2 Kings -19 -

ဓမ္မရာဇဝင်စတုတ္ထစောင် - ၁၉

ဟေရှာယထံအကြံဉာဏ်တောင်းခံခြင်း

(ဟေရှာ၊ ၃၇:၁-၇)

1ထိုစကားကို ဟေဇကိမင်းကြီးသည်ကြားလျှင်၊ မိမိအဝတ်ကိုဆုတ်၍ လျှော်တေအဝတ်ကိုခြုံလျက် ဗိမာန်တော်သို့သွားလေ၏။ 2လျှော်တေအဝတ်ကို ဝတ်လျက်ရှိသော နန်းတော်အုပ်ဧလျာကိမ်၊ စာရေးတော်ကြီးရှေဗန၊ အသက်ကြီးသော ယဇ်ပုရောဟိတ်တို့ကို အာမုတ်သား ပရောဖက်ဟေရှာယထံသို့ စေလွှတ်လေ၏။ 3ဟေဇကိမင်းမှာထားသော စကားဟူမူကား၊ ယနေ့သည် ဒုက္ခနေ့၊ ဆုံးမသောနေ့၊ ကဲ့ရဲ့ခြင်းကိုခံရသောနေ့ ဖြစ်၏။ သားဖွားချိန်ရောက်၍ သားကိုဖွားနိုင်အောင် ခွန်အားမရှိ။ 4အသက်ရှင်တော်မူသော ဘုရားသခင်ကို ကဲ့ရဲ့စေခြင်းငှာ အာရှုရိရှင်ဘုရင် စေလွှတ်သော မိမိကျွန်ရာဗရှာခစကားကို သင်၏ ဘုရားသခင်ထာဝရဘုရား ကြားတော်မူပါစေသော။ သင်၏ဘုရားသခင်ထာဝရဘုရားသည် ကိုယ်တော်တိုင်ကြားသော စကားကို ချေတော်မူပါစေသော။ သင်သည်လည်း ကျန်ကြွင်းသောလူတို့အဖို့ ဆုတောင်းပတ္ထနာပြုပါဟု ပြောစေခြင်းငှာ၊ 5ဟေဇကိမင်းစေလွှတ်သော ကျွန်တို့သည် ဟေရှာယထံသို့ ရောက်လာကြ၏။

6ဟေရှာယကလည်း၊ ထာဝရဘုရားမိန့်တော်မူသည်ကား၊ အာရှုရိရှင်ဘုရင်၏ ကျွန်တို့သည် ငါ့ကိုကဲ့ရဲ့၍၊ သင်သည်ကြားရသောစကားကြောင့် မကြောက်နှင့်။ 7ထိုမင်း၌ အခြားသောစိတ်သဘောကို ငါသွင်းပေးမည်။ သူသည် သတင်းကြား၍ မိမိပြည်သို့ ပြန်သွားလိမ့်မည်။ ထိုပြည်၌ ဓားဖြင့် ငါဆုံးစေမည်ဟူသောစကားတော်ကို သင်တို့၏သခင်အား ပြန်ကြားကြလော့ ဟုပြောဆို၏။

အာရှုရိအမျိုးသားတို့ထံခြိမ်းခြောက်စာပေးပို့ခြင်း

(ဟေရှာ၊ ၃၇:၈-၂၀)

