၂။ ခရစ်တော်ကြွလာအံ့ဆဲကာလတွင် ယုံကြည်သူများ၏ တာဝန် (အခန်း ၃၊၄)

(က) ယုံကြည်သူ၏အသက်တာသစ်၊ အဟောင်းကိုချွတ်၍ အသစ်ဆင်မြန်းခြင်း (၃:၁–၁၇)

          ၃:၁ ခရစ်တော်နှင့်အတူသေခြင်းမှ ရှင်ပြန်ထမြောက်ကြပြီးဖြစ်၍ ဘုရားသခင်၏ လက်က်ျာတော်ဘက်၌ ခရစ်တော်ထိုင်လျှက် နေတော်မူရာကောင်းကင်ဘုံ၌ ရှိသောအရာတို့ကို လိုချင်တောင့်တကြလော့။

          အခန်း(၂)တွင် သင်ပြပြီးသည့်အတိုင်း ယုံကြည်သူများသည် ခရစ်တော်နှင့်အတူ သင်္ဂြိုဟ်ခြင်းခံရ၍ ခရစ်တော်နှင့် အတူ သေခြင်းမှထမြောက်ကြသူများ ဖြစ်သည်။ ဝိညာဉ်ရေးရာဖြင့်ဆိုလျှင် လောကအရာများကို စွန့်ခွာနှုတ်ဆက်ခြင်း ဖြစ်သည်။ အသစ်သောအသက်တာ၌ ရှင်သန်ခြင်းသည် ယေရှုခရစ်တော်၌ အသက်ရှင်ခြင်းဖြစ်သည်။ အဘယ့်ကြောင့်ဆို သော် ခရစ်တော်နှင့်အတူထမြောက်ကြသောကြောင့် အထက်အရာကို မျှော်လင့်တောင့်တကြရသည်။ ယခုကာလတွင် လူ့လောက၌ နေထိုင်ရသေးသော်လည်း ကောင်းကင်လမ်းကို လျှောက်လှမ်းနေသူများ ဖြစ်သည်။

၃:၂ ခရစ်ယာန်များသည် လောကအရာများ၌ မွေ့လျော်ခြင်းမရှိရပါ။ လူ့ဇာတိမျက်စိဖြင့် မကြည့်ရပါ။ ဘုရားသခင် အတွက် ထာဝရကာလတည်တံ့မည့်အရာများကိုသာ ရှာဖွေရသည်။ Vincent  က အပိုဒ်ငယ်(၁)သည် ရှာဖွေခြင်းဖြစ်၍ အပိုဒ်ငယ်(၂)သည် စွဲလန်းခြင်းဖြစ်သည်ဟု ဆိုထားသည်။ စိတ်စွဲလန်းခြင်းကို (ဖိ ၃:၁၉)တွင် ”သူတို့၏ ဘုရားကား မိမိတို့ဝမ်းပေတည်း” ဟုဆိုထားသည်။ A.T. Roberscon ကမူ ”နှစ်ခြင်းမင်္ဂလာခံယူသော အသက်တာဆိုသည်မှာ ကောင်းကင်နိုင်ငံရှာဖွေခြင်းနှင့် ထိုကောင်းကင်နိုင်ငံအကြောင်းကို တွေးတောခြင်း ဖြစ်သည်။ သူ့ခြေထောက်သည် မြေကြီး ပေါ်တွင်ရှိ၍ ခေါင်းသည် ကြယ်များနှင့် အတူရှိသည်။ လူ့လောကတွင် ကောင်းကင်နိုင်ငံသားဘဝဖြင့် လာရောက်နေထိုင်ခြင်း ဖြစ်သည်” ဟုဆိုသည်။

