Psalms-146 -

ဆာလံကျမ်း - ၁၄၆

ကယ်တင်ရှင်သခင်ကိုချီးမွမ်းခြင်း

1အိုငါ့ဝိညာဉ်၊ ထာဝရဘုရားကို ချီးမွမ်းလော့။ 2ငါသည် အသက်ရှင်စဉ်အခါ၊ ထာဝရဘုရားကို ချီးမွမ်းမည်။ ငါဖြစ်စဉ်ကာလပတ်လုံး၊ ငါ၏ဘုရားသခင်ကို ထောမနာသီချင်းဆိုမည်။ 3မင်းများမှစ၍ မကယ်တင်နိုင်သော လူသားကို မကိုးစားကြနှင့်။ 4သူသည် အသက်ထွက်၍ မြေသို့ပြန်သွားတတ်၏။ ထိုနေ့ချင်းတွင်၊ သူ၏အကြံအစည်တို့သည် ပျက်စီးကြ၏။ 5ယာကုပ်အမျိုး၏ ဘုရားသခင် မစတော်မူသောသူ၊ မိမိဘုရားသခင် ထာဝရဘုရားကို မျှော်လင့်သောသူသည် မင်္ဂလာရှိ၏။ 6ထိုဘုရားသခင်သည် ကောင်းကင်၊ မြေကြီး၊ သမုဒ္ဒရာနှင့်တကွ အရပ်ရပ်၌ရှိသမျှတို့ကို ဖန်ဆင်းတော်မူ၏။ သစ္စာတော်ကို အစဉ်အမြဲစောင့်တော်မူ၏။ 7ညှဉ်းဆဲခြင်းကိုခံရသောသူတို့အား တရားပြုတော်မူ၏။ ငတ်မွတ်သောသူတို့ကို ကျွေးမွေးတော်မူ၏။ ထာဝရဘုရားသည် ချုပ်ထားခြင်းကိုခံရသောသူတို့ကို လွှတ်တော်မူ၏။ 8ထာဝရဘုရားသည် မျက်စိကန်းသောသူတို့ကို မြင်စေတော်မူ၏။ ထာဝရဘုရားသည် နှိမ့်ချသောသူတို့ကို ကြွပင့်တော်မူ၏။ ထာဝရဘုရားသည် ဖြောင့်မတ်သောသူတို့ကို ချစ်တော်မူ၏။ 9ထာဝရဘုရားသည် ဧည့်သည်တို့ကို စောင့်မတော်မူ၍၊ မုဆိုးမနှင့် မိဘမရှိသောသူတို့ကို ထောက်မတော်မူ၏။ မတရားသောသူတို့၏လမ်းကိုကား၊ ကွေ့ကောက်စေတော်မူ၏။ 10အိုဇိအုန်မြို့၊ သင်၏ဘုရားသခင်တည်းဟူသော ထာဝရဘုရားသည် ကာလအစဉ်အမြဲ ကမ္ဘာအဆက်ဆက် စိုးစံတော်မူလတ္တံ့သတည်း။ ဟာလေလုယ။

ဆာလံကျမ်း - ၁၄၆ (အနက်ဖွင့်)

ဆာ ၁၄၆၊ ယာကုပ်ဘုရား၏ ဘုန်းကျက်သရေ

၁၄၆:၁ အပိုဒ်ငယ်(၁)တွင် မရှိမဖြစ်အရေးကြီးသော စကားလုံးနှစ်လုံးပါရှိသည်။ ဘုရားသခင်ကို ချီးမွမ်းလော့ဟု ဆိုသည်။ ဘုရားသခင်နှင့် ချီးမွမ်းသည် အဓိကစကားလုံးများဖြစ်သည်။

၁၃၆:၂ အပိုဒ်ငယ် (၂)တွင် ကျေညာချက် (၂)ရပ်ထုတ်ပြန်သည်။ “အသက်ရှင်စဉ်အခါ ထာ၀ရဘုရားကို ချီးမွမ်းမည်။ ငါဖြစ်စဉ်ကာလပတ်လုံး ထောမနာသီချင်းဆိုမည်“ ကျက်သရေမင်္ဂလာရှိသော စကားဖြစ်သည်။ လူနှင့်ဘုရားရှင်အကြား ပြောအပ်သောစကားပေတည်း။