8ထိုအခါ အာရှုရိရှင်ဘုရင်သည် လာခိရှမြို့မှ ထွက်သွားကြောင်းကို ရာဗရှာခကြားလျှင် ပြန်သွား၍ လိဗနမြို့ကို ရှင်ဘုရင်တိုက်နေသည်ကိုတွေ့လေ၏။ 9နောက်တစ်ဖန် ကုရှမင်းကြီးတိရက္ကသည် စစ်ချီ၍လာပြီဟု သတင်းကြားသောအခါ၊ ဟေဇကိမင်းထံသို့ တမန်တို့ကို စေလွှတ်ပြန်၍၊ 10သင်တို့သည် ယုဒမင်းကြီးဟေဇကိကို ပြောရသောစကားဟူမူကား၊ သင်ကိုးစားသော ဘုရားသခင်က၊ ယေရုရှလင်မြို့သည် အာရှုရိရှင်ဘုရင်လက်သို့ မရောက်ရဟူ၍ သင့်ကို မလှည့်စားစေနှင့်။ 11အာရှုရိရှင်ဘုရင်တို့သည် ခပ်သိမ်းသောပြည်တို့ကိုလုပ်ကြံ၍ ရှင်းရှင်းဖျက်ဆီးကြောင်းကို သင်သည် ကြားရပြီ။ ကိုယ်တိုင် လွတ်လိမ့်မည်လော။ 12ငါ့ဘိုးဘေးတို့သည် ဖျက်ဆီးသောအမျိုးသား၊ ဂေါဇန်အမျိုးသား၊ ခါရန်အမျိုးသား၊ ရေဇပ်အမျိုးသား၊ တေလသာမြို့၌ရှိသော ဧဒင်အမျိုးသားတို့ကို သူတို့၏ဘုရားများတို့သည် ကယ်ယူကြပြီလော။ 13ဟာမတ်မင်းကြီး၊ အာပဒ်မင်းကြီးနှင့် သေဖရဝိမ်မြို့၊ ဟေနမြို့၊ ဣဝါမြို့ကိုစိုးစံသောမင်းကြီးတို့သည် အဘယ်မှာရှိကြသနည်းဟု မှာလိုက်လေ၏။

14ထိုမှာစာကို ဟေဇကိမင်းသည် သံတမန်၏လက်မှခံယူ၍ ကြည့်ပြီးလျှင် ဗိမာန်တော်သို့သွား၍ ထာဝရဘုရားရှေ့တော်၌ ဖြန့်ထားလေ၏။ 15ထိုအခါ ဟေဇကိမင်းသည် ထာဝရဘုရားရှေ့တော်၌ လျှောက်ဆိုသည်ကား၊ ခေရုဗိမ်ပေါ်မှာထိုင်တော်မူသော ဣသရေလအမျိုး၏ဘုရားသခင် ထာဝရဘုရား၊ ကိုယ်တော်သည် ဘုရားသခင်ဖြစ်တော်မူ၏။ ကိုယ်တော်တစ်ပါးတည်းသာလျှင် မြေကြီးပေါ်မှာရှိသမျှသော အတိုင်းတိုင်းအပြည်ပြည်တို့၏ ဘုရားသခင်ဖြစ်တော်မူ၏။ ကိုယ်တော်သည် ကောင်းကင်နှင့်မြေကြီးကို ဖန်ဆင်းတော်မူ၏။ 16အိုထာဝရဘုရား၊ နားတော်ကိုလှည့်၍ နားထောင်တော်မူပါ။ အိုထာဝရဘုရား၊ မျက်စိတော်ကိုဖွင့်၍ ကြည့်ရှုတော်မူပါ။ သနာခရိပ်မင်းသည် အသက်ရှင်တော်မူသောဘုရားသခင်ကို ကဲ့ရဲ့၍ပြောစေသော စကားအလုံးစုံတို့ကို မှတ်တော်မူပါ။ 17အိုထာဝရဘုရား၊ အကယ်စင်စစ် အာရှုရိရှင်ဘုရင်တို့သည် အတိုင်းတိုင်းအပြည်ပြည်တို့ကို ဖျက်ဆီး၍၊ 18သူတို့၏ဘုရားများကို မီးထဲသို့ချပစ်ကြပါပြီ။ ထိုဘုရားတို့သည် ဘုရားမဟုတ်၊ လူလက်ဖြင့်လုပ်သော သစ်သားနှင့် ကျောက်ဖြစ်သောကြောင့် ပျက်စီးခြင်းသို့ရောက်ကြပါပြီ။ 19အိုအကျွန်ုပ်တို့ ဘုရားသခင်ထာဝရဘုရား၊ ကိုယ်တော် ထာဝရဘုရားတစ်ပါးသာ ဘုရားသခင် ဖြစ်တော်မူသည်ကို မြေကြီးပေါ်မှာရှိသမျှသော တိုင်းနိုင်ငံတို့သည်သိမည်အကြောင်း၊ အကျွန်ုပ်တို့ကို ထိုမင်းလက်မှ ယခုကယ်တော်မူပါ။ အကျွန်ုပ်တောင်းပန်ပါသည်ဟု ပတ္ထနာပြုလေ၏။