ဒုတိယကမ္ဘာစစ်ကာလအတွင်းတွင် ခရစ်ယာန်လူငယ်တစ်ဦးက ဤသို့ပြောဘူးသည်။ ”ငါတို့ဗုံးကြဲလေယာဉ်သည် မနေ့က ရန်သူမြို့များကို တဖန် ဗုံးကြဲသည်” ဟုဆိုရာ ယုံကြည်သူတစ်ဦးက ”ဘုရားသခင်၏အသင်းတော် ဗုံးကြဲခံရကြောင်း တော့ မသိရပါလား” ဟုဆိုသည်။ ထိုသူသည် မြို့ပြမြေရွာ မိသားစုများထက် ဝိညာဉ်ရေးရာကို ဦးစားပေးသူဖြစ်ကြောင်း ထင်ရှားသည်။

လောကသားများနေထိုင်ပုံဘဝကို F.B. Hole  က ဤသို့ရှင်းပြထားသည်။

ခရစ်တော်၌ တည်ကြောင်း အထောက်အထားပြစရာ ကိုယ်တော်နှင့်အတူ ရှင်ပြန်ထမြောက်ခြင်းဖြစ်သည်။ ပထမ အကျိုးသက်ရောက်မှု လူ့လောကဘာသာရေးဉာဏ်ပညာမှ လွတ်မြောက်ခြင်းဖြစ်သည်။ နောက်တချက်မှာ ဘုရားသခင်၏ နိုင်ငံတော်ထဲသို့ ပို့ဆောင်ခြင်းဖြစ်သည်။ ဤအခန်း(၃)၏ ပထမပိုင်းအခန်းငယ်(၄)ခုသည် ကျယ်ပြန့်သောကောင်းကြီးမင်္ဂလာများ မြည်းစမ်းခြင်းဖြစ်သည်။၁၈

၃:၃ ခရစ်ယာန်များသေလွန်ခြင်းသည် အခြားတနေရာတွင် နေရာယူခြင်းဖြစ်သည်ဟု ပေါလုကဆိုသည်။ အဘယ်ကြောင့်ဆိုသော် ယုံကြည်သူများသည် ခရစ်တော်အသေခံခြင်း၌ ပါရှိသူများဖြစ်သည်။ ကိုယ်တော်၌ သေလွန်ကြရန် အလိုတော်ရှိသည်။ ယုံကြည်သူများသည် အပြစ်ဒုစရိုက်အလယ်၌ စုံစမ်းညှဉ်းဆဲခြင်း ခံနေရသောကြောင့် ထိုနေရာကို တမ်းတအပ်သည်။ စိတ်နှလုံးသားထဲ၌ ခရစ်တော်၌သေလွန်ကြောင်း စွဲမှတ်နေရသည်။ ထိုသို့စွဲမှတ်ခြင်းဖြင့် အသက်ရှင် နေလျှင် အသက်တာသည်လည်း သခင်ခရစ်တော်နှင့် ပိုတူပေမည်။ ချွတ်စွပ်မတူနိုင်သော်လည်း ထိုအတိုင်း အသက်ရှင်သန် နေသည်။

သေလွန်သောခရစ်ယာန်များသည် ခရစ်တော်နှင့်အတူ ဘုရားသခင်၌ ဝှက်ထားခြင်းခံရသည်။ လောကသားများသည် မျက်စိဖြင့် မြင်နိုင်သောအရာများကိုသာ ပတ်သက်ဆက်ဆံနိုင်ကြသည်။ ယုံကြည်သူများသည် ယေရှုခရစ်တော်နှင့် ဆက်စပ်နေကြသောကြောင့် ထိုလောကအရာများထက် ကြီးမြတ်သော အရာများကိုလည်း မြင်နိုင်စွမ်းရှိသည်။ ရှေးကံကြမ္မာ နှင့် ယုံကြည်သူများ၏အသက်တာသည် တခြားစီဖြစ်သည်။ ယုံကြည်သူများ၏ အသက်တာကို ခရစ်တော်နှင့်အတူ ဘုရားသခင်၌ သိမ်းထားသည်ဟု ပေါလုကဆိုသည်။ ထို့ကြောင့် လောကသပ္ပရာဏကိစ္စ အထူးသဖြင့် ဘာသာရေးနှင့် အချိန်ကုန်လူပန်းစရာမလိုပါ။

