ထွက်မြောက်ရာကျမ်း-၁၀

ထွက်မြောက်ရာကျမ်း - ၁၀

အဋ္ဌမဘေးဒဏ်

ကျိုင်းကောင်

1တစ်ဖန်ထာဝရဘုရားက၊ သင်သည် ဖာရောဘုရင်ထံသို့ဝင်လော့။ ငါသည် ဤနိမိတ်တို့ကို သူရှေ့၌ပြခြင်းငှာလည်းကောင်း၊ 2အဲဂုတ္တုပြည်၌ငါပြုသောအမှု၊ အဲဂုတ္တုလူတို့တွင် ငါပြသောနိမိတ်တို့ကို၊ သင်၏သားမြေးတို့အားကြားပြောသဖြင့်၊ ငါသည်ထာဝရဘုရားဖြစ်ကြောင်းကို သင်တို့သိစေခြင်းငှာလည်းကောင်း၊ သူ၏နှလုံး၊ သူ၏ကျွန်တို့နှလုံးကို ငါခိုင်မာစေပြီဟု မောရှေအား မိန့်တော်မူ၏။ 3မောရှေနှင့် အာရုန်တို့သည်၊ ဖာရောဘုရင်ထံသို့ဝင်ပြီးလျှင်၊ ဟေဗြဲလူတို့၏ ဘုရားသခင်ထာဝရဘုရားက၊ သင်သည် ငါ့ရှေ့မှာ ကိုယ်ကိုကိုယ်မနှိမ့်ချဘဲ အဘယ်မျှကာလပတ်လုံးနေလိမ့်မည်နည်း။ ငါ၏လူတို့သည် ငါ့အားဝတ်ပြုမည်အကြောင်း၊ သွားရသောအခွင့်ကိုပေးလော့။ 4သို့မဟုတ် ငါ၏လူတို့ကိုမလွှတ်ဘဲနေလျှင်၊ ကြည့်ရှုလော့။ ကျိုင်းကောင်တို့ကို သင်၏ပြည်သို့ နက်ဖြန်ငါဆောင်ခဲ့မည်။ 5မြေမထင်ပေါ်နိုင်အောင် သူတို့သည် မြေမျက်နှာကိုဖုံးလွှမ်းကြလိမ့်မည်။ မိုးသီးမဖျက်၊ သင်တို့၌ကျန်ကြွင်းသေးသမျှကိုလည်းကောင်း၊ သင်တို့အဖို့ မြေ၌ ပေါက်သမျှသောအပင်တို့ကိုလည်းကောင်း စားကြလိမ့်မည်။ 6သင်၏ဘိုးဘေးတို့သည် မြေပေါ်မှာဖြစ်သည်ကာလမှစ၍၊ ယနေ့တိုင်အောင် မမြင်ဖူးသကဲ့သို့၊ သင်၏အိမ်များ၊ သင်၏ကျွန်တို့အိမ်များ၊ အဲဂုတ္တုလူအပေါင်းတို့၏ အိမ်များတို့ကို ဖြည့်ကြလိမ့်မည်ဟုဆိုပြီးလျှင်၊ လှည့်၍ ဖာရောဘုရင်ထံမှ ထွက်သွားလေ၏။

7ဖာရောဘုရင်၏ကျွန်တို့ကလည်း၊ ဤလူသည် ငါတို့ကို အဘယ်မျှကာလပတ်လုံး နှောင့်ယှက်ပါလိမ့်မည်နည်း။ ထိုသူတို့သည် သူတို့၏ဘုရားသခင်ထာဝရဘုရားအား ဝတ်ပြုမည်အကြောင်း အခွင့်ပေးတော်မူပါ။ အဲဂုတ္တုပြည်ပျက်ကြောင်းကို သိတော်မမူသေးသလောဟု လျှောက်ကြလျှင်၊ 8မောရှေနှင့်အာရုန်ကို တစ်ဖန်ဖာရောဘုရင်ထံသို့ သွင်းပြန်၍၊ သင်တို့၏ဘုရားသခင်ထာဝရဘုရားအား ဝတ်ပြုခြင်းငှာသွားကြလော့။ သို့ရာတွင် သွားရသောသူတို့သည် အဘယ်သူနည်းဟုမေးလျှင်၊ 9မောရှေက၊ အကျွန်ုပ်တို့သည် သူငယ်၊ သူအို၊ သားသမီး၊ သိုး၊ နွားပါလျက် သွားပါမည်။ အကြောင်းမူကား၊ ထာဝရဘုရားရှေ့တော်၌ပွဲခံရပါမည်ဟု ပြန်ဆိုလေသော်၊ 10ဖာရောမင်းက၊ သင်တို့နှင့် သူငယ်များကိုငါလွှတ်သည်အတိုင်း၊ ထာဝရဘုရားသည် သင်တို့၌ရှိစေသော။ သတိပြု၊ မကောင်းသောအကြံကို ကြံကြသည်တကား။ 11ထိုသို့မဖြစ်ရာ။ အရင်တောင်းလျှောက်သည်အတိုင်း၊ ယောက်ျားဖြစ်သောသူတို့သာသွား၍ ထာဝရဘုရားအားဝတ်ပြုကြဟု မိန့်တော်မူသဖြင့်၊ သူတို့ကိုအထံတော်မှ နှင်ကြလေ၏။

