Amos -3 -

အာမုတ်အနာဂတ္တိကျမ်း - ၃

1အို ဣသရေလအမျိုးသားတို့၊ အဲဂုတ္တုပြည်မှ ငါနုတ်ဆောင်သော အမျိုးသားအပေါင်းတို့၊ သင်တို့ကို ရည်မှတ်၍ ငါထာဝရဘုရား မိန့်တော်မူသောစကားကို နားထောင်ကြလော့။ 2မြေကြီးပေါ်မှာနေသော အမျိုးသားအပေါင်းတို့တွင် သင်တို့ တစ်မျိုးတည်းကိုသာ ငါလက်ခံသောကြောင့်၊ သင်တို့အပြစ် ရှိသမျှတို့ကို ငါစစ်ကြောမည်။

ပရောဖက်၏တာဝန်

3လူနှစ်ဦးသည် သဘောမတူလျှင်၊ ပေါင်းဖော်၍ ခရီးသွားနိုင်သလော။ 4ခြင်္သေ့သည် ဖမ်းစရာမရှိလျှင်၊ တော၌ ဟောက်လိမ့်မည်လော။ ခြင်္သေ့ပျိုသည် အဘယ်အရာကိုမျှ မဖမ်းမိလျှင်၊ တွင်းထဲက အသံပြုလိမ့်မည်လော။ 5မြေပေါ်မှာ ကျော့ကွင်းနှင့်မထောင်လျှင်၊ ငှက်ကို ကျော့မိလိမ့်မည်လော။ ထောင်ထားသောကျော့ကွင်း၌ အဘယ်အရာကိုမျှမရမီ ထောင်ထားရာအရပ်မှ နုတ်သွားလိမ့်မည်လော။ 6မြို့ထဲမှာ တံပိုးမှုတ်လျှင်၊ မြို့သားတို့သည် မကြောက်မလန့်ဘဲနေကြလိမ့်မည်လော။ ထာဝရဘုရား စီရင်တော်မမူဘဲ ဘေးတစ်စုံတစ်ခုသည် မြို့ထဲမှာ ရောက်လိမ့်မည်လော။ 7အကယ်စင်စစ် အရှင်ထာဝရဘုရားသည် မိမိကျွန် ပရောဖက်တို့အားမဖော်မပြဘဲ အဘယ်အမှုကိုမျှ စီရင်တော်မမူ။ 8ခြင်္သေ့ဟောက်သောအခါ၊ အဘယ်သူမျှ မကြောက်မလန့်ဘဲနေလိမ့်မည်နည်း။ အရှင်ထာဝရ ဘုရားမိန့်တော်မူသောအခါ၊ အဘယ်သူသည် ပရောဖက်မပြုဘဲနေလိမ့်မည်နည်း။

ရှမာရိမြို့သားတို့၏ကြမ္မာဆိုး

9အာဇုတ်မြို့ ဘုံဗိမာန်တို့နှင့် အဲဂုတ္တုပြည်ဘုံဗိမာန်တို့တွင် သတင်းကြားပြောရမည်မှာ၊ ရှမာရိတောင်တို့ အပေါ်မှာစုဝေး၍၊ ရှမာရိမြို့ထဲမှာ ရုန်းရင်းခတ်ခြင်းအမှုကိုလည်းကောင်း၊ မြို့ထဲမှာ ညှဉ်းဆဲခံရသော သူတို့ကိုလည်းကောင်း ကြည့်ရှုကြလော့။ 10မြို့သားတို့သည် တရားသောအမှုကို မပြုတတ်၊ အနိုင်အထက်ပြု၍ လုယူသောဥစ္စာကို ဘုံဗိမာန်တို့၌ သိုထားတတ်ကြသည်ဟု ထာဝရဘုရားမိန့်တော်မူ၏။ 11ထိုကြောင့်၊ အရှင်ထာဝရဘုရား မိန့်တော်မူသည်ကား၊ ရန်သူတို့သည် ရှမာရိပြည်ကိုဝိုင်းပြီးလျှင်၊ သင်၏အစွမ်းသတ္တိကို နှိမ့်ချ၍၊ ဗိမာန်တို့ကို ဖြိုဖျက်ကြလိမ့်မည်။ 12ထာဝရဘုရား မိန့်တော်မူသည်ကား၊ သိုးထိန်းသည် ခြင်္သေ့နှုတ်ထဲက ခြေနှစ်ခု၊ သို့မဟုတ်၊ နားရွက်တစ်ပိုင်းကို နုတ်ယူသကဲ့သို့ ရှမာရိမြို့၌ ခုတင်ထောင့်၊ ဒမာသက်မွေ့ရာ ဖုံပေါ်မှာထိုင်သော ဣသရေလအမျိုးသားတို့ကို နုတ်ယူရလိမ့်မည်။ 13ကောင်းကင်ဗိုလ်ခြေကို အစိုးပိုင်သော ဘုရားသခင်၊ အရှင်ထာဝရဘုရား မိန့်တော်မူသောစကားကို သင်တို့သည်နားထောင်၍ ယာကုပ်အမျိုးသားတို့အား ဆင့်ဆိုရမည်မှာ၊ 14အကယ်စင်စစ် ဣသရေလအမျိုး၏အပြစ်တို့ကို စစ်ကြောသောနေ့၌၊ ဗေသလယဇ်ပလ္လင်တို့ကို ငါစစ်ကြောလျက်၊ ယဇ်ပလ္လင်ဦးချိုတို့ကို ဖြတ်၍ မြေပေါ်သို့ချမည်။ 15ဆောင်းကာလ၌ စံသောနန်းတော်နှင့် နွေကာလ၌စံသော နန်းတော်တို့ကို ငါထိခိုက်၍၊ ဆင်စွယ်ဖြင့်ပြီးသော အိမ်တို့ကို ဖျက်ဆီးမည်။ ဘုံဗိမာန်တို့သည်လည်း ဆုံးကြလိမ့်မည်ဟု ထာဝရဘုရားမိန့်တော်မူ၏။