ခရစ်တော်နှင့်အတူ ဘုရားသခင်၌ ဝှက်ထားခြင်း အကြောင်းကို စဉ်းစားစရာရှိသေးသည်။ ယုံကြည်သူ၏ဝိညာဉ် ရေးရာ အသက်တာများကို လောကသားများ မြင်နိုင်စွမ်းမရှိပါ။ နားလည်နိုင်စွမ်းမရှိကြပါ။ ထိုသူများနှင့်မတူ၊ တမူထူးခြား သောအခါ အံ့အားသင့်ကြသည်။ ယုံကြည်သူများ၏အတွေး၊ ရည်ရွယ်ချက် လမ်းခရီးများနှင့် ရောစပ်၍မရပါ။ ”သန့်ရှင်းသော ဝိညာဉ်တော်ကို မြင်လည်းမမြင်၊ တွေ့လည်းမတွေ့ဘူးပါ”ဟု ဆိုကြသည်။ ထိုအရာသည်ပင်လျှင် ဝိညာဉ်ရေးရာအသက်တာ ဖြစ်သည်။ ၁ယော ၃:၁၁ တွင် ”ထို့ကြောင့် လောကသားများက မသိကြ၊ အကြောင်းမူကား သခင်ကို နားလည်သိရှိခြင်း မရှိကြ” ဟုဆိုထားသည်။ ထိုလောကသားများ၏ နားမလည်နိုင်ခြင်းကို ယုံကြည်သူများက နားလည်မှုလွဲနေကြသည်။

၃:၄ ခရစ်တော်ကြွလာမည့်အကြောင်းသည် ယုံကြည်သူများ၏ မျှော်လင့်ချက်အထွဋ်အထိပ်ဖြစ်သည်။ ကိုယ်တော် သည် ထင်ရှားတော်မူသောအခါ သင်တို့သည်လည်း ကိုယ်တော်နှင့်အတူ ဘုန်းအသရေတော်ကို ခံစားကြလတံ့ ဟု ကျမ်းစကားဆိုထားသည်။ မျက်မှောက်ကာလတွင် ယုံကြည်သူများသည် ကိုယ်တော်နှင့်အတူထမြောက်၍ ပျော်ရွှင်သော အသက်တာရှိနေကြသည်ကို လောကသားများမမြင်တတ်ကြပါ။ သို့သော် သန့်ရှင်းသူများနှင့်အတူ ခရစ်တော်တဖန် ကြွရောက်လာမည့် နေ့ရက်ကာလသည် ရောက်လုဆဲဖြစ်သည်။ ထိုကာလရောက်သောအခါ ယုံကြည်သူများသည်လည်း ကိုယ်တော်နှင့်အတူ ဘုန်းအသရေတော်ခံစားကြရမည်။ ထိုအခါကျမှ လောကလူသားများက ရင်ဘတ်ဗျောတီး၍ ”ဪ-ဒီလိုကိုး” ဟုဆိုကြလိမ့်မည်။

၃:၅ အပိုဒ်ငယ်(၃)တွင် ယုံကြည်သူများသေလွန်ခြင်းအကြောင်း ရေးခဲ့ကြသည်။ ဤကျမ်းပိုဒ်တွင် သေစေရမည့် အချက်များကို ရေးခဲ့ကြသည်။ ဤကျမ်းပိုဒ်တွင် သေစေရမည့်အချက်များကို သတိပေးထားသည်။ ဤကျမ်းပိုဒ်(၂)ခုတွင် ယုံကြည်သူများ၏ရပ်တည်ပုံကို ရှင်းပြထားပါသည်။ အပြစ်၌သေခြင်းကို ရှင်းပြသည်။ လောကထဲသို့ မြှုပ်နှံရမည့်အချက်များ ကို သတိပေးထားသည်။ ယုံကြည်သူများသည် ခရစ်တော်ထဲ၌ ရှိနေသူများဖြစ်သည်။ ထိုသို့ရှိနေနိုင်ခြင်းသည် သခင်ယေရှု ခရစ်တော်ကို ယုံကြည်သောကြောင့် ဘုရားသခင်က အခမဲ့ပေးသောဆုလက်ဆောင်ဖြစ်သည်။ ယုံကြည်သူများ၏ဝတ္တရားမှာ ကျေးဇူးတော်ချီးမွမ်းခြင်းဖြစ်သည်။

