2 Kings -17 -

ဓမ္မရာဇဝင်စတုတ္ထစောင် - ၁၇

ဣသရေလဘုရင်ဟောရှေ

1ယုဒရှင်ဘုရင်အာခတ် နန်းစံဆယ်နှစ်နှစ်တွင် ဧလာသားဟောရှေသည် နန်းထိုင်၍ ရှမာရိမြို့၌ ဣသရေလနိုင်ငံကို ကိုးနှစ်စိုးစံလေ၏။ 2ထိုမင်းသည် ထာဝရဘုရားရှေ့တော်၌ဒုစရိုက်ကိုပြု၏။ သို့သော်လည်း သူ့ရှေ့မှာဖြစ်ဖူးသော ဣသေလရှင်ဘုရင်တို့ပြုသော ဒုစရိုက်ကိုမမီ။ 3ထိုမင်းကို အာရှုရိရှင်ဘုရင် ရှာလမနေဇာသည်စစ်ချီ၍ ဟောရှေသည်ကျွန်ခံသဖြင့် အခွန်ဆက်ရ၏။ 4နောက်တစ်ဖန် နှစ်တိုင်းဆက်ရသော အခွန်ကိုမဆက်။ သွာအမည်ရှိသော အဲဂုတ္တုရှင်ဘုရင်ထံသို့ သံတမန်ကိုစေလွှတ်၍၊ ပုန်ကန်မည့်အကြံရှိသည်ကို အာရှုရိရှင်ဘုရင်သိသဖြင့်၊ ဟောရှေကိုဖမ်းဆီး၍ ထောင်ထဲမှာချုပ်ထားပြီးလျှင်၊

