Haggai -2 -

ဟဂ္ဂဲအနာဂတ္တိကျမ်း - ၂

ဘုန်းနှင့်ပြည့်သောအိမ်တော်

1သတ္တမလ နှစ်ဆယ်တစ်ရက်နေ့တွင်၊ ပရောဖက်ဟဂ္ဂဲအားဖြင့် ထာဝရဘုရား၏ နှုတ်ကပတ်တော် ရောက်လာ၍၊ 2သင်သည် ယုဒမြို့ဝန်၊ ရှာလသေလသား ဇေရုဗဗေလနှင့် ယဇ်ပုရောဟိတ်မင်း ယောဇဒက်သား ယောရှုမှစ၍ ကျန်ကြွင်းသောသူတို့အား ဆင့်ဆိုရမည်မှာ၊ 3ဤအိမ်တော်သည် ရှေးဘုန်းနှင့် ပြည့်စုံသည်ကို မြင်ဖူး၍ သင်တို့တွင် ကျန်ကြွင်းသောသူကား အဘယ်သူနည်း။ ယခုအဘယ်အရာကို မြင်သနည်း။ နှိုင်းယှဉ်လျှင် သင်တို့မျက်မှောက်၌ အဘယ်မျှ မဟုတ်သကဲ့သို့ ဖြစ်သည်မဟုတ်လော။ 4သို့သော်လည်း၊ အို ဇေရုဗဗေလ၊ အားယူလော့ဟု၊ ထာဝရဘုရားမိန့်တော်မူ၏။ အို ယဇ်ပုရောဟိတ်မင်း ယောဇဒက်သားယောရှု၊ အားယူလော့။ အို ပြည်သူပြည်သားအပေါင်းတို့၊ အားယူကြလော့ဟု၊ ထာဝရဘုရား မိန့်တော်မူ၏။ 5အဲဂုတ္တုပြည်မှ ထွက်သောအခါ သင်တို့နှင့် ငါဖွဲ့သော ပဋိညာဉ်စကားနှင့်အညီ ငါသည် သင်တို့နှင့်အတူရှိ၏။ ငါ၏ဝိညာဉ်တော်သည် သင်တို့တွင် နေရာကျ၏။ မစိုးရိမ်ကြနှင့်ဟု၊ ကောင်းကင်ဗိုလ်ခြေအရှင် ထာဝရဘုရား မိန့်တော်မူ၏။ 6ကောင်းကင်ဗိုလ်ခြေအရှင် ထာဝရဘုရားမိန့်တော်မူသည်ကား၊ ကာလမကြာမမြင့်မီ ကောင်းကင်၊ မြေကြီး၊ ပင်လယ်၊ ကုန်းတို့ကို တစ်ဖန်ငါလှုပ်ဦးမည်။ 7လူမျိုးအပေါင်းတို့ကိုလည်း ငါလှုပ်ဦးမည်။ လူမျိုးအပေါင်းတို့ နှစ်သက်ဖွယ်သောအရာသည် ရောက်၍၊ ဤအိမ်ကိုဘုန်းနှင့် ငါပြည့်စုံစေမည်ဟု၊ ကောင်းကင်ဗိုလ်ခြေအရှင် ထာဝရဘုရား မိန့်တော်မူ၏။ 8ရွှေနှင့် ငွေကို ငါပိုင်သည်ဟု၊ ကောင်းကင်ဗိုလ်ခြေအရှင် ထာဝရဘုရားမိန့်တော်မူ၏။ 9နောက်တည်သော ဤအိမ်တော်သည် အရင်အိမ်တော်ထက် ဘုန်းသာ၍ ကြီးလိမ့်မည်ဟု၊ ကောင်းကင်ဗိုလ်ခြေအရှင် ထာဝရဘုရားမိန့်တော်မူ၏။ ဤအရပ်၌လည်း ငြိမ်သက်ခြင်းကို ငါပေးမည်ဟု၊ ကောင်းကင်ဗိုလ်ခြေအရှင် ထာဝရဘုရားမိန့်တော်မူ၏။