အာမုတ်အနာဂတ္တိကျမ်း - ၃ (အနက်ဖွင့်)

။ ဣသရေလတို့အပြစ်နှင့် တရားစီရင်ခြင်း (အခန်း ၃–၆)

(က) နာခံရန်ပထမအကြိမ်ဆင့်ခေါ်ခြင်း (အခန်း၃)

၃:၁–၂ ဣသရေလအမျိုးသားများ ကြောက်မက်ဖွယ်ရာတရားစီရင်ခြင်း ခံရမည့်အကြောင်း သတိပေးထားသည်။ ဣသရေလလူမျိုးသည် ယေဟောဝါ ဘုရားနှင့် အနီးဆုံးလူမျိုးတော် ဖြစ်သော်လည်း သူတို့အပြစ်ဒုစရိုက်များသည် ထိုနီးစပ်ခြင်းထက် ပိုများနေသည်။ ထို့ထက်ခံစားရမည့်ပြစ်ဒဏ်က ပိုများသည်။ အပြစ်ရှိသမျှကို စစ်ကြော၍ တရားစီရင်မည်။

၃:၃–၈ ထိုတရားစီရင်ခြင်းသည် သက်သက်မဲ့မဟုတ်။ အကြောင်းတရားရှိ၍ အကျိုးတရားလိုက်လာသည်။ အာမုတ်က အကြောင်း(၇)ချက် ရှင်းပြထားသည်။ အမြင့်ဆုံးအပြစ်ဒဏ်ဖြင့် အရေးယူမည်။ ထိုသို့အရေးယူခြင်းသည်လည်း ကောက်ကာ ငင်ကာထလုပ်သည်မဟုတ်။ စောစွာကပင် ပရောဖက်များဖြင့် ကြိုတင်သတိပေး ထားသည်ဖြစ်သည်။

၃:၉–၁၂ ဣသရေလတို့၏ သူတပါးအပေါ်ဖိစီးနှိပ်စက်မှု၊ ရှမာရိပြည်တွင် လုယက်သိမ်းပိုက်မှုစသော အပြစ်ဒုစရိုက်များကို အာဇုတ်(ဖိလိတ္တိ)နှင့် အဲဂုတ္တုပြည်သားများက သက်သေပြပါလိမ့်မည်။ ဤအပြစ်ဒုစရိုက်များကြောင့် အာရှုရိသားများက ဣသရေလမြေအား ကျူးကျော်သိမ်းပိုက်ကြမည်။ ကြွင်းကျန်သော လူနည်းစုသည် လည်းခွေးပြေးထွက်ပြေး ထွက်ပြေးကြရလိမ့်မည်။

၃:၁၃–၁၅ ဣသရေလအမျိုးတို့ အပြစ်စစ်ကြော သောနေ့၌ ဗေသလယဇ်ပလ္လင်ကို စစ်ကြောလျက် ယဇ်ပလ္လင်ဦးချိုတို့ကို မြေသို့ချပစ်မည်။ နွားရုပ်ဦးချိုသည် အာရှုရိပြည် (ယော၁၀၊၅၊၆) ကိုဆိုလိုပေသည်။ စံနန်းတော်နှင့် ဘုံဗိမာန်တို့သမိုင်းသည်လည်း ချုပ်ငြိမ်း ဆုံးခန်းတိုင်သွားမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။