ရှမာရိမြို့ကျဆုံးခြင်း

5ဣသရေလပြည် တစ်လျှောက်လုံးသို့ စစ်ချီ၍၊ ရှမာရိမြို့သို့ရောက်သော် သုံးနှစ်ဝိုင်းထား၏။ 6ဟောရှေနန်းစံကိုးနှစ်တွင်၊ အာရှုရိရှင်ဘုရင်သည် ရှမာရိမြို့ကိုရပြီးလျှင်၊ ဣသရေလအမျိုးကို အာရှုရိပြည်သို့သိမ်းသွား၍ ဂေါဇန်မြစ်နား၊ ဟာလမြို့၊ ဟာဗော်မြို့အစရှိသော မေဒိနိုင်ငံမြို့ရွာတို့၌ထား၏။ 7အကြောင်းမူကား၊ အဲဂုတ္တုပြည်နှင့် အဲဂုတ္တုဖာရောဘုရင်လက်ထဲက ကယ်နုတ်တော်မူသော မိမိတို့ဘုရားသခင် ထာဝရဘုရားကို ဣသရေလအမျိုးသားတို့သည် ပြစ်မှား၍ အခြားတစ်ပါးသောဘုရားတို့ကို ရိုသေကြ၏။ 8သူတို့ရှေ့မှ ထာဝရဘုရားနှင်ထုတ်တော်မူသော တစ်ပါးအမျိုးသားတို့ထုံးစံနှင့် မိမိတို့ချီးမြှောက်သော ရှင်ဘုရင်တို့ထုံးစံသို့လိုက်ကြ၏။ 9မိမိတို့ ဘုရားသခင်ထာဝရဘုရားတစ်ဖက်၌ မတရားသောအမှုကို မထင်မရှားပြုကြ၏။ ကင်းစောင့်သောမျှော်စင်ဖြစ်စေ၊ ခိုင်ခံ့သောမြို့ဖြစ်စေ၊ မြို့ရွာအလုံးစုံတို့၌ မြင့်သောအရပ်ကို တည်ကြ၏။ 10ရုပ်တုဆင်းတုနှင့် အာရှရပင်တို့ကို မြင့်သောကုန်းရှိသမျှတို့အပေါ်မှာလည်းကောင်း၊ စိမ်းသောသစ်ပင်ရှိသမျှ အောက်မှာလည်းကောင်း၊ တည်ထောင်ပြုစုကြ၏။ 11သူတို့ရှေ့မှ ထာဝရဘုရားနှင်ထုတ်တော်မူသော တစ်ပါးအမျိုးသားပြုသကဲ့သို့ မြင့်သောအရပ်ရှိသမျှအပေါ်မှာ နံ့သာပေါင်းကိုမီးရှို့၍ ထာဝရဘုရား၏အမျက်တော်ကို နှိုးဆော်ခြင်းငှာ အဓမ္မအမှုတို့ကို ပြုကြ၏။ 12ထာဝရဘုရားပညတ်တော်မူသောအမှု၊ ရုပ်တုဆင်းတုတို့၌ ပူဇော်ခြင်းအမှုကို ပြုကြ၏။ 13သို့ရာတွင် ထာဝရဘုရားက အဓမ္မလမ်းတို့ကို ရှောင်ကြလော့။ ငါသည် သင်တို့ဘိုးဘေးတို့၌ ထားသောတရား၊ ငါ့ကျွန်ပရောဖက်တို့ဖြင့် ပေးလိုက်သောတရားကို အကုန်အစင်ကျင့်၍၊ ငါ့စီရင်ထုံးဖွဲ့ချက်တို့ကို စောင့်ရှောက်ကြလော့ဟု ပရောဖက်များနှင့် အနာဂတ်ဟောဆရာများတို့ဖြင့် ဣသရေလအမျိုး၊ ယုဒအမျိုး၌ သက်သေခံတော်မူသော်လည်း၊ 14သူတို့သည်နားမထောင်။ မိမိတို့ဘုရားသခင် ထာဝရဘုရားကို မယုံကြည်သောဘိုးဘေးတို့လည်ပင်းကဲ့သို့ မိမိတို့လည်ပင်းကို