ပညတ်တော်နှင့် ကျေးဇူးတော်ခြားနားမှုကို ရှင်းပြထားသည်။ ဘုရားသခင်က ”အပြစ်ကင်းစင်လျှင် ခရစ်တော်၌ သေခွင့်ပေးမည်”ဟုမပြောပါ။ ထိုစကားမျိုးသည် ပညတ်ချက်ဖြစ်သည်။ ထိုစကားအရဆိုလျှင် အပြစ်ကင်းစင်အောင် ကြိုးစားအားထုတ်ရမည်။ မည်သူကမှ အပြစ်ကင်းစင်ခြင်းမရှိသဖြင့် ခရစ်တော်ထံသို့လည်း ရောက်နိုင်ကြမည်မဟုတ်။ ထို့ကြောင့် ဘုရားသခင်က ”သခင်ခရစ်တော်ကို ယုံကြည်သူတိုင်း ငါ့ဘက်၌ရပ်တည်ခွင့် အခမဲ့ပေးသည်၊ အထက်အရပ်မှ ခေါ်သံကိုကြားကြလော့” ဟုဆိုသည်။ ထိုစကားသည် ကျေးဇူးတော်ဖြစ်သည်။

မိမိကိုယ်အားအသေသတ်၍ သင်္ဂြိုဟ်မြှုပ်နှံရမည်ဟုဆိုရာတွင် ရုပ်ခန္ဓာကိုယ်အား ဖျက်ဆီးသတ်ပစ်ရန်မဟုတ်။ တင်စားခြင်းဖြစ်သည်။ ရုပ်ခန္ဓာကိုယ်ဟုဆိုရာတွင် ခန္ဓာကိုယ်တွင် တွယ်ကပ်ခိုအောင်းနေသောရမ္မက်၊ မုန်းတီးခြင်းအစရှိသည့် ညစ်ညူးသောအရာများကို ဆိုလိုသည်။

ညစ်ညူးခြင်း ဆိုသည်မှာ ယေဘူယျအားဖြင့် ညစ်ညမ်းသော ကာမလွန်ကျူးခြင်း၊ အကျင့်စာရိတ္တဖောက်ပြန်ခြင်းဟု နားလည်ကြသည်။ အထူးသဖြင့် ကာမဂုဏ်လိုက်စားခြင်း (မ ၁၅း၁၉၊ မာ ရး၂၁)ဖြစ်သည်။ တခါတရံ မတရားသော ကာမကျူးလွန်ခြင်းဟု ချဲ့ပြောကြသည်။ မသန့်ရှင်းသောဆိုရာတွင် ကာယကံ၊ ဝစီကံ၊ မနောကံသုံးပါးစလုံးပါဝင်သည်။ ဤကျမ်းပိုဒ်တွင်မူ ကာယကံ၊ ဝစီကံ၊ မနောကံကို ရည်ညွှန်းပါသည်။ လောဘလွန်ကျူးခြင်း ဆိုသည်မှာ တဏှာ တပ်မက်ခြင်းကိုဆိုလိုသည်။ မကောင်းမှုကို လိုလားခြင်း ဆိုသည်မှာ မကြာခဏရုန်းရင်းဆန်ခတ်ခြင်း၊ ဣန္ဒြေသိက္ခာ မရခြင်းကိုဆိုလိုသည်။ လောကလွန်ကျူးခြင်း ဆိုသည်မှာ သင့်တင့်လျောက်ပတ်သည်ထက် ပိုမိုလွန်ကဲခြင်းဖြစ်သည်။ ဤနေရာတွင် လောကလွန်ကျူးခြင်းဆိုသည်မှာ မသန့်ရှင်းသောရယူခြင်းဖြစ်သည်။ လောဘလွန်ကျူးခြင်းသည် ရုပ်တုကိုးကွယ်ခြင်းတစ်မျိုးဖြစ်သည်။

