နောက်သို့
ရှေ့သို့

ယောရှုမှတ်စာ - ၁၆

ဧဖရိမ်နှင့်မနာရှေအမွေခံရသောမြေ
1ယောသပ်အမျိုးသားတို့သည် စာရေးတံပြု၍ အမွေခံရသောမြေ အပိုင်းအခြားသည် ယော်ဒန်မြစ်နား၊ ယေရိခေါမြို့အရှေ့၊ ယေရိခေါအိုင်မှထွက်၍ တောလမ်းသို့လိုက်လျက်၊ ဗေသလတောင်တစ်လျှောက်လုံးသွားသဖြင့်၊ 2ဗေသလလုဇမြို့သို့လည်းကောင်း၊ အာခိအတရုတ်မြို့သို့လည်းကောင်း၊ 3အနောက်မျက်နှာ၌ ယာဖလေတိမြို့သို့လည်းကောင်း၊ အောက်ဗက်ဟောရုန်မြို့သို့လည်းကောင်း၊ ဂေဇာမြို့သို့လည်းကောင်း ရောက်၍ ပင်လယ်၌ဆုံးလေ၏။ 4ထိုသို့ ယောသပ်၏သား မနာရှေနှင့် ဧဖရိမ်တို့သည် အမွေခံရကြ၏။
5ဧဖရိမ်အမျိုးသားတို့သည် အဆွေအမျိုးအလိုက်နေသော မြေအပိုင်းအခြားသည်၊ အရှေ့ဘက်၌ အတရုတ်အဒ္ဒါမြို့မှ အထက်ဗက်ဟောရုန်မြို့သို့ လိုက်၍၊ 6မြောက်မျက်နှာ၌ ပင်လယ်နား၊ မိတ်မေသမြို့သို့ထွက်၏။ တစ်ဖန် အရှေ့သို့မျက်နှာပြု၍ တာနတ်ရှိလောမြို့ အရှေ့မှာလျှောက်လျက်၊ 7ယနောဟမြို့သို့လည်းကောင်း၊ ယနောဟမြို့မှ အတရုတ်မြို့၊ နာရတ်မြို့၊ ယေရိခေါမြို့သို့လည်းကောင်း ရောက်၍ ယော်ဒန်မြစ်၌ ဆုံးလေ၏။ 8တာပွါမြို့မှ အနောက်သို့သွား၍ ကာနမြစ်သို့လိုက်လျက် ပင်လယ်၌ ဆုံးလေ၏။ 9ဤရွေ့ကား၊ မနာရှေအမျိုးသားတို့အဖို့ အမွေခံရသောမြေ၌ ဧဖရိမ်အမျိုးသားတို့အဖို့ ခွဲထားသောမြို့များနှင့်တကွ ဧဖရိမ်အမျိုးသား အဆွေအမျိုးအလိုက် အမွေခံရသောမြို့ရွာများ ဖြစ်သတည်း။ 10ဂေဇာမြို့၌နေသော ခါနနိလူတို့ကို မနှင်ထုတ်ဘဲ သူတို့သည် ယနေ့တိုင်အောင် ဧဖရိမ်အမျိုးသားတို့နှင့် အတူနေ၍ အခွန်ပေးရကြ၏။

ယောရှုမှတ်စာ - ၁၆ အနက်ဖွင့်

၃။ ယောသပ်လူများ (အခန်း ၁၆၊၁၇)

          ၁၆:၁–၄ ယုဒလူများနောက်တွင် ယောသပ်အမျိုးလိုက်သည်။ ယောသပ်သည် မွေးရာပါအခွင့်အရေးရရှိသူ ဖြစ်သည်။ (နှစ်ထပ်ကွမ်းဝေစုရရှိသူ ၆ရာ၅:၁ကိုကြည့်) ရုဗင်၏ ဝေစုကိုလည်း ခံစားသည်။ ယောသပ်လူတို့၏ နယ်နိမိတ်များကို အငယ်၁-၄တွင် မှတ်တမ်းတင်ထားသည်။ ဧဖရိမ်အမျိုးနှင့် မနာရှေလူတစ်ဝက်များဖြစ်သည်။

၁၆:၅–၁၀ ဧဖရိမ်လူများ၏ နယ်နိမိတ်ကို အငယ်၅-၁၀တွင်တွေ့ရသည်။ အပိုဒ်ငယ်(၁၀)ကို သတိချပ်ပါ။ ဒေသခံခါနန်လူများကို အကုန်အစင်မောင်းထုတ်ခြင်းမပြုဘဲ ရောနှောနေထိုင်ကြသည်။ ကြာလာသောအခါ ဣသရေလလူထဲသို့ ပပျောက်သွားကြသည်။

ယခုသမ္မာကျမ်းစာအနက်ဖွင့်စာများကို http://bbcmm.net/ မှ ရယူဖေါ်ပြထားတာဖြစ်ပြီး သက်ဆိုင်ရာတို့၏ခွင့်ပြုချက်ဖြင့် ဖေါ်ပြဝေမျှခြင်းဖြစ်ပါတယ်။
နောက်သို့
ရှေ့သို့

"

Our Visitor

0 0 2 4 4 7
Users Today : 7
Users Yesterday : 8
Users This Year : 1551
Views Today : 22
Views This Month : 263
Views This Year : 5288
"