ခိုင်မာစေကြ၏။ 15စီရင်တော်မူချက်၊ ဘိုးဘေးတို့နှင့် ဖွဲ့တော်မူသောပဋိညာဉ်၊ သူတို့၌ သက်သေခံတော်မူသော သက်သေတို့ကိုပယ်၍ အနတ္တတရားကို ကျင့်လျက် အချည်းနှီးသက်သက် ဖြစ်ကြ၏။ အကြင်တစ်ပါးအမျိုးသားကျင့်သကဲ့သို့ မကျင့်ကြနှင့်ဟု ထာဝရဘုရားပညတ်တော်မူ၏၊ ပတ်လည်၌နေသော ထိုအမျိုးသားနောက်သို့လိုက်ကြ၏။ 16မိမိတို့ဘုရားသခင် ထာဝရဘုရား၏ပညတ်တော်ရှိသမျှတို့ကို စွန့်၍ နွားသငယ်တည်းဟူသော သွန်းသောရုပ်တုနှင့် အာရှရပင်ကို လုပ်ကြ၏။ မိုးကောင်းကင်တန်ဆာများကို ကိုးကွယ်၍ ဗာလဘုရားကိုလည်းဝတ်ပြုကြ၏။ 17သားသမီးတို့ကို မီးဖြင့်ပူဇော်ကြ၏။ နတ်ဝိဇ္ဇာအတတ်၊ ပြုစားသောအတတ်ကို သုံးဆောင်၍ ထာဝရဘုရား၏အမျက်တော်ကို နှိုးဆော်ခြင်းငှာ၊ ရှေ့တော်၌ ဒုစရိုက်ကိုပြုမည်ဟု ကိုယ်ကိုရောင်းကြ၏။ 18ထိုကြောင့် ထာဝရဘုရားသည် ဣသရေလအမျိုးကို ပြင်းစွာအမျက်ထွက်၍ မျက်မှောက်တော်မှ ပယ်ရှားတော်မူ၏။ ယုဒအမျိုးမှတစ်ပါး အခြားသောအမျိုး မကျန်ကြွင်းရ။ 19ယုဒအမျိုးမူကား၊ မိမိတို့ဘုရားသခင် ထာဝရဘုရား၏ပညတ်တရားတော်ကိုမစောင့်၊ ဣသရေလအမျိုးလိုက်သော ထုံးစံဓလေ့သို့ လိုက်ကြ၏။ 20ထာဝရဘုရားသည်လည်း၊ ဣသရေလအမျိုးရှိသမျှကို ရွံရှာ၍ မျက်မှောက်တော်မှ မနှင်ထုတ်မီတိုင်အောင် ဒဏ်ခတ်တော်မူ၏။ လုယက်သောသူတို့လက်၌ အပ်တော်မူ၏။ 21ဣသရေလအမျိုးကို ဒါဝိဒ်မင်းမျိုးမှဆုတ်ဖဲ့၍၊ သူတို့သည် နေဗတ်၏သားယေရောဗောင်ကို ရှင်ဘုရင်အရာ၌ ခန့်ထားကြ၏။ ယေရောဗောင်သည်လည်း ထာဝရဘုရားနောက်တော်သို့လိုက်ရာလမ်းမှ ဣသရေလအမျိုးကို လွှဲစေ၍ ဒုစရိုက်ကြီးကို ပြုစေ၏။ 22သို့ဖြစ်၍ ယေရောဗောင်ပြုသောဒုစရိုက်လမ်းသို့ ဣသရေလအမျိုးသားတို့သည် အစဉ်တစိုက် လိုက်ကြ၏။ 23ထာဝရဘုရားသည် မိမိကျွန် ပရောဖက်အပေါင်းတို့ဖြင့် မိန့်တော်မူသည်အတိုင်း၊ ဣသရေလအမျိုးကို မျက်မှောက်တော်မှ ပယ်ရှားတော်မမူမီတိုင်အောင် သူတို့သည် ထိုဒုစရိုက်အပြစ်ကို မရှောင်ဘဲလိုက်ကြ၏။ ထိုကြောင့် နေရင်းပြည်မှ အာရှုရိပြည်သို့ သိမ်းသွားခြင်းကို ယနေ့တိုင်အောင်ခံရကြ၏။

