နောက်သို့
ရှေ့သို့

ယောရှုမှတ်စာ - ၂၃

ယောရှုခွန်အားပေးစကား
1ထာဝရဘုရားသည် ပတ်ဝန်းကျင်နေသော ရန်သူအပေါင်းတို့လက်မှ ဣသရေလအမျိုးကို ကယ်လွှတ်၍၊ ငြိမ်သက်ခြင်းအခွင့်ကို ကြာမြင့်စွာသော ကာလပတ်လုံးပေးတော်မူပြီးမှ၊ ယောရှုသည် အသက်ကြီး၍ အိုမင်းသောအခါ၊ 2ဣသရေလအမျိုး အသက်ကြီးသူ၊ အကဲအမှူး၊ တရားသူကြီး၊ အရာရှိသောသူများနှင့်တကွ အမျိုးသားအပေါင်းတို့ကို ခေါ်ပြီးလျှင်၊ ငါသည် အသက်ကြီးရင့်၍ အိုမင်းပြီ။ 3သင်တို့၏ဘုရားသခင် ထာဝရဘုရားသည် သင်တို့အတွက် ဤလူမျိုးအပေါင်းတို့၌ ပြုတော်မူသမျှကို သင်တို့သည် သိမြင်ကြပြီ။ သင်တို့၏ဘုရားသခင် ထာဝရဘုရားသည် သင်တို့ဘက်၌ စစ်တိုက်တော်မူပြီ။ 4ယော်ဒန်မြစ်မှစ၍ အနောက်ပင်လယ်ကြီးတိုင်အောင်၊ ငါပယ်ရှင်းသမျှသော လူမျိုးတို့နှင့်တကွ ကြွင်းသေးသော ဤလူမျိုးနေသောပြည်ကို သင်တို့အမျိုးများ အမွေခံစရာဖို့ စာရေးတံချ၍ ငါဝေဖန်ပြီ။ 5သင်တို့၏ဘုရားသခင် ထာဝရဘုရား ကတိတော်ရှိသည်အတိုင်း၊ ဤလူမျိုးတို့ကို နှင်ထုတ်၍ သင်တို့မမြင်ရအောင် သုတ်သင်ပယ်ရှင်းတော်မူသဖြင့်၊ သူတို့၏မြေကို သင်တို့သည် အပိုင်ရကြလိမ့်မည်။ 6သို့ဖြစ်၍ သင်တို့သည် မောရှေ၏ပညတ္တိကျမ်းစာလမ်းမှ လက်ယာဘက် ဘက်ဝဲဘက်သို့မလွှဲဘဲ၊ ပါသမျှအတိုင်း ကျင့်စောင့်ခြင်းငှာလည်းကောင်း၊ 7သင်တို့တွင် ကြွင်းသေးသော ဤလူမျိုးနှင့် မပေါင်းဖော်၊ သူတို့ဘုရား၏နာမကို မြွက်၍ မကျိန်ဆို၊ ဝတ်မပြုဦးမညွှတ်ဘဲ၊ 8ယနေ့တိုင်အောင်ကျင့်သကဲ့သို့၊ သင်တို့၏ဘုရားသခင် ထာဝရဘုရား၌ ဆည်းကပ်မှီဝဲခြင်းငှာလည်းကောင်း၊ အလွန်ရဲရင့်သောစိတ်ရှိကြလော့။ 9အကြောင်းမူကား၊ ကြီးမား၍ခွန်အားနှင့်ပြည့်စုံသော လူမျိုးတို့ကို ထာဝရဘုရားသည် သင်တို့ရှေ့မှ နှင်ထုတ်တော်မူသဖြင့်၊ ယနေ့တိုင်အောင် သင်တို့ရှေ့၌ အဘယ်သူမျှမရပ်နိုင်။ 10သင်တို့တစ်ယောက်သော်လည်း အခြားသောသူတစ်ထောင်ကို