မင်းကြီးအတွက်ဗျာဒိတ်တော်

(ဟေရှာ၊ ၃၇:၂၁-၃၈)

20ထိုအခါ အာမုတ်သားဟေရှာယသည် ဟေဇကိမင်းထံသို့ စေလွှတ်၍၊ ဣသရေလအမျိုး၏ ဘုရားသခင်ထာဝရဘုရား မိန့်တော်မူသည်ကား၊ သင်သည် အာရှုရိရှင်ဘုရင်သနာခရိပ်အကြောင်းကြောင့် ငါ့ရှေ့မှာပြုသော ပတ္ထနာစကားကို ငါကြားရပြီ။ 21ထိုမင်း၏အမှုမှာ ထာဝရဘုရား မိန့်တော်မူသောစကားဟူမူကား၊ ဇိအုန်သတို့သမီးကညာသည် သင့်ကို မထီမဲ့မြင်ပြု၍ ပြက်ရယ်၏။ ယေရုရှလင်သတို့သမီးသည် သင့်နောက်၌ ခေါင်းညိတ်၏။ 22သင်သည် အဘယ်သူကို ကဲ့ရဲ့ဆဲရေးသနည်း။ အဘယ်သူကို အော်ဟစ်၍ မျက်နှာထောင်လွှားသနည်း။ ဣသရေလအမျိုး၏သန့်ရှင်းသောဘုရားကိုပင် ပြုပါသည်တကား။ 23သင်သည် တမန်များအားဖြင့် ထာဝရဘုရားကိုကဲ့ရဲ့၍၊ ငါသည် ရထားများပြားသဖြင့် တောင်ထိပ်သို့လည်းကောင်း၊ လေဗနုန်တောင် အထွတ်သို့လည်းကောင်း တက်လာပြီ။ အရပ်မြင့်သောအာရဇ်ပင်နှင့် အကောင်းဆုံးသောထင်းရှူးပင်တို့ကို ငါခုတ်လှဲပြီ။ အဝေးဆုံးသောခိုလှုံရာအသီးများသော တောထဲသို့ ငါဝင်ပြီ။ 24ငါသည်တွင်းတူး၍ မမြည်းဖူးသောရေကို သောက်ရပြီ။ ငါ၏ခြေဖဝါးအားဖြင့် အဲဂုတ္တုမြစ်လက်ကြား ရေရှိသမျှကို ခန်းခြောက်စေပြီဟု သင်ဆိုမိပြီတကား။ 25ငါသည် အထက်ကဤအမှုကိုစီရင်ကြောင်းနှင့် ရှေးကာလ၌ ပြုပြင်ကြောင်းကို သင်သည်မကြားသလော။ ယခုမှာလည်း သင်သည် ခိုင်ခံ့သောမြို့တို့ကို ဖျက်ဆီး၍၊ ကျောက်ပုံဖြစ်စေသောသူဖြစ်မည်အကြောင်း ငါစီရင်ခန့်ထားလေပြီ။ 26ထိုကြောင့် မြို့သားတို့သည် အားနည်းကြ၏။ မှိုင်တွေ၍ စိတ်ပျက်လျက်ရှိကြ၏။ တောမြက်ပင်နှင့် စိမ်းသောစပါးပင်ကဲ့သို့လည်းကောင်း၊ အိမ်မိုးပေါ်မှာပေါက်သောမြက်ပင်နှင့် မကြီးမီညှိုးနွမ်းသော စပါးပင်ကဲ့သို့လည်းကောင်း ဖြစ်ကြ၏။ 27သင်၏နေထိုင်ခြင်း၊ ထွက်ဝင်ခြင်း၊ ငါ၌ အမျက်ဟုန်းခြင်းတို့ကို ငါသိ၏။ 28ငါ၌သင်၏အမျက်ဟုန်းခြင်း၊ စော်ကားခြင်းကို ငါကြားရသောကြောင့်၊ သင့်ကိုနှာရှုပ်တပ်၍ ဇက်ခွံ့ပြီးမှ၊ သင်လာသောလမ်းဖြင့် ပြန်စေမည်။