ဆုံးမခြင်းနှင့်ကတိတော်

10ဒါရိမင်းကြီး နန်းစံနှစ်နှစ်၊ နဝမလနှစ်ဆယ် လေးရက်နေ့တွင်၊ ထာဝရဘုရား၏နှုတ်ကပတ်တော်သည် ပရောဖက်ဟဂ္ဂဲအားဖြင့် ရောက်လာလျက်၊ 11ကောင်းကင်ဗိုလ်ခြေအရှင် ထာဝရဘုရားက၊ သင်သည်တရားအမှုကို ယဇ်ပုရောဟိတ်၌ မေးမြန်းရမည်မှာ၊ 12လူသည် သန့်ရှင်းသောအမဲသားကို မိမိအဝတ်နှင့် ထုတ်၍ ဆောင်ခဲ့လျက်၊ မုန့်၊ ဟင်း၊ စပျစ်ရည်၊ ဆီ အစရှိသော စားစရာတစ်စုံတစ်ခုကို ထိုအဝတ်နှင့်ထိလျှင်၊ ထိုစားစရာသည် သန့်ရှင်းလိမ့်မည်လောဟု မေးမြန်းသော်၊ ယဇ်ပုရောဟိတ်တို့က၊ ထိုစားစရာသည် မသန့်ရှင်းဟု ပြန်ပြောကြ၏။ 13ဟဂ္ဂဲကလည်း၊ အသေကောင်အားဖြင့် မစင်ကြယ်သော သူသည် ထိုအရာ တစ်စုံတစ်ခုကိုထိလျှင် ညစ်ညူးခြင်းရှိလိမ့်မည်လောဟု မေးမြန်းသော်၊ ယဇ်ပုရောဟိတ်တို့က၊ ညစ်ညူးခြင်းရှိလိမ့်မည်ဟု ပြန်ပြောကြ၏။ 14ဟဂ္ဂဲကလည်း၊ ဤလူမျိုး၊ ဤပြည်သားတို့သည် ငါ့မျက်မှောက်၌ ထိုအတူ ဖြစ်ကြ၏။ သူတို့လုပ်ဆောင်သမျှသည်လည်း ထိုအတူဖြစ်၏။ ငါ့ထံမှာ ပူဇော်သောအရာသည်လည်း ညစ်ညူး၏ဟု၊ ထာဝရဘုရား မိန့်တော်မူ၏။

ကောင်းချီးပေးမည်ကတိပြုခြင်း

15ထာဝရဘုရား၏ ဗိမာန်တော်၌ ကျောက်တစ်ခုပေါ်မှာ တစ်ခုကို မတင်မီ၊ ယခုနေ့မှစ၍ အထက်အမှုကို ပြန်ကြည့်ဆင်ခြင်ကြပါလော့။ 16ထိုကာလတွင် ဆန်အတင်းနှစ်ဆယ်ထွက်ရသော စပါးပုံသို့ လူလာသောအခါ တစ်ဆယ်ကိုသာရ၏။ စပျစ်ရည်အိုးငါးဆယ်ကို ယူခြင်းငှာ စပျစ်သီးနယ်ရာကျင်းသို့ လာသောအခါ နှစ်ဆယ်ကိုသာရ၏။ 17သင်တို့ လုပ်ဆောင်သမျှတို့တွင် လေထိ၍အပင်သေဘေး၊ အရည်ယို၍ သေဘေး၊ မိုးသီးဘေးဖြင့် ငါသည် ဒဏ်ခတ်ခဲ့ပြီ။ သို့သော်လည်း၊ သင်တို့သည် ငါ့ထံသို့ ပြန်၍မလာကြဟု ထာဝရဘုရား မိန့်တော်မူ၏။ 18ထာဝရဘုရား၏ ဗိမာန်တော်တိုက်မြစ်ကျ၍၊ နဝမလ နှစ်ဆယ်လေးရက်နေ့၊ ယနေ့မှစ၍ ရှေ့သို့မျှော်ကြည့်ဆင်ခြင်ကြပါလော့။ ဆင်ခြင်ရမည် အကြောင်းအရာဟူမူကား၊ 19စပါးကျီ၌ စပါးရှိသလော။ မရှိ။ စပျစ်ပင်၊ သင်္ဘောသဖန်းပင်၊ သလဲပင်၊ သံလွင်ပင်တို့သည် အသီးကို မသီးကြသေး။ သို့သော်လည်း၊ ယနေ့မှစ၍ သင်တို့ကို ငါကောင်းချီးပေးမည်ဟု မိန့်တော်မူ၏။