အာရှုရိတို့အတည်တကျနေထိုင်ခြင်း

24အာရှုရိရှင်ဘုရင်သည်လည်း၊ ဗာဗုလုန်မြို့သား၊ ကုသမြို့သား၊ အာဝမြို့သား၊ ဟာမတ်မြို့သား၊ သေဖရဝိမ်မြို့သားတို့ကိုဆောင်ခဲ့၍၊ ရှမာရိမြို့ရွာတို့တွင် ဣသရေလအမျိုးသားကိုယ်စားထားသဖြင့် ထိုလူတို့သည် ရှမာရိမြို့ရွာတို့ကိုသိမ်းယူ၍ နေရာကျကြ၏။ 25နေရာကျစက ထာဝရဘုရားကိုမရိုသေသောကြောင့်၊ ခြင်္သေ့တို့ကို စေလွှတ်၍ အချို့တို့ကို ကိုက်စေတော်မူ၏။ 26ထိုကြောင့် အချို့တို့က၊ ကိုယ်တော်ပြောင်းစေ၍၊ ရှမာရိမြို့ရွာတို့၌ ထားတော်မူသော လူအမျိုးမျိုးတို့သည် ထိုပြည်စောင့်ဘုရား၏ တရားကို နားမလည်သောကြောင့်၊ ထိုဘုရားသည် ခြင်္သေ့တို့ကိုစေလွှတ်၍ နေရာကျသောသူတို့ကို သတ်ပါသည်ဟု အာရှုရိရှင်ဘုရင်အား လျှောက်ကြသော်၊ 27အာရှုရိရှင်ဘုရင်က၊ ထိုပြည်မှသိမ်းခဲ့သော ယဇ်ပုရောဟိတ်တစ်ယောက်ကို ပြန်ပို့ကြ။ သူသည်သွား၍ ထိုပြည်စောင့်ဘုရား၏ တရားကို သွန်သင်လျက်နေပါလေစေဟု မိန့်တော်မူသည်အတိုင်း၊ 28ရှမာရိမြို့မှသိမ်းခဲ့သော ယဇ်ပုရောဟိတ်တစ်ယောက်သည် ပြန်၍ ဗေသလမြို့၌နေလျက်၊ ထာဝရဘုရားကို အဘယ်သို့ ရိုသေရမည်ကို သွန်သင်လေ၏။ 29သို့သော်လည်း ထိုလူမျိုးအသီးအသီးတို့သည် မိမိတို့ဘုရားကိုလုပ်၍ နေရာကျသောမြို့ရွာတွင် မြင့်သောအရပ်ပေါ်မှာ ရှမာရိမြို့သားလုပ်နှင့်သော အိမ်တို့၌ တင်ထားကြ၏။ 30ဗာဗုလုန်မြို့သားတို့သည် သုကုတ်ဗေနုတ် ဘုရား၊ ကုသမြို့သားတို့သည် နေရဂါလဘုရား၊ ဟာမတ် မြို့သားတို့သည် အရှိမဘုရား၊ 31အာဝမြို့သားတို့သည် နိဗဟာဇဘုရားနှင့် တာတက်ဘုရားကို လုပ်ကြ၏။ သေဖရဝိမ်မြို့သားတို့သည်လည်း သေဖရဝိမ်မြို့စောင့်ဘုရား အာဒြမ္မေလက်နှင့် အာနမ္မေလက်ဘုရားတို့အား သားသမီးကိုမီးရှို့၍ ပူဇော်ကြ၏။ 32ထာဝရဘုရားကိုလည်းရိုသေ၍ သာမညလူတို့ကို မြင့်သောအရပ် ယဇ်ပုရောဟိတ်အရာ၌ ခန့်ထားသဖြင့်၊ သူတို့သည် မြင့်သောအရပ်အိမ်တို့၌ လူများအဖို့ ယဇ်ပူဇော်ကြ၏။ 33ထိုသို့ ထာဝရဘုရားကို ရိုသေကြ၏။ သိမ်းသွားခြင်းကိုခံရသော လူမျိုးပြုသကဲ့သို့ မိမိတို့ဘုရားကိုလည်း ဝတ်ပြုကြ၏။ 34ယနေ့တိုင်အောင် ရှေးထုံးစံဓလေ့သို့ လိုက်ကြသည်ဖြစ်၍၊ ထာဝရဘုရားကို ရိုသေရာမရောက်။ ဣသရေလအမျိုးခံရသော စီရင်ထုံးဖွဲ့ချက်တို့ကို မစောင့်။ ဣသရေလအမည်ဖြင့်သမုတ်သော ယာကုပ်အမျိုးသားတို့၌ ထာဝရဘုရား ထားတော်မူသော ပညတ်တရားတို့ကိုမကျင့်ဘဲနေကြ၏။ 35ထာဝရဘုရားသည် ထိုအမျိုးသားတို့နှင့် ပဋိညာဉ်ဖွဲ့၍၊ သင်တို့သည် အခြားတစ်ပါးသောဘုရားတို့ကို မရိုသေ၊ ဦးမညွှတ်၊ ဝတ်မပြု၊ ယဇ်မပူဇော်ရ။ 36သင်တို့ကို ကြီးသောတန်ခိုး၊ ဆန့်သောလက်ရုံးတော်အားဖြင့် အဲဂုတ္တုပြည်မှကယ်နုတ်တော်မူသော ထာဝရဘုရားကိုသာ ရိုသေကိုးကွယ်၍ ယဇ်ပူဇော်ရမည်။ 37သင်တို့အဖို့ ရေးထားတော်မူသော စီရင်ထုံးဖွဲ့ချက် ပညတ်တရားတို့ကို အစဉ်အမြဲစောင့်ရှောက်ရမည်။ အခြားတစ်ပါးသော ဘုရားတို့ကို မရိုသေရ။ 38သင်တို့နှင့်ငါဖွဲ့သော ပဋိညာဉ်ကိုမမေ့လျော့ရ။ အခြားတစ်ပါးသော ဘုရားတို့ကို မရိုသေရ။ 39သင်တို့၏ ဘုရားသခင်ထာဝရဘုရားကိုသာရိုသေရမည်။ သို့ပြုလျှင် ရန်သူအပေါင်းတို့လက်မှ ကယ်နုတ်တော်မူမည်ဟု မှာထားတော်မူသော်လည်း၊ 40သူတို့သည်နားမထောင်၊ ရှေးထုံးစံဓလေ့သို့လိုက်ကြ၏။ 41ထိုလူအမျိုးမျိုး ကိုယ်တိုင်မှစ၍၊ သားမြေးမြစ်တို့သည် ထာဝရဘုရားကို ရိုသေကြ၏။ ရုပ်တုဆင်းတုတို့ကိုလည်း ဝတ်ပြုကြ၏။ မိရိုးဖလာသို့လိုက်၍ ယနေ့တိုင်အောင်ကျင့်နေကြ၏။