၁၄၆:၃–၄ ဆာလံဆရာနှင့်ဘုရားသခင်နှင့် လူတို့၏ခြားနားပုံကို ယုံကြည်စရာမတူညီကြပုံများကို ထောက်ပြသည်။ လူသည် စိတ်ချယုံကြည်စရာမဟုတ်။ ရှင်ဘုရင်နှင့် အုပ်စိုးသူ မင်းများကိုလည်း စိတ်မချရ၊ ထိုသူများသည်လည်း မိမိကိုယ်ကို ကယ်တင်နိုင်ကြသူများမဟုတ်။ လူသည် နှလုံးသွေးခုန်ရပ်သွားလျှင် အသေကောင်ဖြစ်၍ မြှုပ်နှံရသည်။ သူ့ခန္ဓာကိုယ်သည် ဘူမိနက်သန် ဖုံမှုန့်သို့ ပြန်သွားရသည်။ လူ့အကြံဟူသမျှ ပျက်စီးစမြဲ။ ထို့ကြောင့်လူသည် စိတ်မချရ။ သေမျိုး။ ပျက်စီးတတ်သောအမျိုး။ ယခုမြင်၊ ယခုပျောက်၊ ဖျောက်ဆိပ်မျိုး။

၁၄၆:၅ ပျော်ရွှင်သော ဘဝခရီးဆိုသည်မှာ သူတပါးကို ကူညီထောက်ပံ့ခြင်းဖြစ်သည်။ ထိုသို့မစထောက်ပံ့နိုင်ရန် ယာကုပ်၏ဘုရား၌ တည်မှီရသည်။ ထိုဘုရားရှင်သည် ချို့တဲ့သူများကို မစသော အရှင်ဖြစ်သည်။ ထို့ကြောင့် ပြည့်စုံကုံလုံခြင်းမရှိသော လူသားတိုင်း ထိုဘုရားရှင်ကို မှီခိုအားကိုးရ သည်။

၁၄၆:၆ အနန္တတန်ခိုးရှင် ဖန်ဆင်းသခင်။ ထိုဘုရားသခင်က၊ ကောင်းကင်တန်ဆာများ၊ မြေကြီး ပင်လယ်နှင့် သက်ရှိသတ္တဝါများ ဖန်ဆင်းသည်။ ကိုယ်တော်သည် တတ်စွမ်းတော်မူသည့်အတိုင်း အရာ ခပ်သိမ်းကို ဖန်ဆင်းသည်။

တည်မှီအားထားရာ။ သစ္စာတော်သည် အစဉ်အမြဲတည်သည်။ ကိုယ်တော်သည် လိမ်ညာ၍ မုသာ စကားမဆိုတတ်။ ဖောက်ပြန်ရိုးမရှိ၊ ကိုယ်တော်ကို ယုံကြည်ဖို့ စွန့်စားစရာမလို။ ကံဆိုးကံကောင်း ပြုစရာမဟုတ်။ အမြဲတန်းမှန်ကန်သည်။

၁၄၆:၇ ချို့တဲ့သူများ၏ရှေ့နေတော်။ ဘုရားသခင်သည် မြောက်စားမည့်သူများကို သိသည်။ လှိုင်းလုံးထန်နေလျှင်လည်း မုချအောင်မြင်သွားကြရမည်။

ကျွေးမွေးစောင့်ရှောက်သူ။ ငတ်မွတ်သူများအား ကျွေးမွေးသုတ်သင်သည်။ ရုပ်ပိုင်းအစာနှင့် ဝိညာဉ် အာဟာရ ဆာလောင်သူအားလုံးကို ဖြည့်ပေးသည်။ အခမ်းအနားပြင်ဆင်ထားသော နေအိမ်တွင် စားပွဲများ ခင်းကျင်း၍ တည်ခြင်းဧည့်ခံသည်။