ဇေရုဗဗေလအတွက်ကတိတော်

20ထိုလနှစ်ဆယ်လေးရက်နေ့တွင်၊ ထာဝရဘုရား၏နှုတ်ကပတ်တော်သည် ဟဂ္ဂဲသို့တစ်ဖန်ရောက်လာ၍၊ 21သင်သည် ယုဒမြို့ဝန်၊ ဇေရုဗဗေလကို ဆင့်ဆိုရမည်မှာ၊ ငါသည် ကောင်းကင်နှင့် မြေကြီးကိုလှုပ်မည်။ 22တိုင်းနိုင်ငံတို့၏ ရာဇပလ္လင်များကိုမှောက်လှန်၍၊ အမျိုးမျိုးသော တိုင်းနိုင်ငံတန်ခိုးကို ဖျက်ဆီးမည်။ ရထားနှင့် ရထားစီးသူရဲတို့ကိုလည်း မှောက်လှန်မည်။ မြင်းနှင့် မြင်းစီးသူရဲတို့သည် တစ်ယောက်ကို တစ်ယောက်ခုတ်၍ လဲကြလိမ့်မည်။ 23ကောင်းကင်ဗိုလ်ခြေအရှင် ထာဝရဘုရားမိန့်တော်မူသည်ကား၊ အို ရှာလသေလသား၊ ငါ့ကျွန် ဇေရုဗဗေလ၊ ထိုအခါ သင့်ကိုငါယူ၍ တံဆိပ်လက်စွပ်ကဲ့သို့ ခန့်ထားမည်ဟု၊ ထာဝရဘုရား မိန့်တော်မူ၏။ သင့်ကို ငါရွေးချယ်ပြီဟု၊ ကောင်းကင်ဗိုလ်ခြေအရှင် ထာဝရဘုရား မိန့်တော်မူ၏။

ပရောဖက်ဟဂ္ဂဲ စီရင်ရေးထားသော အနာဂတ္တိကျမ်းပြီး၏။

ဟဂ္ဂဲအနာဂတ္တိကျမ်း - ၂ (အနက်ဖွင့်)

။ ဒုတိယပရောဖက်ပြုချက် – သတ္တမလ၏နှစ်ဆယ့်တစ်ရက်နေ့ (၂:၁–၉)

(က) သူတို့နှင့်အတူ ဘုရားသခင်ရှိတော်မူကြောင်း ထပ်မံအားပေးခြင်း (၂:၁–၁၅)

သတ္တမလရောက်သောအခါ ပြည်သူလူထုကြီးသည် ကြုံတွေ့လာရသော အခက်အခဲအမျိုးမျိုးကြောင့် ဗိမာန်တော်ကို ဆက်လက်တည်ဆောက်ရန် အားလျှော့ကြသည်။ ယခင်ဗိမာန်တော်ဟောင်း အကြောင်းပြန်တွေးမိ သောအခါ စိတ်အားငယ်ကြသည်။ ဘုရားသခင်၏ဝိညာဉ်တော်က ခေါင်းဆောင်များအား စိုးရိမ်အားငယ်ခြင်း မရှိဖို့၊ အားယူကြဖို့ တိုက်တွန်းအားပေးကြသည်။

(ခ) ဗိမာန်တော် ဆက်လက်တည်ဆောက်ခွင့် မင်္ဂလာ (၂:၆–၉)

