေကြောင်း စိမ်ခေါ်နေပါသည်။

အသက်စမ်းရေသည် ၎င်းဖြတ်သန်းစီးဆင်းသွားရာ အရပ်ဒေသတလျှောက်တွင် အသက်ကို ထုတ်လုပ်ဖြစ်ထွန်းစေပါတကား။ သန့်ရှင့်သောဝိညာဉ်တော်၏ အသက်ပေးသော အမှုတော်ကို သရုပ်ဖော်ထားသော အရောင်အသွေးစုံသည့်ပန်းချီ ကားတချပ်သဖွယ်တင့်တယ်လှပေစွ…။

နယ်မြေနယ်နမိတ်များ (၄၇:၁၃−၂၃)

၄၇:၁၃−၂၀ အနာဂတ်နယ်မြေနယ်နိမိတ်နှင့်တိုင်းဒေသအပိုင်း အခြားကိုရှင်းပြသည်။ ဤနေရာတွင် နယ်နိမိတ်များကို ဦးစွာဖော်ပြသည်။

ဤတိုင်းပြည်၏ နယ်နိမိတ်သည် အရှေ့ဘက်၌ ယော်ဒန်မြစ်အထိဖြစ်သည်(ငယ် ၁၈)ဟု ယေဇကျေလကဖော်ပြသည်။ ဤဖော်ပြချက်မှာ မှားယွင်းချွတ်ချော်နေသလော။ စင်စစ်ဤမြေ၏ အရှေ့ဘက်နယ်နိမိတ်သည် ဥဖရတ်မြစ်တိုင် ကျယ်ပြန့်ကြောင်း(က၊ ၁၅:၁၈) ယေဇကျေလ ဧကန်သိထားပေမည်။ သို့သော်လည်းသူက ပါလေတိန(ပါလက်စတိုင်း) တို့၏ မူလဒေသကိုသာ ရည်ညွှန်းဟန်ရှိသည်။ သို့မဟုတ်လျှင် ယောဒန်မြစ်ကို အရှေ့ဘက်နယ်နမိတ်၏ အစိတ်အပိုင်းတစ်ရပ်အဖြစ် ရည်ညွန်းခြင်းဖြစ်ရမည်။ ကျန်အစိတ်အပိုင်းမှာ အရှေ့မြောက်ဘက်ဥဖရတ်မြစ်ထိ ကျယ်ပြန့်လိမ့်မည်ဖြစ်၏။ ဤဒုတိယ ရှင်းပြချက်မှာတာမစားပါ။ ယေဇကျေလသည် အလွန်အသေးစိတ်ကျသူဖြစ်၍ ဥဖရတ်မြစ်အကြောင်း လုံးဝမပါရှိသည်မှာ အလွန်စဉ်းစားဖွယ် ကောင်းသော အချက်ဖြစ်သည်။

၄၇:၂၁−၂၃ ထိုမြေကို ဣသရေလမျိုးနွယ်များ အသီးသီးမဲနှိုက်ဝေမျှယူကြရမည်။ ဣသရေလသွေးနှောသူများလည်း အမွေခံကြရသည်။ တစိမ်းတရံစာတပါးအမျိုးသားများကိုလည်း အမွေခံအဖြစ်မှ ဖယ်ရှားမထားပါ။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။