ဓမ္မရာဇဝင်စတုတ္ထစောင် - ၁၇ (အနက်ဖွင့်)

(မ) ဣသရေလဘုရင် ဟောရှေ (၁၇:၁–၆)

ဧလိ၏သား ဟောရှေ သည် ဘီစီ ၇၃၂/၃၁-၇၂၃/၂၂ ထိ (၉)နှစ် တိုင်တိုင် ဣသရေလ ဘုရင် အဖြစ် နန်းစံခဲ့သည်။

၁၇:၁–၂ ဣသရေလတို့၏ ဒသမမြောက်နှင့် နောက်ဆုံးနန်းဆက် အကြောင်း ဖြစ်သည်။ ဟောရှေသည် ပေကာ ကိုလုပ်ကြံ၍ (၁၅:၃၀) အာဏာ သိမ်းပိုက်သည်။ သူသည် ဘိုးဘေးများလောက် မဆိုးညစ်သော်လည်း တိုင်းသူပြည်သားတို့မှာ ဘုရားသခင်နှင့် အဝေးကြီး ဝေးကွာသွားကြပြီ။ အလာကောင်း သော်လည်း အခါနှောင်းလေပြီ။

၁၇:၃–၆ အာရှုရိဘုရင် ရှာလမနေဇာက လာရောက်ခြိမ်းခြောက်သောကြောင့် အခွန်အတုပ်ပေးဆောင်နေရသည်။ အခွန်အတုပ် သက်သာစေရန် ပုန်ကန်တော်လှန်ဖို့ အဲဂုတ္တုမင်းနှင့် ပေါင်းဖက် ကြံစဉ်သည်။ ထိုသတင်းအား ရှုရိမင်းထံသို့ ပေါက်ကြားသွားသဖြင့် ဟောရှေမင်းနှင့် အပေါင်းပါများအား ဖမ်းဆီး၍ ရှမာရိ၌ (၃) နှစ် ထောင်ချသည်။ ဟောရှေ၏ဘဝနိဂုံးချုပ်ပုံ အသေးစိတ်မသိရပါ။ အာရှုရိထောင်တွင် အကျဉ်းခံခြင်းဖြင့် ဘဝဇာတ်သိမ်းမှေးမှိန် ပျောက်ကွယ်သွားသည်။ ဣသရေလပြည် နောက်ဆုံးပျက်သုဉ်းခြင်းသည် ဘီစီ ၇၃၂/၇၂၂ နှစ် ဖြစ်သည်။

(ယ) မြောက်ပိုင်းနိုင်ငံ ပြိုလဲခြင်း (၁၇:၇–၄၁)

၁၇:၇–၂၃ ဤကျမ်းပိုဒ်တွင် ဣသရေလ နိုင်ငံအပေါ်၌ ဘုရားသခင်၏ အလိုတော်မကျပုံနှင့် တိုင်းတပါးလက်အောက်သို့ ဖမ်းဆီးခေါ်ဆောင်ခြင်း ခံရပုံများ တွေ့ရသည်။ ထာဝရဘုရားထက် အခြားဘုရားငယ် များကို ကြောက်ရွံ့ကြသည်။ တောင်ကုန်းပေါ်တွင် ရုပ်တုတည် ကြသည်။ အုတ်ပုံဘုရား ကိုးကွယ်ကြသည်။ သစ်သားရုပ်တု၍ ဘုရားအဖြစ် ပူဇော်ကြသည်။ တွေ့မြင်ရာတောင်ကုန်း၊ တောင်ပူစာဟူသမျှတွင် လက်ညှိုးထိုးမလွတ်အောင် ဘုရားတုများ ပြုလုပ်ကိုးကွယ်ကြသည်။ ဘုရားသခင်၏ ပရောဖက်များ ပြောစကားကို လက်မခံကြသဖြင့် ဘုရားသခင်၏ စကားတော်များကို ငြင်းပယ်ရာရောက်သည်။ ဘုရားသခင် ၏ ပညတ်တော်များ ကို ကျောခိုင်းပြီး လူလုပ်စည်းမျဉ်းစည်းကမ်းများ လိုက်နာကြသည်။ ဒုစရိုက်နောက် သို့ လိုက်၍ သားသမီးများကိုလည်း ယဇ်ပူဇော်ကြသည်။