လှုပ်ရှားပြုမူမှုတိုင်းသည် စိတ်ပါရှိ၍သာ လုပ်ဆောင်ခြင်းဖြစ်သည်။ တဏှာတပ်မက်ခြင်းသည် ရှင်းရှင်းပြောရလျှင် လူ့နှလုံးမှပေါ်ပေါက်လာခြင်းဖြစ်သည်။ နှုတ်ကပတ်တော်မကောင်းသောအမှုအရာများ ပတ်သက်ခြင်းမရှိကြရန် အတိအလင်း သတိပေးထားသည်။ ဘုရားသခင်က လူကို စွမ်းအားရှင်အဖြစ် ဖန်ဆင်းထားပါသည်။ သို့သော် အပြစ်တရားသည် ဘုရား သခင်၏ကျေးဇူးတော်အား ဖန်ဆင်းခံသတ္တဝါများက မျက်ကွယ်ပြုအောင်၊ ဝင်ရောက်နှောင့်ယှက်သည်။ ရှင်ပေါလုခေတ် ကာလတွင် ကာမလွန်ကျူးခြင်းအပြစ်သည် အများဆုံးဖြစ်သည်။ သန့်ရှင်းသောဝိညာဉ်တော်မပါရှိသော အသိုင်းအဝန်းတွင် ပိုမိုထူပြောကာ လူများကို ကျဆင်းစေသည်။

၃:၆ ဤအပြစ်များကို ဟန့်တားနိုင်မည်ဟု လူတွေက ထင်ခဲ့ကြသည်။ ကောင်းကင်သားများ နှုတ်ဆိတ်လျှက် လူသား များက တစခန်းထလာကြသည်။ သို့သော် ဘုရားသခင်ကို စော်ကားခြင်းမဟုတ်သော် စကားတော် မနာခံသူများအတွက် အမျက်ဒေါသသင့်ကြမည်။ ထိုအပြစ်က ဘဝတလျှောက်လုံးတွင် ခြယ်လှယ်သွားသည်။ ထိုသို့ဖြင့် အနာဂတ်တနေ့သော အခါ အပြစ်စီရင်ခြင်းခံကြရမည်။

၃:၇ ကောလောသဲသားများသည် အသက်တာပြောင်းလဲခြင်းမရှိကြခင်တွင် ထိုအပြစ်နွံထဲ၌ ကျင်လည်ခဲ့ကြသူများ ဖြစ်သည်။ သို့သော် ယခုအချိန်တွင်မူ ကျေးဇူးတော်ကြောင့် သန့်ရှင်းနေကြပြီ။ ပြောင်းလဲခြင်းအသက်တာသည် ယေရှု အသွေးတော်ဖုံးလွှမ်းခြင်းဖြစ်သည်။ အသစ်သောအသက်တာဖြင့် ဘုရားသခင်အတွက် ရှင်သန်နေသည်။ ”ဝိညာဉ်တော် ၌ အသက်ရှင်လျှင် ဝိညာဉ်တော်လမ်းပြသည့်အတိုင်း အသက်ရှင်ကြသည်” (ဂလာ ၅:၂၅) ဟု ကျမ်းစကားဆိုထားသည်။

၃:၈ ကောလောသဲများသည် တန်ဘိုးကြီးကြီးပေး၍ ရွေးနှုတ်ထားသူများဖြစ်ကြောင်း သိရှိကြသောအခါ ညစ်ညမ်း သောမူလဝတ်ရုံများကို ချွတ်ပစ်ခဲ့ကြသည်။ ထိုညစ်ညမ်းသော ဝတ်ရုံဆိုသည်မှာ အခန်းငယ်(၅)ပါ မသန့်ရှင်းမှုများဖြစ်သည်။

မှတ်စု

၁(Intro) George Salmon, A Historical Introduction to the Study of the Books of The New Testament, p.384.