လွတ်ငြိမ်းချမ်းသာခွင့်ပေးသူ။ အပြစ်၏ဖိစီးမှု၊ လူမှုရေးနှိပ်ကွပ်ခြင်းခံရသူ၊ လူ့လောကတွင် မျက်နှာ ထားမရှိသူ။ ဒုစရိုက်ဝန်ထုပ်ဝန်ပိုး သယ်ပိုးသူ၊ အသက်ရှင်ဖို့ ကြိုးပမ်းရုန်းကန်နေသူများအား အထူး လွတ်ငြိမ်း ချမ်းသာခွင့်ပေးသည်။

၁၄၆:၈ အလင်းပေးသူ။ ဘုရားရှင်က မျက်စိကန်းသူများအား မျက်စိလင်းစေသည်။ အချို့သည် ရုပ်ခန္ဓာမျက်စိကန်းကြသည်။ တချို့က ဉာဏ်အလင်းမရှိကြ။ တချို့က နှစ်ခုစလုံးမမြင်ကြ။ တချို့က မွေးရာပါ။ တချို့ကမတော်တဆ။ တချို့က မိမိရွေးချယ်မှု။ မည်သည့်အကန်းမျိုးမဆို၊ ကိုယ်တော်က အလင်းပေးနိုင်သည်။

မြောက်စားပေးသူ။ လောကဓံတရားအောက်တွင် နစ်ချီးပေါ်ချီဖြင့် ဝန်ထုပ်ဝန်ပိုးပိနေသူများ၊ ပြဿနာပင်လယ်ထဲတွင် ရေစုန်မျှော်နေသူများ၊ မျက်ရည်ပင်လယ်ထဲတွင် ကူးခတ်နေသူများကို ကယ်ဆယ် ပေးသည်။ ဘဝမြှင့်တင်၍ မြှောက်စားပေးသည်။

လူကောင်းကိုတွယ်တာသူ။ Barnesက ဤသို့ဆိုသည်။ “ဘုရားသခင်၏ ဂုဏ်အင်လက္ခဏာ ဖြစ်သည်။ တရားတော်နာခံသူများကို ချစ်သည်။ ဖြောင့်မတ်သူများကို ခင်တွယ်သည်”။

၁၄၆:၉ ဧည်သည်များကို တွယ်တာသူ။ လူစိမ်းသူရံများ၏ အရေးကိစ္စကို စိတ်ဝင်စားသည်။ ဧည့်ဝတ် ကျေပြွန်ရေး၊ အဆင်ပြေချော့မွေ့ရေးကို လိုလားသည်။ သာဝကခရီးသည်များသည် ဘုရားရှင်၏ ဧည့်သည် တော်များဖြစ်သည်။

အားနွဲ့သူများ၏ မိတ်ဆွေရင်းခြာ။ မိဘမဲ့ကလေးများ၊ မုဆိုးမများ၊ ကျွေးမွေးစောင့်ရှောက်သူ မရှိသော ဆင်းရဲသားများကို စောင့်ရှောက်သည်။

ဒုစရိုက်ကို တရားစီရင်သူ။ ဘုရားတရားမရှိသူများနှင့် ပျက်စီးရာလမ်းတွင် ဖောက်သူများကို ထိရောက်စွာ အရေးယူဖို့ ပြင်ဆင်ထားသည်။

၁၄၆:၁၀ ထာဝရရှင်ဘုရင်။ လူ့ပေါက်ပန်းစျေး အကျင့်အကြံသည် ဘုရားသခင်၏ ဂုဏ်အင်လက္ခနှင့် ဖီလာဆန့်ကျင်ဖြစ်သည်။ ဘုရားသခင်သည် ကမ္ဘာအဆက်ဆက် စိုးစံတော်မူသည်။ ဟာလေလုယာ။

ထိုသို့သော ဘုရားသခင်ကို ချီးမွမ်းရကောင်းမှန်းမသိပါသလား။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။