29သင်မှတ်ရသော နိမိတ်လက္ခဏာဟူမူကား၊ ယခုနှစ်တွင် အလိုလိုကြီးရင့်သော အသီးအနှံကိုလည်းကောင်း၊ ဒုတိယနှစ်တွင် ထိုအတူပေါက်သော အရာများကိုလည်းကောင်း သင်တို့သည် စားရမည်။ တတိယနှစ်တွင်မျိုးစေ့ကိုကြဲ၍ စပါးကိုရိတ်ကြလော့။ စပျစ်ဥယျာဉ်ကိုလည်းစိုက်၍ အသီးကိုစားကြလော့။ 30ဘေးလွတ်၍ ကျန်ကြွင်းသော ယုဒအမျိုးသားတို့သည် တစ်ဖန်အောက်မှာအမြစ်စွဲ၍ အထက်မှာ အသီးသီးကြလိမ့်မည်။ 31ကျန်ကြွင်းသောသူတို့သည် ယေရုရှလင်မြို့ထဲကလည်းကောင်း၊ ဘေးလွတ်သောသူတို့သည် ဇိအုန်တောင်ပေါ်ကလည်းကောင်း ပေါ်လာကြလိမ့်မည်။ ကောင်းကင်ဗိုလ်ခြေအရှင် ထာဝရဘုရားသည် အလိုတော်အားကြီး၍ ထိုအမှုကို စီရင်တော်မူလိမ့်မည်။

32သို့ဖြစ်၍ ထာဝရဘုရားသည် အာရှုရိရှင်ဘုရင်ကိုရည်မှတ်၍ မိန့်တော်မူသည်ကား၊ သူသည် ဤမြို့သို့မဝင်ရ။ မြို့ထဲသို့ မြားကိုမပစ်ရ။ မြို့ရှေ့မှာ ဒိုင်းလွှားကိုမပြရ။ မြို့ပြင်မှာ မြေရိုးကိုမဖို့ရ။ 33လာသောလမ်းဖြင့် ပြန်သွားရမည်။ ဤမြို့ထဲသို့ မဝင်ရ။ 34ငါသည် ကိုယ်မျက်နှာကိုလည်းကောင်း၊ ငါ့ကျွန်ဒါဝိဒ်၏မျက်နှာကိုလည်းကောင်း ထောက်၍ ဤမြို့ကို ကယ်တင်ခြင်းငှာ စောင့်မမည်ဟု ထာဝရဘုရားမိန့်တော်မူ၏။