၂(Intro) New Bible Commentary, p.1043.

၃(Intro) A.T.Robertson, Paul and the Intellectuals, p.16.

၄(၁:၅) J.B.Lightfoot, Saint Paul’s Epistles to the Colossians and to Philemon, p.134.

၅(၁:၆) NU နှင့် M ကျမ်းတို့၌ “and growing” ကိုဖြည့်ထားသည်။

၆(၁:၁၁) A.S.Peake, “Colossians”, The Expositor’s Greek Testament, III:499.

၇(၁:၁၄) “through His blood” “အသွေးအားဖြင့်” ဆိုသော စကားရပ်ကို ကျမ်းပြိုင် ဧဖက်၊ ၁:၇တွင်လည်း ဖတ်ရသည်။ သို့သော် ဂရိ NU ကျမ်းဟောင်းနှင့် အဓိက ဂရိ mss ကျမ်းတို့၌ မတွေ့ရပါ။

၈(၁:၁၈) Alfred Mace, အသေးစိတ်မတွေ့ရပါ။

၉(၁:၁၉) “oikeõ” အစား ပိုမိုလေးနက်မှုရှိသော katoikeõ” ကျိန်းဝပ်” ကို သုံးထားသည်။ အခြေချခြင်း အိမ်မှာ နေခြင်းဟု အနက်ကောက်နိုင်သည်။

၁၀(၁:၂၂) Charles R.Erdman, Epistle of Paul to the Colossians and Philemon, p.46.

၁၁(၁:၂၃) ဂရိဝေဟာရတွင် “လျှင်” စကားလုံးကို “ei” နှင့် “ean” စကားလုံးနှစ်လုံး သုံးနိုင်သည်။ ဤနေရာတွင် “ei” epimenete သည် ပထမတန်းစား အခြေအနေကို ရည်ညွှန်းသည်။

၁၂(၁:၂၃) Pridham, အခြားအချက်အလက် ထပ်မံမရရှိပါ။

၁၃(၂:၂) Alfred Mace, အခြားအချက်အလက် ထပ်မံမရရှိပါ။

၁၄(၂:၉) Marvin Vincent, Word Studies in the New Testament, II:906.

၁၅(၂:၁၄) F.B.Meyer, အခြားအချက်အလက်ထပ်မံ မရရှိပါ။

၁၆(၂:၁၄) NU ကျမ်းတွင် “Not” စကားလုံးကို ချန်လှပ်ထားသော်လည်းအဓိပ္ပါယ် မပြောင်းသွားပါ။ “ဟုတ်လား” နှင့် “မဟုတ်လား” သဘောမျိုးဖြစ်သည်။

၁၇(၃:၂) Robertson, Intellectuals, p.149.

၁၈(၃:၂) F.B.Hole, Paul’s Epistles, Volume Two, p.105.

၁၉(၃:၁၁) J.C.Ryle, Holiness, pp.436,455.

၂၀(၃:၁၂) W.E.Vine, Expository Dictionary of New Testament Words, p.56.

၂၁(၄:၂) Guy king, Crossing the Border, p.111.

၂၂(၄:၁၆) တနည်းအားဖြင့် ရှင်ပေါလုသည် ဧဖက်တွင်(၃)နှစ် နေခဲ့ရာ လူသိများခဲ့သည်။ ထို့ကြောင့် ကြောက်စိတ်နည်းနည်းမှ မရှိ။

၂၃(၄:၁၈) New Bible Commentary, p.1051.

၂၄(၄:၁၈) Robertson, Intellectuals, p.211.