12ထာဝရဘုရားကလည်း၊ ကျိုင်းတို့သည် အဲဂုတ္တုပြည်သို့ရောက်လာ၍ မိုးသီးမဖျက်၊ မြေပေါ်မှာ ကျန်ရစ်သောအပင်ရှိသမျှတို့ကို စားစေခြင်းငှာ၊ အဲဂုတ္တုပြည်အပေါ်မှာ လက်ကိုဆန့်လော့ဟု မောရှေအားမိန့်တော်မူသည်အတိုင်း၊ 13မောရှေသည် မိမိလှံတံကိုအဲဂုတ္တုပြည်အပေါ်မှာ ဆန့်သဖြင့်၊ ထိုနေ့နှင့် ထိုညပတ်လုံး၊ အရှေ့လေကို မြေပေါ်မှာ ထာဝရဘုရားလာစေတော်မူ၍၊ နံနက်ရောက်မှ အရှေ့လေသည် ကျိုင်းတို့ကိုဆောင်ခဲ့လေ၏။ 14ထိုကျိုင်းတို့သည် အဲဂုတ္တုပြည်လုံးကိုလွှမ်းမိုး၍၊ ပြည်နယ်နိမိတ်ရှိသမျှအပေါ်မှာ နားသဖြင့် အလွန်များပြားကြ၏။ ထိုသို့သော ကျိုင်းတို့သည် ရှေးကမဖြစ်စဖူး၊ နောက်၌လည်းမဖြစ်ရလတ္တံ့။ 15မြေမည်းသည်တိုင်အောင် မြေတစ်ပြင်လုံးကိုဖုံးအုပ်၍ တစ်ပြည်လုံးတွင် မြက်ပင်ရှိသမျှ မိုးသီးနှင့် လွတ်သောသစ်သီးရှိသမျှကို စားကြသဖြင့်၊ အဲဂုတ္တုပြည်တစ်လျှောက်လုံးတွင် သစ်ပင်မြက်ပင်တို့၌ စိမ်းသောအရာတစ်စုံတစ်ခုမျှ မကျန်ရစ်။ဗျာ၊ ၉:၂-၃။

16ထိုအခါ ဖာရောဘုရင်သည် မောရှေနှင့်အာရုန်ကို အလျင်အမြန်ခေါ်၍၊ သင်တို့၏ ဘုရားသခင်ထာဝရဘုရားကိုလည်းကောင်း၊ သင်တို့ကိုလည်းကောင်း ငါပြစ်မှားပါပြီ။ 17သို့ဖြစ်၍ သည်တစ်ခါ ငါ့အပြစ်ကိုသည်းခံပါလော့။ သင်တို့၏ဘုရားသခင် ထာဝရဘုရားသည်၊ ဤသေဘေးတစ်ခုကိုသာ ငါမှပယ်ရှားပါမည်အကြောင်း တောင်းပန်ပါဟုဆိုသည်ရှိသော်၊ 18မောရှေသည် အထံတော်မှထွက်၍၊ ထာဝရဘုရားကိုတောင်းပန်လေ၏။ 19ထာဝရဘုရားသည် အားကြီးသောအနောက်လေကို လွှတ်တော်မူသဖြင့်၊ ထိုလေသည် ကျိုင်းတို့ကိုဆောင်သွား၍ ဧဒုံပင်လယ်၌ချပစ်လေ၏။ အဲဂုတ္တုပြည်တစ်လျှောက်လုံး၌ ကျိုင်းတစ်ကောင်မျှမကျန်ရစ်။ 20သို့သော်လည်း၊ ထာဝရဘုရားသည် ဖာရောဘုရင်၏နှလုံးကို ခိုင်မာစေတော်မူသဖြင့်၊ သူသည် ဣသရေလအမျိုးသားတို့ကို မလွှတ်ဘဲနေပြန်လေ၏။