35ထိုညတွင် ထာဝရဘုရား၏ ကောင်းကင်တမန်သည်ထွက်၍ အာရှုရိတပ်တွင် လူတစ်သိန်းရှစ်သောင်းငါးထောင်တို့ကို ဒဏ်ခတ်လေ၏။ နံနက်စောစောထချိန်ရောက်သောအခါ၊ ထိုသူအပေါင်းတို့သည် အသေဖြစ်ကြ၏။ 36အာရှုရိရှင်ဘုရင် သနာခရိပ်သည်လည်း ထိုအရပ်မှထွက်၍ ပြန်သွားပြီးလျှင် နိနေဝေမြို့၌ နေလေ၏။ 37နောက်တစ်ဖန် သူသည် မိမိဘုရားနိသရုတ်၏ဗိမာန်၌ ကိုးကွယ်စဉ်တွင်၊ သားတော်အာဒြမ္မေလက်နှင့် ရှရေဇာသည် ခမည်းတော်ကို ဓားနှင့်သတ်ပြီးလျှင်၊ အာရမနိပြည်သို့ ပြေးကြ၏။ သားတော်ဧသရဟဒ္ဒုန်သည်လည်း ခမည်းတော်အရာ၌ နန်းထိုင်၏။

ဓမ္မရာဇဝင်စတုတ္ထစောင် - ၁၉ (အနက်ဖွင့်)

၁၉:၁–၇ ရာဗရှာခ၏ စော်ကားသံကြားသောအခါ ဟေဇကိမင်းသည် နာကျင်သည်။ ပရောဖက်ဟေရှာယ ထံသို့ ခြေမြန်တော် စေလွှတ်၍ ယုဒလူတို့၏ ခွန်အားလိုအပ်ပုံကို ပြောခိုင်းသည်။ ပရောဖက်ဟေရှာယသည် ဟေဇကိမင်းအား စိုးရိမ်အားငယ်ခြင်း မရှိဖို့၊ ထိုအာရှုရိဗိုလ်ချုပ်အား စိတ်ပြောင်းလဲစေပြီး အိမ်ပြန်ခိုင်းမည့် အကြောင်း မိမိရပ်ရွာပြန်ရောက်လျှင် အသတ်ခံရမည့် အကြောင်း စကားပြန်လိုက်သည်။

၁၉:၈–၁၃ လာခိရှသို့ ရာဗရှာခ ပြန်ရောက်သောအခါ သနာခရိပ်မင်းသည် စိတ်ပြောင်း၍ လိဗနမြို့ကို တိုက်ခိုက်ချေမှုန်းနေကြောင်း သိရသည်။

အဲသယောပိဘုရင် တိရက္ကသည် အာရှုရိပြည်အား တိုက်ခိုက်ရန် ချီတက်လာသည်ဟု သတင်းရသောကြောင့် ယေရုရှလင်အား ကဗျာကယာ အညံ့ခံခိုင်းခြင်း ဖြစ်သည်။ အချို့ကျမ်းစာ ပညာရှင်များက အပိုဒ်ငယ် (၇) သည် ကောဠာဟဠ သတင်းစကားဖြစ်ကြောင်း အပိုဒ်ငယ် (၉)က သက်သေပြသည် ဟု ဆိုသည်။ အချို့ကမူ ဗာဗုလုန်သူပုန် သောင်းကျန်းထကြွသော ကြောင့် အစီအစဉ် ပြောင်းခြင်း ဖြစ်မည်ဟု ဆိုကြသည်။

၁၉:၁၄–၂၀ ဟေဇကိမင်းသည် ဗိမာန်တော်သို့ ဝင်၍ ဘုရားသခင်ရှေ့မှာ အသနားခံ လျှောက်လဲသည်။ ယေဟောဝါဘုရားသခင်မှ တပါးအားကိုးစရာ မရှိကြောင်း လေးနက်စွာ တင်ပြသည်။ ဟေဇကိမင်း၏ ဆုတောင်းချက်ကို ထာဝရဘုရား က ပရောဖက် ဟေရှာယမှ တဆင့်အဖြေပေးသည်။