၁၇:၂၄–၂၅ အာရှုရိဘုရင်က မြောက်ပိုင်း ဣသရေလ လူ (၁၀)မျိုးကို မေသောပေါတာမိ နှင့် မိဒျန်ပြည် အနှံ့ အပြားသို့ ဖမ်းဆီးခေါ်ဆောင်သွားသည်။ ဣသရေလမြေပေါ်တွင် သိမ်းပိုက်ခဲ့သော အခြားလူမျိုး (၅)မျိုးအား နေရာချထားပေးသည်။ ရှေးဦးဣသရေလတို့သည် ဘုရားသခင်၏ စကားတော်ကို နားထောင်ကြသောကြောင့် မောရှေနှင့် ယောရှုတို့၏ ဦးဆောင်မှုဖြင့် ဒေသခံလူများကို မောင်းထုတ်၍ ခါနာန်ပြည်တွင် ဝင်ရောက်နေထိုင် အခြေချခဲ့ကြသည်။ ယေဟောဝါဘုရား စကားတော် နာခံခြင်းမရှိသော အခါ ဘုရားရှင်က အာရှုရိမင်းကို အသုံးပြု၍ ဣသရေလတို့အား မိမိတို့နေရင်းဒေသမှ မောင်းထုတ်သည်။ ဣသရေလတို့သည် မိမိနေရာ ဒေသအမှန်တွင် ဧမာနွေလ ဘုရားနှင့် အတူတကွရှိနေကြသော်လည်း၊ ဘုရားရှင်ကို မကိုးကွယ်၊ မနာခံဘဲ ရုပ်တုဘုရားတုကို ကိုးကွယ်နေကြသည်။ ဘုရားသခင်၏ အမျက်ဒေါသသည် ဆာလောင်ငတ်မွတ်၍ အစာရှာဟိန်းဟောက် နေသော ခြင်္သေ့ကဲ့သို့ ဣသရေလလူတို့အလယ်တွင် ကျရောက်ကာ လူများကို ကိုက်စားသတ်ဖြတ်ရတော့မည်။

၁၇:၂၆–၂၈ ဣသရေလမြေပေါ်တွင် ပလိပ်ရောဂါ ကျရောက်ခြင်းသည် ဣသရေလတို့၏ ဘုရားသခင်အကြောင်းကို တိုင်းတပါးသားများက မသိနားမလည်သောကြောင့်ဟု ဟုဆိုကြသည်။ ထို့ကြောင့် အာရှုရိမင်းသည် ထိုဣသရေလ မြေမှ လူစိမ်းများအား ဣသရေလတို့ ဘုရားအကြောင်း သွန်သင်ပေးစေသည်။ စစ်မှန်သော ဣသရေလ ယဇ်ပုရောဟိတ် ဘုရားသခင်၏ ယဇ်ပုရောဟိတ်ဖြင့် မဟုတ်ဘဲ ရုပ်တုဘုရားကိုးကွယ် သော ယဇ်ပုရောဟိတ်ဖြစ်သည်။ ဗေသလသို့ သွား၍ ရွှေနွားရုပ်ကိုးကွယ်ပုံ (ထိုကာလတွင် ရွှေနွားရုပ် မရှိတော့သော်လည်း ဝိထုံးနည်း နာကျန်သေးသည်) ကို ယေရောဗောင် မင်း၏ လုပ်ရိုးလုပ်စဉ်အတိုင်း သင်ပေးသည်။ ယေဟောဝါဘုရားအကြောင်းသွန်သင်ခြင်း မရှိ။ ထိုလူစိမ်းသူစိမ်းများ သည် ဣသရေလ လူမျိုးများနှင့် အပြန်အလှန်အိမ်ထောင်ပြု ကြသောကြောင့် သွေးမစစ် ကပြားလူ အများအပြား ဖြစ်လာကြသည်။ Samaritan ဟု လူသိထင်ရှားလာပြီး သီးသန့် ဘာသာရေး အယူအဆနှင့် ထုံးတမ်းစဉ်လာ ရှိလာကြသည်။