နဝမဘေးဒဏ်

အမှောင်ထု

21တစ်ဖန်ထာဝရဘုရားက၊ အဲဂုတ္တုပြည်တစ်လျှောက်လုံး၌ မှောင်မိုက် သာမညမဟုတ်၊ စမ်းသပ်၍တွေ့ရသော မှောင်မိုက်ဖြစ်စေခြင်းငှာ၊ သင်၏လက်ကို မိုးကောင်းကင်သို့ဆန့်လော့ဟု မောရှေအားမိန့်တော်မူသည်အတိုင်း၊ 22မောရှေသည် မိမိလက်ကိုမိုးကောင်းကင်သို့ဆန့်၍၊ အဲဂုတ္တုပြည်တစ်လျှောက်လုံး၌ ထူထပ်သောမှောင်မိုက်သည် သုံးရက်ပတ်လုံး ဖြစ်လေ၏။ဆာ၊ ၁၀၅:၂၈။ ဗျာ၊ ၁၆:၁၀။ 23ထိုအခါ တစ်ယောက်ကိုတစ်ယောက် မမြင်နိုင်ကြ။ သုံးရက်ပတ်လုံး အဘယ်သူမျှ မိမိနေရာမှမထရကြ။ သို့ရာတွင် ဣသရေလအမျိုးသားအပေါင်းတို့သည်၊ မိမိတို့နေရာ၌ အလင်းကိုရကြ၏။

24ထိုအခါ ဖာရောဘုရင်သည် မောရှေနှင့် အာရုန်ကိုခေါ်၍ ထာဝရဘုရားအား ဝတ်ပြုခြင်းငှာသွားကြလော့။ သို့ရာတွင် သိုးနွားများကိုထားခဲ့ကြစေ။ သူငယ်များကို ခေါ်ကြစေဟု မိန့်တော်မူ၏။ 25မောရှေကလည်း၊ ကျွန်ုပ်တို့ဘုရားသခင်ထာဝရဘုရားအား ယဇ်ပူဇော်စရာဖို့ ယဇ်ကောင်များ၊ မီးရှို့ရာပူဇော်သကာများကို ကိုယ်တော်ပေးရမည်။ 26ကျွန်ုပ်တို့သည် တိရစ္ဆာန်များကိုဆောင်သွားရမည်။ တစ်ကောင်မျှ မကျန်ရစ်ရ။ အကြောင်းမူကား၊ သူတို့အထဲက ကျွန်ုပ်တို့ဘုရားသခင် ထာဝရဘုရားအား ဝတ်ပြုစရာဖို့ ရွေးယူရမည်။ ထာဝရဘုရားအား အဘယ်မည်သောအကောင်နှင့် ဝတ်ပြုရမည်ကို ထိုအရပ်သို့မရောက်မီ မသိပါဟုဆိုလေသော်၊ 27ထာဝရဘုရားသည် ဖာရောဘုရင်၏ နှလုံးကိုခိုင်မာစေတော်မူသဖြင့်၊ သူသည် ဣသရေလအမျိုးသားတို့ကိုမလွှတ်။ 28မောရှေကိုလည်း၊ ငါ့ထံမှထွက်သွားလော့။ နောက်တစ်ဖန် ငါ့မျက်နှာကို မမြင်အောင် သတိပြုလော့။ ငါ့မျက်နှာကိုမြင်သောနေ့၌ သေမည်ဟု မိန့်တော်မူ၏။ 29မောရှေကလည်း၊ မိန့်တော်မူချက်သည် လျောက်ပတ်ပါ၏။ မျက်နှာတော်ကို နောက်တစ်ဖန်မမြင်ပါဟု လျှောက်ဆို၏။

ထွက်မြောက်ရာကျမ်း - ၁၀ အနက်ဖွင့်

(ဇ) အဌမကပ်ဆိုး၊ ကျိုင်းကောင်များ (၁၀:၁–၂၀)

၁၀:၁–၂၀ မောရှေနှင့်အာရုန်က ဖာရောမင်းထံ လျှောက်ပြန်သောအခါ ဖာရောမင်းက ခွင့်ပြုသည်။ သို့သော် အမျိုးသားများသာ သွားခွင့်ပြုသည်။ မိန်းမများနှင့် ကလေးသူငယ်များ ထားပစ်ခိုင်းသည်။ ဘုရားသခင်သည် မိသားစုအားလုံး အေးအတူပူအမျှ မရှိအတူ ရှိအတူ မျှဝေခံစားစေချင်သည်။ သို့နှင့် ဖာရောမင်းအား ဆုံးမပြန်သည်။ ဩကာသလောကတခွင်လုံးသို့ ကျိုင်းကောင်အနှံ့စေလွှတ်သည်။ အသီးအရွက်များ လိုက်စားကုန်သည်။ ဘေးရန်အား အဲဂုတ္တုတို့ ဘုရားတုသေရာပိက ဟန့်တားနိုင်စွမ်းမရှိ။ ဖာရောမင်းသည် တထစ် စိတ်လျှော့ကြလာသည်။ သို့သော် မိန်းမများနှင့် ကလေးသူငယ်များကို သွားခွင့် မပြုနိုင်။