ပြေးစေလိမ့်မည်။ အကြောင်းမူကား၊ သင်တို့၏ဘုရားသခင်ထာဝရဘုရားသည် ကတိတော်ရှိသည်အတိုင်း သင်တို့ဘက်၌ စစ်တိုက်တော်မူ၏။တရား၊ ၃၂:၃၀၊ ၃:၂၂။ 11သို့ဖြစ်၍ သင်တို့၏ဘုရားသခင် ထာဝရဘုရားကိုချစ်ခြင်းငှာ ကိုယ်စိတ်နှလုံးကို သတိပြုကြလော့။
12သို့မဟုတ် သင်တို့သည်ရွေ့လျော့၍၊ သင်တို့တွင် ကျန်ကြွင်းသေးသော ဤလူမျိုးတို့၌ မှီဝဲလျက်၊ ထိမ်းမြားပေးစား၍ ပေါင်းဖော်ဆက်ဆံခြင်းရှိလျှင်၊ 13သင်တို့၏ဘုရားသခင် ထာဝရဘုရားသည် နောက်တစ်ဖန် ဤလူမျိုးတို့ကို သင်တို့ရှေ့မှ နှင်ထုတ်တော်မမူ။ သင်တို့၏ဘုရားသခင် ထာဝရဘုရားပေးတော်မူ၍ ကောင်းမွန်သောဤပြည်၌ သင်တို့သည် မပျောက်မပျက်မီတိုင်အောင် သူတို့သည် သင်တို့၌ကျော့ကွင်း၊ ထောင်ချောက်၊ သင်တို့နံစောင်၌ နှင်တံ၊ သင်တို့မျက်စိ၌ ဆူးဖြစ်ကြလိမ့်မည်အကြောင်းကို ဧကန်အမှန် သိမှတ်ကြလော့။ 14ငါသော်ကား၊ မြေသားအပေါင်းတို့သွားရာလမ်းသို့ ယနေ့သွားလုပြီ။ သင်တို့၏ဘုရားသခင် ထာဝရဘုရားသည် သင်တို့အဖို့ မိန့်တော်မူသော ကောင်းကျိုးတစ်စုံတစ်ပါးမျှ မယုတ်မလျော့၊ အကုန်အစင်ပြည့်စုံကြောင်းကို သင်တို့သည် စိတ်နှလုံးထဲမှာ သိကြ၏။ 15သင်တို့၏ဘုရားသခင် ထာဝရဘုရား ကတိတော်ရှိသည်အတိုင်း၊ ကောင်းကျိုးအပေါင်းတို့သည် သင်တို့အပေါ်၌ ရောက်သကဲ့သို့၊ ထိုအတူ သင်တို့၏ ဘုရားသခင် ထာဝရဘုရားပေးတော်မူသော ဤကောင်းမွန်သောပြည်မှ သင်တို့ကို သုတ်သင်ပယ်ရှင်းတော်မမူမီတိုင်အောင်၊ ထာဝရဘုရားသည် သင်တို့အပေါ်၌ ဘေးဥပဒ်အပေါင်းတို့ကို ရောက်စေတော်မူမည်။ 16သင်တို့သည် သင်တို့၏ဘုရားသခင် ထာဝရဘုရားထားတော်မူသော ပဋိညာဉ်တရားကို ပြစ်မှားလျက်၊ အခြားတစ်ပါးသော ဘုရားတို့ထံသို့သွား၍ ဦးညွှတ်ဝတ်ပြုလျှင်၊ ထာဝရဘုရားသည် အမျက်ထွက်၍၊ အရင်ပေးတော်မူသော ဤကောင်းမွန်သောပြည်၌ သင်တို့သည် အလျင်အမြန်ပျောက်ပျက်ကြလိမ့်မည်ဟု ဟောပြော၏။