၁၇:၂၉–၃၄က ဤကျမ်းပိုဒ်သည် ဣသရေလမြေပေါ်တွင် ရပ်ခြားသူများ အခြေချ နေထိုင်ပုံ အကြောင်း ဖြစ်သည်။ ထိုလူမျိုးများသည် မိမိတို့လူမျိုးအလိုက် ကိုယ်ပိုင်ဘုရား၊ ကိုယ်ပိုင် ယဇ်ပုရောဟိတ် အသီးသီးရှိ ကြသည်။ ယေဟောဝါဘုရားလည်း သိရှိလာကြသဖြင့် အုတ်ရောရော ကျောက် ရောရော နေကြသည်။ မသိသလို သိသလိုဖြစ်လာကြ၍ ရုပ်တုကိုးကွယ်သူများ ထက် ခေါင်းမာလာကြသည်။

၁၇:၃၄ခ–၄၀ “ထာဝရဘုရားကို ရိုသေရာမရောက်” ဟူသော စကားသည် ဣသရေလ မြေပေါ်၌ အခြေချနေထိုင်သူများကို ဆိုလိုသည်။ ဘုရားသခင်ကို ဆန့်ကျင်ပုန်ကန်ခြင်း မပြုသော်လည်း ရွှေနွားရုပ်ကို ကိုးကွယ်ကြသောကြောင့် ထာဝရဘုရားကို မရိုမသေ ပြုရာရောက်ပါသည်။

၁၇:၄၁ ဣသရေလမြေပေါ်တွင် အခြေချနေထိုင်သူများသည် ဣသရေလများထက် အပြစ်ဒုစရိုက် ပေါ့လျှော့သည်။ ဘုရားတရားအကြောင်း သိရှိလာကြသောအခါ ယဉ်ပါးလာကြသည်။ ဘုရားသခင်ကို ချစ်ကြောက်ရိုသေလာကြသည်။ သို့သော် ဣသရေလလူ ဆယ်မျိုးမူကား မျက်ကန်းတစ္ဆေမကြောက် သည့်ပုံစံ ဖြစ်သည် (ငယ် ၃၄)။

ထိုဣသရေလ လူဆယ်မျိုးသည် လက်လွှတ်ဆုံးရှုံးရသော မြေအား နောက်ထပ် ပြန်လည် မရရှိတော့ပါ။၂၀ ကမ္ဘာအနှံသို့ ကွဲလွင့်ပျံ့နှံ့ကုန်သည်။ အဲသရောပိရှိ ဖာလာရှာဂျူးများ (Falasha Jews of Ethiopia) လူမျိုး၊ အိန္ဒိယကို ချင်ဂျူးများ (Cochin Jews of India)။ တရုတ်ခိုင်ဖုန်းဖုဂျူးများ (Kaifeng-fu Jews of China) ဖြစ်သွားကြသည်။ သို့သော် ဇာတိ ဗီဇကို ဖျောက်ပစ်၍ မရနိုင်ပါ။ ထိုနေ့ရက်ကျရောက် သောအခါ ဣသရေလ မြေပေါ်သို့ ပြန်လည်ခြေချကြဦးမည်။

ပရောဖက် ဟောရှေ၏ ပရောဖက်ပြုချက်သည်လည်း ထိုနေရာတွင် ဆုံးခန်းတိုင်သွားသည်။ ရှမာရိလည်း ပြိုလဲ၍ ဣသရေလ လူများလည်း ဖမ်းဆီး ကျွန်ပြုခြင်း ခံကြရသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။