(ဈ) နဝမကပ်ဆိုး၊ သုံးရက်လုံးလုံးမှောင်မိုက်ခြင်း (၁၀:၂၁–၂၉)

၁၀:၂၁–၂၈ (၃)ရက်လုံးလုံး မှောင်မိုက်ဖုံးသဖြင့် လှုပ်ရှားသွားလာမှုမပြုကြ။ သို့သော် ဣသရေလများသည် အလင်းထဲတွင် သွားလာရသကဲ့သို့ ပုံမှန် အနေအထားဖြစ်သည်။ အဲဂုတ္တုတို့၏ နေဘုရား Ra လည်းတန်ခိုး မပြနိုင်။ ဖာရောမင်းက မောရှေအား မိန်းမများနှင့်ကလေးများပါ ခေါ်၍ သွားခွင့်ပြုသည်။ သို့သော် ဆိတ်၊ သိုး၊ နွားများကို ထားပစ်ခိုင်းသည်။ ဣသရေလတို့ ပြန်လာအောင် အပေါင်သဘောဖြင့် သိမ်းထားသည်။ အကယ်၍ ထိုသို့ တိရစ္ဆာန်များထားပစ်ခဲ့လျှင် ယေဟောဝါဘုရားသခင်အား ပူဇော်စရာ ယဇ်ကောင်ရှိမည်မဟုတ်။ ထို့ကြောင့် ထိုသို့ မဖြစ်နိုင်ကြောင်း မောရှေ ဆင်ခြေတက်သည်။

၁၀:၂၉ ဖာရောမင်းက သူ့မျက်နှာနောက်တစ်ခါ မတွေ့ချင်ဟု ဆိုသောအခါ မောရှက “ကောင်းပါပြီ၊ နောက်တဖန် မမြင်ပါ” ဟုဆိုသည်။ ဤကျမ်းပိုဒ်သည် ၁၁:၈ နှင့် သဘောကွဲလွဲနေသည်။ မောရှေသည် ဖာရောရှေ့မှ ဒေါနှင့်မောနှင့် ဆောင့်အောင့်ထွက်သွားသည်ဟု ဆိုထားသည်။ Matthew Henry က “နောက်တဖန် ဘယ်သောအခါမှ” ဆိုသည်မှာ ယခုချိန်မှစ၍ဟု ဆိုလိုသည်။ ၁၁:၈ သည်ယခုအဖြစ်အပျက်နှင့် အကြုံးဝင်သည်ဟု ဤသို့ရှင်းပြသည်။

ယခုတွေ့ဆုံသည့်နောက်ပိုင်းတွင် မောရှေသည် ဖာရောမင်းနှင့်မဆုံတော့ပါ။ ဘုရားသခင်၏ နှုတ်ကပတ်တော်ကို လက်မခံ၊ ငြင်းပယ်၍ မထီမဲ့မြင်ပြုခြင်းသည် မိမိအား ပျက်စီးရာပျက်စီးကြောင်း ရှာဖွေခြင်း ဖြစ်သည်။ ရုပ်တုဆင်းတုတော်ကို ဥပေက္ခာပြုခြင်း ဖြစ်သည်။ Gadarenes ရာဒရလူများက ခရစ်တော်အား ထွက်ခွာဖို့ ပြောသောအခါ ကိုယ်တော်ထွက်ခွါခဲ့သည်။၉

ထွက်မြောက်ရာကျမ်း - ၁၀

ထွက်မြောက်ရာကျမ်း - ၁၀ အနက်ဖွင့်

"
Our Visitor
0 0 1 9 3 2

Users Today : 0
Users Yesterday : 9
Users This Year : 1036
Views Today :
Views This Month :
Views This Year : 3716
"

Our Visitor

ထွက်မြောက်ရာကျမ်း - ၁၀

ထွက်မြောက်ရာကျမ်း - ၁၀ အနက်ဖွင့်

"Our Visitor 0 0 1 9 3 2 Users Today : 0 Users Yesterday : 9 Users This Year : 1036 Views Today : Views This Month : Views This Year : 3716"

Our Visitor

"
Our Visitor
0 0 1 9 3 2

Users Today : 0
Users Yesterday : 9
Users This Year : 1036
Views Today :
Views This Month :
Views This Year : 3716
"