၁၉:၂၁–၂၈ အပိုဒ်ငယ် ၂၁ မှ ၂၈ သည် သနာခရိပ်နှင့် ပတ်သက်သည်။ အငယ် ၂၉-၃၄ သည် ဟေဇကိမင်းအတွက် လိပ်မူထားသည်။ ဟေရှာယ ပရောဖက်စကားသည် အာရှုရိမင်းကို ရှုတ်ချသည်။ ဇိအုန်သမီးကညာ သည် ယေရုရှလင်ကို ပုံဆောင်၏ ဟားတိုက်ပြောင်လှောင်သူမှာ အာရှုရိမင်း ဖြစ်သည်။ အာရှုရိမင်း သနာခရိပ်သည် သန့်ရှင်းသော ဘုရားနာမတော်ကို မိုက်မဲစွာ ပြက်ယယ်ပြုလျှက် ယုဒပြည်ကို ကျူးကျော်လာသည်။ ယေရုရှလင်အုပ်စိုးသူမင်း (အာရဇ်ပင်နှင့် ထင်းရှုးပင်) အကြား၌ ယေဟောဝါဘုရား ရပ်တည်စိုးစံတော်မူမည်။ သနာခရိပ်သည် တိုင်းခြားအဲဂုတ္တုပြည် စစ်အောင်ခြင်းကိုလည်း ဝါကြွားထောင်လွှားသည်။ ဘုရားသခင် မပြုနိုင်သော အမှုအရာများကို သူပြုနိုင်သည်ဟု ဘဝင်လေဟပ်နေသည်။ ဘုရားသခင်က သနာခရိပ်၏ စိတ်နှလုံးကို သိရှိထားသောကြောင့် တရားတော်နှင့် အညီ စီရင်သည်။

၁၉:၂၉–၃၄ အာရှုရိများက ယေရုရှလင်မြို့ကို တိုက်ခိုက်အောင်မြင် နိုင်မည်မဟုတ်ကြောင်း ဘုရားသခင်က အမှတ်လက္ခဏာ ပြသသည်။ ပထမ (၂)နှစ်တွင် ယုဒလူများသည် ထွန်ယက်စိုက်ပျိုးစရာ မလို။ အာရှုရိလူများက ဝိုင်းရံထားသောကြောင့် မလုပ်စားနိုင်ကြသော်လည်း ထမင်းနပ်မှန် ကြသည်။ တတိယနှစ်တွင် ပုံမှန်အတိုင်း လုပ်ကိုင်စားသောက်ကြရသည်။ ယေရုရှလင်သားတို့ ကျီးလန့်စားစာ မဖြစ်သကဲ့သို့၊ အာရှုရိလူများ၏ မြှားတစင်း၊ ခဲတလုံးမှ မြို့ထဲသို့ မကျရဟု ဆိုသည်။

၅။ သနာခရိပ် ကျဆုံးခြင်း (၁၉:၃၅–၃၇)

၁၉:၃၅–၃၇ ထိုနေ့ညတွင် ထာဝရဘုရား၏ ကောင်းကင်တမန်သည် အာရှုရိတပ်စခန်းတွင် ပေါ်ထွန်း၍ စစ်သားပေါင်းတစ်သိန်း ရှစ်သောင်း ငါးထောင်သည် နံနက်မိုးလင်းသည့်အခါ အလောင်းကောင်များ ဖြစ်နေကြသည်။

သနာခရိပ်သည် စိတ်ပျက်လျှက် နိနေဝေမြို့ တော်သို့ တပ်ခေါက်သည်။ နောက်နှစ်ပေါင်း (၂၀)ကြာ ဘီစီ ၆၈၁ ခုနှစ်၌ ထိုမြို့၌ အသတ်ခံရသည်။ (ဟေဇကိ မင်းထက်အသက် (၅)နှစ် ပိုရှည်သည်)။ သားအကြီး နှစ်ယောက်က လုပ်ကြံကြသောကြောင့် သနာခရိပ်မင်း သေဆုံး၍ တတိယသား ဧသရဟဒ္ဒုန်က မင်းအဖြစ် ဆက်ခံသည်။ အပိုဒ်ငယ် (၇) မှ ဟေရှာယ၏ ပရောဖက်ပြုချက်လည်း ပြည့်စုံမှန်ကန်လာသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။