ဘုရားသခင်က ယုဒခေါင်းဆောင်များအား အနာဂတ်ကာလ(အနှစ်တစ်ထောင်အုပ်စိုးခြင်း)၌ ဘုန်းကျက် သရေပြည့်ဝသောဗိမာန်တော်၌ စိုးစံရမည့်အကြောင်း နှစ်သိမ့်အားပေးလိုက်သည်။ လူမျိုးအပေါင်းတို့နှစ်သက် ဖွယ်သောအရာ ဟူသောကျမ်းစကားသည် မေရှိယသခင်နှင့် မေရှိယသခင် ဗိမာန်တော်သို့ တဖန်ပေါ်လာဦးမည့် အကြောင်း ဖြစ်သည်။ တိုင်းနိုင်ငံသားတို့၏ ရတနာဘဏ္ဍာ(NKJV Marg)၂ ဖြစ်သည်။ သူတို့ပိုင်ဆိုင်သမျှသော ရွှေငွေများသည် ယေရုရှလင်ဗိမာန်တော် ချယ်သစရာ ဖြစ်လာကြမည်။ အပိုဒ်ငယ် ၉ကို “နောက်တည်မည့်ဗိမာန် တော်သည် ရှေးဗိမာန်တော်ထက် သာ၍တင့်တယ်သပ္ပါယ်မည်”ဟုဆိုလျှင် ပိုမိုသင့်လျှော်မည်။ ထိုဗိမာန်တော် နှစ်ခုစလုံးကို အိမ်တော်တစ်ခုတည်းအဖြစ် ခံယူရသည်။ ထို့ပြင် အနာဂတ်ကာလတွင် ဘုန်းကျက်သရေ ပြည့်စုံရုံ မျှမကဘဲ ငြိမ်သက်ခြင်းလည်း ရှိလိမ့်မည်ဟု ကတိပေးထားသည်။

၃။ တတိယပရောဖက်ပြုချက် နဝမလ၏နှစ်ဆယ့်လေးရက်နေ့ (၂:၁၀–၁၉)

(က) ဗိမာန်တော် ပျက်စီးနေသရွေ့ ပူဇော်သက္ကာများ မစင်ကြယ် (၂:၁၀–၁၄)

နဝမလ၏ နှစ်ဆယ့်လေးရက်မြောက်နေ့တွင် တတိယပရောဖက်ပြုချက်ကို လက်ခံကြားသိကြသည်။ ဟဂ္ဂဲက ယဇ်ပရောဟိတ်ကို မေးခွန်း (၂)ခုမေးမြန်းရသည်။ သန့်ရှင်းသောအမဲသားကို ထုပ်ဆောင်သွားသော အဝတ်ဖြင့် အခြားစားစရာများကို ထိမိလျှင် ထိုအခြားစားစရာများသည် စင်ကြယ်ပါသလား ဟူသောမေးခွန်း ဖြစ်သည်။ ယဇ်ပုရောဟိတ်က “မစင်ကြယ်ပါ“ဟုရှင်းရှင်းလေး ဖြေလိုက်သည်။ ဒုတိယမေးခွန်းမှာ မစင်ကြယ် သောအရာ (ဥပမာ-အသေကောင်ကို ကိုင်တွယ်ခြင်း)နှင့် ထိမိလျှင် စင်ကြယ်ပါသလားဟူသော မေးခွန်းဖြစ်သည်။ ပရောဖက်၏အဖြေစကားမှာ “မှန်ပါသည်။ မစင်ကြယ်တော့ပါ” ဟူ၍ ဖြစ်သည်။

တနည်းအားဖြင့် ဤသို့နားလည်နိုင်သည်။ စင်ကြယ်ခံပြီးသောအရာ (လူ)သည် အခြားအရာများအား စင်ကြယ်ခြင်း ကူမပေးနိုင်သော်လည်း ညစ်ညူးသောအရာက အခြားအရာသို့ ညစ်ညူးမှုကူးစက်စေပါသည်။၃ နောက်တနည်းပြောရလျှင်- အမှုတော်ဆောင်ရွက်ခြင်းနှင့် ဝတ်ပြုကိုးကွယ်ခြင်းဖြင့် အပြစ်ကိုမစင်ကြယ်စေနိုင် သော်လည်း အပြစ်တရားက အမှုဆောင်ရွက်ခြင်းနှင့် ဝတ်ပြုကိုးကွယ်ခြင်းကို ညစ်ညူးစေနိုင်သည်။၄ ဤကား ဗိမာန်တော်ပျက်စီးနေသရွေ့ လူများမစင်ကြယ်နိုင်သလို ပူဇော်သက္ကာများလည်း စင်ကြယ်မည်မဟုတ်ဟု သတိပေးခြင်းဖြစ်သည်။