ယောရှုမှတ်စာ - ၂၃ အနက်ဖွင့်

(စ) ဣသရေလခေါင်းဆောင်များသို့ ယောရှု၏ နှုတ်ဆက်စကား (အခန်း ၂၃)

ယောရှု၏ နှုတ်ဆက်စကား နှစ်ခွန်းအနက် ဣသရေလခေါင်းဆောင်များသို့ ပြောသောစကားဖြစ်သည်။

ရဲစွမ်းသတ္တိရှိဖို့နှင့် ဝိညာဉ်ခွန်အား ပြည့်ဝကြဖို့ အားပေးသည် (ငယ်၆)။ အစောပိုင်းကာလတွင် ဘုရားသခင်က သူ့ကို ပြောသောစကားများ ပြန်လည်အသုံးပြုသည်(၁:၇)။ ဘုရားပေး ထိုစကားကိုလက်တွေ့ အသက်တာတွင် အောင်မြင်စွာအကျိုးရှိကြောင်း ကိုယ်တွေ့မျက်မြင်ခံခဲ့သဖြင့် နှောင်းလူများအား လက်ဆင့်ကမ်း အမွေစကားပေးခဲ့သည်။

ဘုရားသခင်၏ ကတိတော်တွင် ချို့ယွင်းချက်မရှိကြောင်း၊ အထူးသဖြင့် ကတိတော်မြေကို လက်ဆုပ်လက်ကိုင် သက်သေပြနိုင်ကြောင်း လက်ညှိုးထိုးပြသည်။ ဘုရားသခင်၏ စကားတော်များကို ယုံကြည် နာခံကြလျှင် ဘုရားသခင်က ဘေးရန်အပေါင်းကိုလည်း ဖယ်ရှားပေးမည်။ အဓိကမှာ ရုပ်တုဆင်းတု ကိုးကွယ်ခြင်း မပြုရန်နှင့် ဒေသခံခါနန်ပြည်သားများနှင့် သွေးနှောအိမ်ထောင်မပြုကြရန် တားမြစ်သည်။ တစ်နည်းအားဖြင့် ရုပ်တုဘုရားတုများသည် ဣသရေလလူမျိုးတို့၏ သမိုင်းစဉ်တလျှောက်တွင် မဟာရန်သူဖြစ်သည်။

ဘုရားသခင်၏ စကားတော်သည် တစ်လုံးတစ်ပါဒမှ အချည်းနှီးဖြစ်သည်မရှိ(ငယ်၁၄)။ ထိုစကားသည် ကတိပေးထားသောမြေအားလုံး ဣသရေလလူတို့လက်ထဲသို့ ရောက်ရှိကုန်ပြီဟုမဆိုလို။ ခါနန်ပြည်သားများကို တစ်လက်စတည်းနှင့်အပြောင် မမောင်းထုတ်ခဲ့ကြ (တရား ၇:၂၂)။ ဘုရားသခင်၏ စကားတော်သည် ပျက်ပြယ်ချွတ်ချော်ရိုး မရှိသောကြောင့် ဣသရေလလူမျိုးခေါင်းဆောင်များ ရဲသွေးရဲမာန်အပြည့်အဝဖြင့် ယုံကြည်ခြင်းရှိဖို့ တိုက်တွန်းထားသည်။ အကောင်းဖြင့် အစပြုခဲ့သော အမှုတော်ကို ဆုံးခန်းတိုင်အောင် လုပ်ဆောင်စေလိုသည်။ ထိုတိုက်တွန်းစကားနှင့်အတူ သတိလည်း ပေးထားသည်(ငယ် ၅၊၁၆)။ အကယ်၍ ပေးထားသော ပညတ်တော်များစောင့်ထိန်းခြင်းမရှိ၊ မနာခံကြလျှင် ဘုရားရှင်၏ ဖျက်ဆီးခြင်းခံကြရလိမ့်မည်။

ဤသင်ခန်းစာသည် ၂ကော ၆:၁၄-၁၈နှင့် ကျမ်းပြိုင်ဖြစ်သည်။ ရုပ်တုနှင့်ကင်းစင်ခြင်းသည် ဘုရားလူများအတွက် အဓိကအချက်ဖြစ်သည်။ တစ်ချိန်တည်းတပြိုင်တည်းတွင် ဘုရားသခင်နှင့် ဘုရားသခင်၏ ရန်သူအား ချစ်၍မရနိုင်ပါ။

ယခုသမ္မာကျမ်းစာအနက်ဖွင့်စာများကို http://bbcmm.net/ မှ ရယူဖေါ်ပြထားတာဖြစ်ပြီး သက်ဆိုင်ရာတို့၏ခွင့်ပြုချက်ဖြင့် ဖေါ်ပြဝေမျှခြင်းဖြစ်ပါတယ်။
နောက်သို့
ရှေ့သို့

"

Our Visitor

0 0 2 4 4 9
Users Today : 9
Users Yesterday : 8
Users This Year : 1553
Views Today : 24
Views This Month : 265
Views This Year : 5290
"