(ခ) ဗိမာန်တော်အုတ်မြစ်မချမီ ဆင်းရဲငတ်မွတ်ကြခြင်း (၂:၁၅–၁၇)

ဗိမာန်တော်တည်ဆောက်ရန် အစမပျိုးသရွေ့ကာလပတ်လုံး ခါးသည်းသော အတွေ့အကြုံကို ခါးစည်း ခံရမည်။ ဆန်ရေစပါးအထွက် ကျမည်။ စပျစ်ပင်များ အသီးနည်းမည်။ နှင်းခါးနှင့်မိုးသီးများက အသီးအပွင့်များ ကို ခြွေချပစ်မည်။ ဗိမာန်တော်တည်ဆောက်ရန် လက်တွန့်နှောင်းနှေးနေလျှင် ဆင်းရဲကြပ်တည်းခြင်းနှင့် ငတ်မွတ် ခေါင်းပါးခြင်းဘေးဒဏ် ဆက်လက်ခံစားရကြမည်။

(ဂ) ဗိမာန်တော်တည်ဆောက်လျှင် ကောင်းကြီးမိုးရွာသွန်းမည် (၂:၁၈–၁၉)

သို့သော် ဗိမာန်တော်ကို အုတ်မြစ်ပန္နက်ချလျှင် ထိုနေ့ရက်မှစ၍ ဘုရားရှင်ထံမှ ကောင်းကြီးမင်္ဂလာ ခံစားကြရမည်။

၄။ စတုတ္ထပရောဖက်ပြုချက်–နဝမလ၏နှစ်ဆယ့်လေးရက်နေ့ (၂:၂၀–၂၃)

တပါးအမျိုးသားတို့ကို တွန်းလှန်ဖြိုဖျက်၍ မေရှိယနိုင်ငံတော် ပေါ်ထွန်းမည့်အကြောင်း လူမျိုးတော်များ သို့ ကတိတော်ပေးခြင်းဖြင့် တိုက်တွန်းအားပေးသည်။

ဤကျမ်းပိုဒ်တွင် ပါရှိသည့် ဇေရုဗဗေလမှာ ယေရှုခရစ်တော်ကို ကိုစားပြုသည်။ ကမ္ဘာပေါ်ရှိ တပါးအမျိုး သားများ၏ တိုင်းနိုင်ငံများကို ဖျက်ဆီး၍ ခရစ်တော်၏ မေရှိယနိုင်ငံတော်ပေါ်ထွန်းစေမည်။ တံဆိပ်လက်စွပ်ကဲ့ သို့ ခန့်ထားမည် ဆိုသည်မှာ မေရှိယသခင်ထံ ဘုရားသခင်၏ အခွင့်အာဏာ အလုံးစုံ လွှဲအပ်ကြောင်း အချက်ပေး သည်။

မှတ်စု

၁(နိဒါန်း) Dr. Howard Hendricksက ဤကျမ်းစကားရိုးရိုးအားဖြင့် တရားဒေသနာအဆုံး၌ အောင်မြင်သောဓမ္မဆရာများ ပေါ်ထွက်လာခြင်းကို “ပိုးမွှားပွဲတော်၏ဘုန်းကျက်သရေ”ဟု အမွှမ်းတင် ထားသည်။

၂(၂:၆-၉) NKJV ကျမ်းမူတွင် အင်္ဂလိပ်စာလုံးကြီးသည် အစဉ်အလာအနက်ဖွင့်ဆိုချက်ဖြစ်သည်။ သို့သော် စာလုံးငယ်များမှာ “လူမျိုးအပေါင်းတို့ နှစ်သက်ဖွယ်သောအရာ”ဟူသော စကားရပ်ကို အမြင်တမျိုး သုံးနှုန်းထားသည်။

၃(၂:၁၀-၁၄) William Kelly, Lectures Introductory to the study of the Minor Prophets.p.247.

၄(နိဒါန်း) Donald Campbell, အခြားအချက်အလက်များ မရရှိပါ။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။